ލަންޑަން (މެއި 22) - މި ސީޒަނަށް ފަހު ޓޮޓެންހަމް ހޮޓްސްޕާސްގެ އިނގިރޭސި ފޯވާޑް ހެރީ ކޭން އެ ޓީމު ދޫކޮށްލަން ބޭނުންވާ ވާހަކަ ބުނެފައިވާއިރު، އޭނާ ބޭނުންނުވާނެ ޓީމެއް ނުހުންނާނެ ކަމަށް ޗެލްސީގެ ކޯޗު ތޯމަސް ޓުޗެލް ބުނެފި އެވެ.
އިނގިރޭސި މީޑިއާ ރިޕޯޓްތައް ބުނާގޮތުން ކޭންގެ ސޮއި ހޯދަން ޗެލްސީން އޮތީ ދެ ކުޅުންތެރިންނާ އެކު ޓްރާންސްފާ ފީއެއް ދޭން ވެސް ތައްޔާރަށެވެ. އެ ދެ ކުޅުންތެރިންނަކީ ޓެމީ އަބްރަހަމް އާއި ކެޕާ އަރިއްޒަބަލާގާ ކަމަށް ބައެއް މީޑިއާތަކުން ރިޕޯޓްކޮށްފައިވެ އެވެ.
ލީގުގެ ފަހު މެޗުތަކުގެ ކުރިން އޮތް ނޫސްވެރިންގެ ބައްދަލުވުމުގައި ޓުޗެލް ގާތުގައި ވަނީ ކޭންއާ ބެހޭގޮތުން ސުވާލުކޮށްފަ އެވެ. ޗެލްސީން ކޭން އަށް ޝައުގުވެރިވާ ކަމަށް ނުބުނެ ޓުޗެލް ދިނީ ނުސީދާ ޖަވާބުތަކެކެވެ.
"ދުނިޔޭގެ ކޮންމެ ތަނަކުން ވިޔަސް ކޯޗަކު ދައްކަންވީ އެ މީހެއްގެ ޓީމަށް ހެރީ ކޭން ބޭނުން ނުވާނެ. ދެން ބުނެލާ އަހަންނަށް ފޯނު ކުރަން. އަހަރެން ބޭނުން އޭނަ (ކޭން) އާ ވާހަަކަ ދައްކާލަން. އެޓޭކްކުރުމާއި ލަނޑު ޖެހުމާ މެދު ކޭންގެ ވިސްނުން ދެނެގަންނަން،" ޓުޗެލް ބުންޏެވެ.
އުމުރުން 27 އަހަރުގެ ކޭން ޓޮޓެންހަމްގެ ކޮންޓްރެކްޓްގައި ހުރީ 2024 ވަނަ އަހަރުގެ ޖޫންގެ ނިޔަލަށް ކަމުގައި ވިޔަސް އޭނާ އެދެނީ ކެރިއަރަށް ވިސްނާފައި މި ސީޒަން ނިމުމުން ޓީމު ބަދަލުކުރާށެވެ. އެއީ ޓޮޓެންހަމްގައި ހުރެ މިހާތަނަށް ތަށްޓެއްގައި އަތްލުމުގެ ނަސީބު ލިބިފައިނުވާއިރު، އެކަން ހާސިލްކުރަން ބޭނުންވާތީ އެވެ.
ޓުޗެލް ބުނީ މި ވަގުތަށް ގަބޫލުކުރަން ޖެހޭނެ ހަގީގަތަކީ ކޭން އެ ހުރީ ޓޮޓެންހަމްގައި ކަމަށާއި ޓްރާންސްފާގެ ވާހަކަތަކެއްގެ ތެރޭގައި ބުނަން ނުޖެހޭ އެއްޗެއް ހާމަނުކުރާނެ ކަމަށެވެ.
"އަހަރެމެންނެއް އެއްވެސް ނޫސްވެރިންގެ ބައްދަލުވުމެއްގައި ޓްރާންސްފާގެ ވާހަކަތަކެއްގެ ތެރޭގައި ދައްކަން ނުޖެހޭ ވާހަކައެއް ނުދައްކާނަން. ކޭން އަކީ ޓޮޓެންހަމްގެ ދިގު މުއްދަތުގެ އެއްބަސްވުމެއްގައި ހުރި ކުޅުންތެރިއެއް،" ޓުޗެލް ބުންޏެވެ.
ޓީމު ދޫކޮށްލަން ބޭނުންވާ ވާހަކަތައް ކޭން މީޑިއާއާ ހިއްސާކުރުމާ އެކު އޭނާ ކުޅެމުން އަންނަ ޓޮޓެންހަމްގެ ޗެއާމަން ޑެނިއަލް ލީވީ ވަނީ ހިތްހަމަނުޖެހިފަ އެވެ. ކޭންގެ ސޮއި ހޯދަން އެންމެ ބޮޑަށް މަސައްކަތްކުރާ ޓީމަކީ މެންޗެސްޓާ ސިޓީ އެވެ.
