އިންޓަނެޓުގެ އަގުތަކާ ގުޅޭ ސަރުކާރުގެ އާ ސިޔާސަތުތައް އިއުލާންކުރުން ބުރާސްފަތި ދުވަހަށް ފަސްކޮށްފި އެވެ.
ކުރިން ހަމަޖައްސާފައި އޮތީ އިންޓަނުގެ ހެޔޮ އަގުތައް މިއަދު އިއުލާން ކުރާ ގޮތަށެވެ.
ނަމަވެސް ރައީސް އޮފީހުގެ ތަރުޖަމާނު މަބްރޫކް އަޒީޒް ވިދާޅުވީ، އިންޓަނެޓްގެ ހިދުމަތާ ގުޅޭ ސަރުކާރުގެ އާ ސިޔާސަތު މޭ 27، 2021 ވާ ބުރާސްފަތި ދުވަހުގެ 10 ޖަހާއިރު އިއުލާންކުރުމަށް ހަމަޖެހިފައިވާ ކަމަށެވެ.
އިންޓަނެޓުގެ އަގު ހެޔޮކުރުމަކީ 2018 ވަނަ އަހަރު ވެރިކަމަށް ވަޑައިގެންނެވި ރައީސް އިބްރާހިމް މުހައްމަދު ސޯލިހުގެ ރިޔާސީ ވައުދެކެވެ. ނަމަވެސް އެ ވައުދު ނުފުއްދި ގިނަ ދުވަސްވާތީ ގިނަ ބައެއްގެ ފާޑުކިޔުންތައް ސަރުކާރަށް ވަނީ އަމާޒުވެފަ އެވެ.
މިކަމާ ގުޅޭގޮތުން އެންމެ ފަހުން ލިބުނު މައުލޫމާތުތަކަށް ބަލާއިރު ސަރުކާރާއި މުވާސަލާތީ ހިދުމަތްދޭ ކުންފުނިތަކާ ދެމެދު ކުރެވުނު މަޝްވަރާތަކަށް ފަހު އަގާ މެދު އެއްބަސްވުމަކަށް ވަނީ އާދެވިފަ އެވެ.
އެނގިފައިވާ ގޮތުގައި މި ބަދަލުތައް އަންނަނީ ހަމައެކަނި ފިކްސްޑް ބްރޯޑްބޭންޑް އިންޓަނެޓް ކަނެކްޝަންތަކަށެވެ. މި ބަދަލު ގެނައުމުން ގޭގޭގަ އާއި ވިޔަފާރިތަކުގައި ބޭނުންކުރާ އިންޓަނެޓްގެ އަގު ވަރަށް ބޮޑަށް ހެޔޮވެގެންދާނެ އެވެ. ސަރުކާރުން ހުށައަޅާފައިވާ އަގުތަކަކީ:
- 5 އެމްބީޕީއެސްގެ ސްޕީޑްގައި މަހަކު 250ރ. އަށް 30 ޖީބީ
- 15 އެމްބީޕީއެސްގެ ސްޕީޑްގައި މަހަކު 500ރ. އަށް 100 ޖީބީ
- 25 އެމްބީޕީއެސްގެ ސްޕީޑްގައި މަހަކު 750ރ. އަށް 200 ޖީބީ
ރާއްޖޭގައި އިންޓަނެޓުގެ ހިދުމަތް ފޯރުކޮށްދޭ ތިން ކުންފުންޏެއް އޮވެ އެވެ. އެއީ ދިރާގު، އުރީދޫ އަދި އާރްއޯއެލް އެވެ. މި ވިޔަފާރިތަކުން ހިދުމަތް ފޯރުކޮށްދޭ އަގުތަކަށް ބަލާއިރު، ސަރުކާރުގެ ހުށަހެޅުމުގައި ހިމެނޭ އިންޓަނެޓްގެ އަގުތައް ވަރަށް ބޮޑުތަން ކުޑަ އެވެ.
