މާލޭ ސިޓީގެ މަގުތައް ދޮވެ، ސާފުކުރުމުގެ މަސައްކަތް ސިޓީ ކައުންސިލުން މިއަދު ފަށައިފި އެވެ.
މާލޭގައި މިދިޔަ އަހަރު ކޮވިޑު ފެތުރެން ފެށުމާއެކު މާލޭގެ މަގުތައް ޑިސްއިންފެކްޓް ކުރުމުގެ މަސައްކަތް އޭރުގެ ސިޓީ ކައުންސިލުން ކުރި އެވެ. ނަމަވެސް، އޭގެފަހުން އެކަން ކުރިއަށް ނުދެ އެވެ.
އެ މަސައްކަތް އަލުން ފައްޓަވައި ދެއްވީ އާ މޭޔަރު ޑރ. މުހައްމަދު މުއިއްޒު، މިއަދު މަސް މާރުކޭޓް ސަރަހައްދުންނެވެ.
މުއިއްޒު ވިދާޅުވީ މަގުތައް ދޮވެ، ޑިސްއިންފެކްޓް ކުރުމުގެ މަސައްކަތް ސިޓީ ކައުންސިލުން ފެށީ، އެކަމަށް އެޗްޕީއޭ އާއި ހެލްތު މިނިސްޓްރީން އެދިގެން ކަަމަށެވެ.
އާ މޭޔަރު ވިދާޅުވި ގޮތުގައި، ހެލްތު މިނިސްޓަރުގެ ވެސް ލަފާއާއެކު، މާލޭގެ ހުރިހާ މަގުތަކެއް ޑިސްއިންފެކްޓް ކުރުމަށް ވަނީ ނިންމައިފަ އެވެ. ނަމަވެސް، ފުރަތަމަ އިސްކަން ދޭނީ އާންމުކޮށް މީހުން ގިނައިން އެއްވެ އުޅޭ މަގުތަކަށް ކަމަށް ވިދާޅުވި އެވެ.
އެގޮތުން މާރުކޭޓްތަކާއި ޓާމިނަލްތައް ހިމެނޭ ސަރަހައްދާއި އައިޖީއެމްއެޗް ހިމެނޭ މަގުތައް އިސްކަން ދީގެން ސާފު ކުރާނެ ކަމަށް މުއިއްޒު ވިދާޅުވި އެވެ.
މަގާމާ ހަވާލުވެވަޑައިގެންނެވުމަށްފަހު، މުއިއްޒު ވަނީ ހެލްތު މިނިސްޓަރު އަހުމަދު ނަސީމާއި އެޗްޕީއޭގެ އިސް ބޭފުޅުންނާ ބައްދަލު ކުރައްވާފަ އެވެ. އަދި، ކޮވިޑް ވެކްސިނާ ގުޅޭ ގޮތުން ހޭލުންތެރިކުރުމަށް ސިޓީ ކައުންސިލުގެ މުވައްޒަފުން ނެރެގެން މަސައްކަތް ކުރަން ނިންމައިފަ އެވެ.
