އަންނަ މަހު މާލޭގައި ބާއްވާ އުރީދޫ ސާފް ޗެމްޕިއަންޝިޕަށް ތައްޔާރުވުމުގެ ގޮތުން ނޭޕާލުން އޮމާނާ ދެކޮޅަށް އެކުވެރިކަމުގެ މެޗެއް ކުޅެން ހަމަޖައްސައިފި އެވެ.
ގަތަރުގައި މި ވަގުތު ޓްރެއިނިން ކޭމްޕެއް ފުރިހަަމަ ކުރަމުން އަންނަ ނޭޕާލުން އޮމާނާ ދެކޮޅަށް ކުޅޭ މެޗު އޮންނާނީ އަންނަ އާދިއްތަ ދުވަހު އެވެ. އޮމާނަކީ އެންމެ ފަހުން ނެރުނު ފީފާ ރޭންކިންގައި ދުނިޔޭގެ 78 ވަނައިގައި އޮތް ޓީމެކެވެ.
ނޭޕާލުން ވަނީ ސާފް ޗެމްޕިއަންޝިޕަށް ތައްޔާރުވުމުގެ ގޮތުން މި މަހު ކުރީކޮޅުގައި ކަތުމަންޑޫ ދަސްރަތު ސްޓޭޑިއަމްގައި އިންޑިއާއާ ދެކޮޅަށް ދެ މެޗެއް ކުޅެފަ އެވެ. މި މަހު ދެ ވަނަ ދުވަހު ކުޅުނު މެޗު 1-1 އިން އެއްވަރުވެގެން ނިމުނުއިރު، ފަސް ވަނަ ދުވަހު ކުޅުނު މެޗުން އިންޑިއާ މޮޅުވީ 2-1 އިންނެވެ.
ގަތަރުގައި މި މަހު އަށް ވަނަ ދުވަހުން ފެށިގެން ޓްރެއިނިން ކޭމްޕެއްގައި ތިބި ނޭޕާލުން ވަނީ ދާދި ފަހުން ގަތަރުގެ ދެ ވަނަ ޑިވިޝަންގެ ކްލަބް އަލް ބިދާ ސްޕޯޓްސް ކްލަބާ ދެކޮޅަށް ކުޅެފަ އެވެ. އެ މެޗުން ނޭޕާލް މޮޅުވީ 2-0 އިންނެވެ.
މި ފަަހަރުގެ ސާފް ޗެމްޕިއަންޝިޕަށް ނޭޕާލުން ނުކުންނާނީ ކުވޭތުގެ ކޯޗު އަބްދުﷲ އަލް މުތައިރީގެ އިރުޝާދުގެ ދަށުންނެވެ. ދާދި ފަހުން ނޭޕާލްގެ ފުޓްބޯޅަ ފެޑެރޭޝަންގެ ލީޑަޝިޕްގެ ބައެއް މެމްބަރުންނާއި މުތައީރީއާ ދެމެދު ހިޔާލުތަފާތުވުންތަކެއް އުފެދި އޭނާ ނޭޕާލް ޓީމު ދޫކޮށްލާނެ ކަމަށް ވެސް ބެލެވުނެވެ. އެކަމަކު، ނޭޕާލް ފުޓްބޯޅަ ފެޑެރޭޝަނުން ނިންމީ މުތައީރީއާ އެކު ކުރިއަށްދާށެވެ.
ނޭޕާލުން އަންނަ މަހު 1-16 އަށް މާލޭގައި ކުރިއަށްދާ ސާފް ޗެމްޕިއަންޝިޕްގައި ފުރަތަމަ ކުޅޭ މެޗުގައި އަންނަ މަހު އެއް ވަނަ ދުވަހުގެރޭ ކުޅޭނީ ރާއްޖެއާ އެެވެ. ރާއްޖޭން ވެސް ސާފް ޗެމްޕިއަންޝިޕަށް ތައްޔާރުވާން ޓްރެއިނިން ކުރިއަށްގެންދަނީ ގަތަރުގަ އެވެ.
ނޭޕާލުން ޓްރެއިނިން ކޭމްޕްގެ ތެރެއިން ރާއްޖެއާ މެޗެއް ކުޅެން ހުށަހެޅި އެވެ. އެކަމަކު، މުބާރާތުގެ ފުރަަތަމަ މެޗު ކުޅެން އޮތް ޓީމާ ދެކޮޅަށް މެޗެއް ކުޅުން ރަނގަޅުނުވާނެތީ އެ ފުރުސަތު ދޫކޮށްލީ އެވެ.
ރާއްޖޭން ވަނީ ގަތަރު ޓްރެއިނިން ކޭމްޕަށް އައިއިރު ލަންކާއާ ދެކޮޅަށް މެޗެއް ކުޅެން ނިންމައިފަ އެވެ. އެކަމަކު، ލަންކާގެ ކޮވިޑްގެ ހާލަތުގެ ސަބަބުން ގަތަރުން ވިސާ ނުލިބޭތީ އެ ގައުމަށް ނުދެވުނެވެ. އެހެންވެ، ލަންކާ އިން ޓްރެއިނިން ކޭމްޕަށް ދިޔައީ ސައުދީ އަރަބިއްޔާ އަށެވެ.
މީގެ ކުރިން ބަންގްލަދޭޝް އިން ވަނީ އެ ގައުމަށް ގޮސްގެން މެޗެއް ކުޅެން ރާއްޖެ އަށް ހުށަހަޅައިފަ އެވެ. އެކަމަކު، މިއީ އެ ގޮތަށް ސަރަހައްދުގެ އެހެން ގައުމަކަށް ގޮސްގެން މެޗެއް ކުޅެވޭ ވަރަށް ވުރެ ކޮވިޑްގެ ހާލަތު ރަނގަޅު ނޫން ދުވަސްވަރަކަށް ވާތީ މި ވަގުުތު އެ ފުރުސަތުގެ ބޭނުން ނުހިފަން ނިންމީ އެވެ.
ނޭޕާލުން ސާފްގައި ކުޅޭ ދެ ވަނަ މެޗުގައި އަންނަ މަހު ހަތަރެއްގައި ނުކުންނާނީ ލަންކާއާ ދެކޮޅަށެވެ. ތިން ވަނަ މެޗުގައި 10 ވަނަ ދުވަހު ކުޅޭނީ އިންޑިއާއާ އެވެ. އަދި ލީގު ބުރުގެ ފަހު މެޗުގައި އަންނަ މަހު 13 ވަނަ ދުވަހު ބަންގްލަދޭޝްއާ ބައްދަލުކުރާނެ އެވެ.
