އިޒްރޭލާއި ގާޒާއާ ދެމެދު 11 ދުވަސް ވަންދެން ކުރި ހަމަލާ ބަދަލު ކުރުން ހުއްޓާލަން އެއްބަސްވެފައިވާ މި ދަނޑިވަޅުގައި އިތުރު ހަމަނުޖެހުން ނުހިނގާނެ ގޮތްތައް ހޯދުމަށް މަސައްކަތް ފަށައިފި އެވެ.
އެކަމުގެ މަޝްވަރާއަށް މިސްރުގެ ޓީމަށް މިހާރު ދަނީ އިޒްރޭލުގައި ހަރަކާތްތެރިވަމުންނެވެ. ބެލެވޭ ގޮތުގައި އެމެރިކާގެ ސެކެޓްރީ އޮފް ސްޓޭޓް އެންޓޮނީ ބްލިންކެން ވެސް އަންނަ ހަފްތާގައި މެދުއިރު މައްޗަށް ދަތުރު ކުރާނެ އެވެ.
މި ފަހަރުގެ ހަމަލާ ބަދަލު ކުރުމަށް ފަހު އިޒްރޭލާއި ގާޒާ ކޮންޓްރޯލް ކުރާ ހަމާސް ގްރޫޕުން ވެސް އަންނަނީ ކާމިޔާބު ލިބުނީ އެ މީހުންނަށް ކަމަށް ދައުވާ ކުރަމުންނެވެ.
އެ ހަމަލާތަކުގައި ފަލަސްތީނުން 240 މީހުން އަދި އިޒްރޭލުން 12 މީހުން މަރުވި އެވެ.
ގާޒާ އާއި އިޒްރޭލާ ދެމެދު ހަމަލާ ބަދަލު ކުރަން ފެށީ ނިމުނު ރޯދަ މަހު އަގްސާ މިސްކިތުގައި ނަމާދު ކުރަން ހުރި ހުރަސްތަކާ ގުޅިގެން ހަމަނުޖެހުން ބޮޑުވެފައި ވަނިކޮށެވެ. އޭގެ އިތުރުން ހުޅަނގު އައްސޭރީގެ ޝެއިހް ޖައްރާ ހިސާބުގައި އުޅޭ ފަލަސްތީނު މީހުން ގެތަކުން ނެރެން އުޅޭ މައްސަލަ ވެސް އޮތީ ބޮޑުވެފަ އެވެ.
ހުކުރު ދުވަހު އޮތް ނޫސްވެރިންގެ ބައްދަލުވުމެއްގައި އިޒްރޭލުގެ ބޮޑު ވަޒީރު ބެންޖަމިން ނަތަންޔާހޫ ވިދާޅުވީ އިޒްރޭލުން ވަނީ ހަމާސްއަށް ބޮޑެތި ގެއްލުންތަކެއް ދީފައި ކަމަށެވެ.
"ހުރިހާ ކަމެއް އަދި އާއްމުންނަށް ހާމައެއް ނުކުރަން. ހާސިލްވި ކަންކަން ފަހުން ހާމަކުރަމުން ދާނަން،" އޭނާ ވިދާޅުވި ކަމަށް ބީބީސީގައި ވެ އެވެ.
ހަމާސްގެ އެންމެ އިސް ސިޔާސީ ލީޑަރު އިސްމާއިލް ހަނިއްޔާ ވިދާޅުވީ މި ނިމުނު ހަމަލާ ބަދަލު ކުރުމުން އަންގައިދެނީ މަޝްވަރާކޮށްގެން ހައްލެއް ހޯދުމަކީ ބިލާހެއް ކަމެވެ. އަދި ފަލަސްތީނަށް މިނިވަންކަން ލިބެން އޮތް އެންމެ ރަނގަޅު ސްޓްރެޓެޖިކް ވިސްނުމަކީ އަޅުވެތިކަމާ ދެކޮޅަށް ތެދުވުން ކަމުގައި ވިދާޅުވި އެވެ.
"އަޅުގަނޑުމެން، ގްރޫޕެއްގެ ގޮތުގައި، އަދި ގްރޫޕުގެ ލީޑަރުންނާއި، ގާޒާގެ ހުރިހާ ރައްޔިތުންނާއި ފަލަސްތީނުގެ ރައްޔިތުންނާއި ދުނިޔޭގެ އެހެން ރައްޔިތުން ގުޅިގެން ގާޒާ އަލުން ބިނާ ކުރާނަން،" އޭނާ ވިދާޅުވި އެވެ.
