ރާއްޖޭގައި އާންމުންނަށް ފޯރުކޮށްދޭ އިންޓަނެޓާ ގުޅޭގޮތުން ސަރުކާރުގެ އާ ސިޔާސަތާއި ހެޔޮ އަގުތައް މިއަދު އިއުލާންކޮށްފި އެވެ.
ރައީސް އިބްރާހިމް މުހައްމަދު ސޯލިހުގެ މުހިއްމު ވައުދެއް ކަމުގައި އިންޓަނެޓުގެ އަގުހެޔޮ ކުރުމާ ގުޅިގެން ސަރުކާރުގެ ސިޔާސަތަށް ގެންނަ ބަދަލުތައް އިއުލާންކޮށްފައިވަނީ މިއަދު ހެނދުނު ބޭއްވި ރަސްމިއްޔާތެއްގަ އެވެ.
އިންޓަނެޓުގެ އަގުތަކަށް ހެޔޮ ބަދަލުތަކެއް ފިކްސްޑް ބްރޯޑްބޭންޑް އިންޓަނެޓް ކަނެކްޝަންތަކަށް ވަނީ ގެނެސްފަ އެވެ. މި ބަދަލު ގެނައުމުން ގޭބިސީތަކާއި ވިޔަފާރިތަކުގައި ބޭނުންކުރާ އިންޓަނެޓްގެ އަގު ވަރަށް ބޮޑަށް ހެޔޮވެގެންދާނެ އެވެ.
ފިކްސްޑް ބްރޯޑްބޭންޑް
5 އެމްބީޕީއެސްގެ ސްޕީޑްގައި މަހަކު 250ރ. އަށް 30 ޖީބީ
15 އެމްބީޕީއެސްގެ ސްޕީޑްގައި މަހަކު 500ރ. އަށް 100 ޖީބީ
25 އެމްބީޕީއެސްގެ ސްޕީޑްގައި މަހަކު 700ރ. އަށް 200 ޖީބީ
- އަންނަ ޖުލައި މަހުން ފެށިގެން ރާއްޖޭގެ ހުރިހާ ކަނެކްޝަނެއްގެ އެންމެ މިނިމަމް ސްޕީޑަކީ 2 އެމްބީޕީއެސް
- 300ރ. އަށް ވުރެ މަތިން ނަގާ ޕެކޭޖްތަކުގެ މިނިމަމް ސްޕީޑް ދަށްކުރެވޭނީ 5 އެމްބީޕީއެސް
- ރެސިޑެންޝަލް ބްރޯޑްބޭންޑް ޕެކޭޖްތަކުން 30 ޕަސެންޓު އަގުހެޔޮ ވާނެ
އިންޓަނެޓުގެ ހިދުމަތް ފޯރުކޮށްދޭ މައި ދެ ކުންފުނި ދިރާގާއި އުރީދޫން މިހާރު ހިދުމަތް ފޯރުކޮށްދޭ އަގުތަކަށް ބަލާއިރު، ސަރުކާރުގެ ހުށަހެޅުމުގައި ހިމެނޭ އިންޓަނެޓްގެ އަގުތައް ވަނީ ވަރަށް ބޮޑުތަން ކުޑަ އެވެ.
ފިކްސްޑް ބްރޯޑްބޭންޑުގެ އިތުރުން މޯބައިލް އިންޓަނެޓު ޕްލޭންތަކަށް ވެސް މިއަދު ވަނީ ރަނގަޅު ބަދަލުތަކެއް އިއުލާނުކޮށްފަ އެވެ.
އެގޮތުން، ދިރާގާއި އުރީދޫން ދެމުންދާ މޯބައިލް އިންޓަނެޓުގެ ޕްލޭންތަކަށް ލިބޭ ޑޭޓާ އެލަވަންސް ވަނީ އިތުރުކޮށްދީފަ އެވެ.
އުރީދޫ
- ޕްރީޕެއިޑް - 30– 100 ޕަސަންޓުގެ އިތުރު ޑޭޓާ އެލަވަންސް
- ޕޯސްޓްޕެއިޑް – 20 -30 ޕަސަންޓުގެ އިތުރު ޑޭޓާ އެލަވަންސް
- މޯބައިލް ބްރޯޑްބޭންޑް – 5 – 20 ޕަސަންޓުގެ އިތުރު ޑޭޓާ
ދިރާގު
- ޕްރީޕެއިޑް – 20 ޕަސަންޓުގެ އިތުރު ޑޭޓާ އެލަވަންސް
- ޕޯސްޓްޕެއިޑް – 19 – 28 ޕަސަންޓުގެ އިތުރު ޑޭޓާ އެލަވަންސް
- މޯބައިލް ބްރޯޑްބޭންޑް – 20 ޕަސަންޓުގެ އިތުރު ޑޭޓާ އެލަވަންސް
މޯބައިލް އިންޓަނެޓަށް ގެނެވުނު މި ބަދަލުތައް ލިބެންފަށާނީ އަންނަ އޮކްޓޯބަރު މަހުން ފެށިގެންނެވެ.
އިންޓަނެޓުގެ އަގު ހެޔޮކުރުމަކީ 2018 ވަނަ އަހަރު ވެރިކަމަށް ވަޑައިގެންނެވި ރައީސް އިބްރާހިމް މުހައްމަދު ސޯލިހުގެ ރިޔާސީ ވައުދެކެވެ. ނަމަވެސް، އެ ވައުދު ނުފުއްދި ގިނަ ދުވަސްވާތީ ގިނަ ބައެއްގެ ފާޑުކިޔުންތައް ސަރުކާރަށް ވަނީ އަމާޒުވެފަ އެވެ.
