މިއުނިކް (މެއި 22) - ޖަރުމަނު ލީގުގައި މިރޭ އޯގްސްބާގް އަތުން ބަޔާން މިއުނިކް 5-2 އިން މޮޅުވި މެޗުގައި ގޯލު ޖަހައި، ލީގުގެ އެއް ސީޒަނެއްގައި 41 ގޯލު ހަމަކޮށް ބަޔާންގެ ފޯވާޑް ރޮބަޓް ލެވަންޑޯސްކީ 49 އަހަރުވީ ރެކޯޑެއް މުގުރާލައިފި އެވެ.
ލީގު ސީޒަނެއްގައި 40 ގޯލު ޖަަހައިގެން ކުރީގެ އެއް ވަަނަ ފޯވާޑް ގާޑް މުލާ ރެކޯޑް ހެދީ 1972 ވަނަ އަހަރު އެވެ. ދުނިޔޭގެ މޮޅު ކުޅުންތެރިޔާގެ މަގާމު މިދިޔަ އަހަރު ހޯދި ޕޮލެންޑަށް އުފަން ލެވަންޑޯސްކީ މި ފަހަރުގެ ލީގުގައި 41 ގޯލު ޖެހީ 29 މެޗުންނެވެ. އަނިޔާގެ ސަބަބުން ލެވަންޑޯސްކީ އަށް މެޗުތަކެއް ގެއްލުނެވެ.
ބަޔާން ދަނޑުގައި މިރޭ އޯގްސްބާގާ ދެކޮޅަށް ކުޅުނު މެޗުގައި ލެވަންޑޯސްކީ ގޯލު ޖެހީ މެޗުގެ ފަހު ވަގުތުގަ އެވެ. އޭގެ ކުރިން ބަޔާންގެ ހަތަރު ގޯލު ޖެހީ ކިންގްސްލީ ކޯމަން، ޔޯސުއާ ކިމިޗް، ސާޖް ގްނަބްރީ އަދި ޖެފްރީ ފޯވިލިީއު އެވެ. ކޯމަންގެ ގޯލު ޖަހަން ފުރުސަތު ތަނަވަސްކޮށްދިނީ މި ސީޒަނަށް ފަހު ބަޔާން ދޫކޮށްލަން ނިންމާފައިވާ ފުލްބެކް ޑޭވިޑް އަލަބާ އެވެ. އަަލަބާ އަށް ވަނީ ބަޔާންގެ ފަރާތުން ހާއްސަ ސޮވެނިއާ އެއް ހަވާލުކޮށްފަ އެވެ.
އޯގްސްބާގްގެ ގޯލުތައް ޖެހީ އަންޑްރޭ ހާން އާއި ފްލޯރިއަން ނެއިޑާލާޝްނާ އެވެ.
ބާކީ ދެ މެޗު އޮއްވައި ލީގު ޗެމްޕިއަންކަން ކަށަވަރުކުރި ބަޔާނުން ސީޒަން ނިންމާލީ 78 ޕޮއިންޓާ އެކު އެވެ. ދެ ވަނަ އަށް ދިޔައީ މިރޭ ޔޫނިއަން ބާލިން އަތުން 2-1 އިން ބަލިވި އާރްބީ ލައިޕްޒިގު އެވެ. ލައިޕްޒިގުގެ ކޯޗު ހޫލިއަން ނާގަލްސްމަން އަންނަ ސީޒަނުގައި ފެންނާނީ ބަޔާނުނެވެ. ލައިޕްޒިގަށް މި ފަހަރު ލިބުނީ 65 ޕޮއިންޓެވެ.
ޗެމްޕިއަންސް ލީގުގެ އަނެއް ދެ ޖާގަ ލިބުނީ ތިން ވަނަ ދިޔަ ބޮރޫޝިއާ ޑޯޓްމަންޑާއި ހަތަރެއްގައި ނިންމި ވުލްފްސްބާގް އަށެވެ. ޑޯޓްމަންޑް މިރޭ ވަނީ 3-1 އިން ބަޔާ ލެވަކޫސަން ބަލިކޮށްފަ އެވެ. މައިންޒް އަތުން ވުލްފްސްބާގް ބަލިވީ 3-2 އިންނެވެ. ޑޯޓްމަންޑަށް 64 ޕޮއިންޓް ލިބުނުއިރު، ވުލްފްސްބާގްގެ އޮތީ 61 ޕޮއިންޓެވެ.
