ކޮވިޑް ފަތުރާ ވައިރަހުގެ ހަގީގަތް ހޯދަން އަވަސް ތަހުގީގެއް ހިންގަން އެމެރިކާގެ ރައީސް ޖޯ ބައިޑެން ޖާސޫސީ އޮފިޝަލުންނަށް އަމުރު ކުރެއްވުމުން ޗައިނާގެ ހޫނު ބަހުގެ ހަމަލާތަކެއް އެމެރިކާއަށް ރައްދުކޮށްފި އެވެ.
ނުވަދިހަ ދުވަހުގެ ތެރޭގައި ނިންމަން އެންގި ތަހުގީގުގައި ޗައިނާއާ މެދު އެމެރިކާއިން ދެކޭނީ "ގުރުބާން ކަންބަޅިއެއްގެ" ގޮތުގައި ކަމަށް ޗައިނާ ފޮރިން މިނިސްޓްރީން ވަނީ ބުނެފަ އެވެ.
"ޖުލައި 2019 ގައި އެމެރިކާގެ އުތުރު ވާޖިނިއާގައި ނޭވާލާ ނިޒާމަށް ޖެހޭ ގޮތް ނޭނގޭ ބަލިތަކެއް ފެނުނު. ވިސްކޯންސިންގައި އިވާލީ ބަލި ވެސް ފެތުރުނު. އެކަންކަމުގެ މައުލޫމާތާއި ގުޅޭ ކޭސްތަކު ޑޭޓާ އެމެރިކާއިން ހާމަކުރިތަ؟،" ޗައިނާގެ ފޮރިން މިނިސްޓްރީގެ ތަރުޖަމާނު ޒާއޯ ލިޖިއާން ވިދާޅުވި އެވެ.
"އެމެރިކާއިން ތަކުރާރުކޮށް ބުނަމުން ދަނީ ފުރިހަމަ، ދެފުށް ފެންނަ ސައިންޓިފިކް ބައިނަލްއަގްވާމީ ތަހުގީގެއްގައި ޗައިނާއިން ބައިވެރިވާން އެދޭ ކަމަށް. އެހެންކަމަށް ވަންޏާ، އަޅުގަނޑުމެން [ޗައިނާ] އިން އެމެރިކާއަށް މި ގޮވާލަނީ ޗައިނާގެ ނަމޫނާ ބަލައިގަނެ، ދުނިޔޭގެ ސިއްހަތު ޖަމިއްޔާ (ޑަބްލިއުއެޗްއޯ) އާ ގުޅިގެން ކުރިއަށް ދާން،" އޭނާ ވިދާޅުވި އެވެ.
ޗައިނާއިން ތުހުމަތު ކުރި ގޮތުގައި އެމެރިކާގެ ހަމައެކަނި މަގްސަދަކީ ބަލިމަޑުކަމުގެ ތެރެއިން ސިޔާސީ ގޮތުން ތުހުމަތުތައް ކޮށް، ބައިބައިވުން އުފެއްދުމެވެ.
އޭގެ އިތުރުން އެމެރިކާގެ ޖާސޫސީ އިދާރާތަކުން މީގެ ކުރިން އަމަލުކޮށްފައިވާ ގޮތްތަކާ މެދު ސުވާލު އުފެދޭތީ އެއީ އިތުބާރު އޮތް ބައެއް ނޫން ކަމަށް ވެސް ޗައިނާ ފޮރިން މިނިސްޓްރީގެ ތަރުޖަމާނު ވިދާޅުވި އެވެ.
ދެހާސް ނަވާރަ ވަނަ އަހަރުގެ ފަހުކޮޅު ޗައިނާގެ ވޫހާން ސިޓީން އެންމެ ފުރަތަމަ އަލަށް ފެނުނު ކޮރޯނާވައިރަހުން ޖެހޭ ކޮވިޑް ބައްޔަށް މިހާތަނަށް 168 މިލިއަން މީހުން ވަނީ ޕޮޒިޓިވްވެފަ އެވެ. މި ބަލީގައި މިހާތަނަށް 3.5 މިލިއަން މީހުން މަރުވެފައި ވެ އެވެ.
ކަމާ ބެހޭ އިދާރާތަކުން އެންމެ ފުރަތަމަ ބުނީ ވައިރަސް ފެތުރެން ފެށީ ވޫހާންގެ ސީފުޑް މާކެޓަކުން ކަމަށެވެ. އެހެންކަމުން ސައިންސްވެރިން ބުނީ މިއީ ޖަނަވާރުންގެ ގައިން އިންސާނުންގެ ގަޔަށް އެރި ވައިރަހެއް ކަމަށް ބެލެވޭ ކަމަށެވެ.
ނަމަވެސް އެމެރިކާގެ މީޑިއާތަކުން މިހާރު ރިޕޯޓު ކުރާ ގޮތުގައި ވޫހާންގެ ލެބުގައި ވައިރަސް އުފެއްދައިގެން ތަހުލީލުތަކެއް ކުރަނިކޮށް، ބޭރަށް ވައިރަސް ލީކުވެ ދުނިޔެއަށް ފެތުރެން ފެށީ ކަމަށް ބެލެވޭނެ ގިނަ ހެކިތަކެއް ދަނީ ފެންނަމުންނެވެ.
