ޕެރިސް (މެއި 24) - ފްރެންޗް ލީގުގެ ފަހު މެޗުގައި އެންޖާސް ދަނޑުގައި 2-1 އިން މޮޅުވެ، ލިލް އިން 10 އަހަރު ތެރޭ ފުރަތަަމަ ފަހަރަށް މުބާރާތުގެ ޗެމްޕިއަންކަން ހޯދައިފި އެވެ.
ލިލް އިން އެ ކްލަބް ތާރީހުގައި ހަތަރު ވަނަ ފަހަރަށް ލީގު ތަށި އުފުލާލީ ދެ ވަނަ އަށް ދިޔަ ޕީއެސްޖީ އަށް ވުރެ އެއް ޕޮއިންޓް އިތުރަށް ހޯދައިގެންނެވެ. ލިލް އަށް 83 ޕޮއިންޓް ލިބުނުއިރު، ޕީއެސްޖީގެ އޮތީ 82 ޕޮއިންޓެވެ. ޕީއެސްޖީ ވަނީ 2-0 އިން މިރޭ ބްރެސްޓް ބަލިކޮށްފަ އެވެ. ލެންސާ ލަނޑެއް ނުޖެހި އެއްވަރުވި މޮނާކޯ އަށް 78 ޕޮއިންޓް ލިބުނުއިރު، ޗެމްޕިއަންސް ލީގުގެ ޖާގައެއް އެ ޓީމަށް ވަނި ލިބިފަ އެވެ.
މިރޭ ނީސް އަތުން 3-2 އިން ބަލިވި ލިޔޯނާއި މެޓްޒާ އެއްވަރުވި މާސޭ އަންނަ ސީޒަނުގައި ކުޅޭނީ ޔޫރޮޕާ ލީގުގަ އެވެ. ލިޔޯން ހަތަރު ވަަނަ އަށް ދިޔައީ 76 ޕޮއިިންޓާ އެކު އެވެ. ފަސް ވަނައިގައި ނިންމި މާސޭ އަށް ލިބުނީ 59 ޕޮއިންޓެވެ.
އެންޖާސް ދަނޑުގައި ލިލް އިން ފުރަތަމަ ހާފުގައި ދެ ގޯލު ޖެހި އެެވެ. ޖޮނަތަން ޑޭވިޑް މެޗުގެ 10 ވަނަ މިނިޓްގައި ލިލް އަށް ލީޑުނަގައިދިންއިރު، ފުރަތަމަ ހާފުގެ އިތުރު ވަގުތުގައި ތުރުކީގެ ފޯވާޑް ބުރަކް ޔިލްމާޒް ވަނީ ލިލްގެ ލީޑުފުޅާކޮށްދީފަ އެވެ. މެޗުގެ އިތުރު ވަގުތުގައި އެންޖާސްގެ ހަމައެކަނި ގޯލު ޖެހީ އެންޖެލޯ ފުލްޔީނީ އެވެ.
ލިލްގެ މި ކާމިޔާބީގައި އެންމެ ހާއްސަ ކްރެޑިޓެއް ހައްގުވަނީ އެ ޓީމުގެ ކޯޗު ކްރިސްޓޮފް ގަލްޓިއޭ އަށެވެ. އޭނާ ވަނީ 2017 ވަނަ އަހަރު ލިލްއާ ހަވާލުވެ 2018 ވަނަ އަހަރު އެ ޓީމު ފްރެންޗް ލީގުގެ ރެލިގޭޝަނުން ސަލާމަތްކޮށްދީ 2019 ވަނަ އަހަރު އެ ޓީމަށް ލީގުގެ ދެ ވަނަ ހޯދައިދީފަ އެވެ. އަދި މި ސީޒަނުގައި ލީގުގެ ޗެމްޕިއަންކަން ހޯދީ އެވެ.
"ޕީއެސްޖީ ފަދަ ޓީމެއް ކައިރިން ކުރި ހޯދައި ލީގު ހޯދުމަކީ ބޮޑު ކާމިޔާބެއް. މި ކާމިޔާބީ އަހަރެެން ހާއްސަ ކުރާނީ ރިހެބިލިޓޭޝަނުގައި އޮތް އަހަރެންގެ މަންމަ އާއި ދުނިޔޭގައި ނެތަސް އަހަރެންނާ އެކު އަަބަދު ވެސް ވާނެ އަހަރެންގެ ބައްޕަ އަށް. އަހަރެން މި މަސައްކަތުގައި ދެމިހުންނަށް އަބަދުވެސް އެ މީހުން ހިތްވަރު ދޭ،" 2009 އިން 2017 އަށް ސެއިން އެޓިއަން އަށް ކޯޗުކޮށްދިން ފްރާންސަށް އުފަން ގަލްޓިއޭ ބުންޏެވެ.
ބްރެސްޓް ކޮޅަށް މިރޭ ޕީއެސްޖީ އަށް ލީޑުނަގައިދޭން މެޗުގެ 19 ވަނަ މިނިޓްގައި ނޭމާ ފޮނުވާލި ޕެނަލްޓީ ކާމިޔާބެއް ނުވި އެވެ. އެކަމަކު ބްރެސްޓްގެ ރޮމެއިން ފާވްރޭ އަތުން ބައިކޮޅަށް ވަން ގޯލުން ޕީއެސްޖީން ފުރަތަމަ ހާފުގައި ލީޑުނެގި އެވެ. އެ ޓީމުގެ ދެ ވަނަ ގޯލު މެޗުގެ ދެ ވަނަ ހާފްގައި ޖެހީ ކީލިއަން އެމްބާޕޭ އެވެ. އެއީ އެންހެލް ޑި މާރިއާ ދިން ބޯޅައަކުންނެވެ.
މިއީ ފާއިތުވި އަށް އަހަރު ތެރޭ ޕީއެސްޖީ ނޫން ޓީމަކުން ފްރެންޗް ލީގު ހޯދި ދެ ވަނަ ފަހަރެވެ. ލިލްގެ އިތުރުން ޕީއެސްޖީ ނޫން ޓީމަކަށް މިދިޔަ އަހަރުތަކުގައި ލީގު ހޯދުނު ހަމައެކަނި ޓީމަކީ 2017 ވަނަ އަހަރު މޮނާކޯ އެވެ.
