އެގާރަ ދުވަސް ވަންދެން ހަމަލާ ބަދަލު ކުރުމަށް ފަހު އިޒްރޭލާއި ގާޒާ ކޮންޓްރޯލް ކުރާ ހަމާސް ގްރޫޕުން ވަނީ ހުކުރު ދުވަހުގެ ރޭ 02:00 ގައި ހަމަލާތައް ހުއްޓާލާފަ އެވެ.
ގާޒާގެ ހެލްތު މިނިސްޓްރީގެ ތަފާސްހިސާބު ދައްކާ ގޮތުން 243 މީހުން އެ ތަނުން މަރުވި އެވެ. އޭގެ ތެރޭގައި 100 އަށް ވުރެ ގިނަ ކުޑަކުދިންނާއި އަންހެނުން ހިމެނެ އެވެ. އިޒްރޭލުން ބުނާ ގޮތުގައި ހަމާސްގެ 225 މެމްބަރުން މަރާލެވުނެވެ. ނަމަވެސް މިއީ އެއްވެސް ފަރާތަކުން ޔަގީންކޮށްދީފައިވާ އަދަދެއް ނޫނެވެ.
އިޒްރޭލުން މަރުވެފައި ވަނީ ދެ ކުޑަކުދިންނާ އެކު 12 މީހުން ކަމަށް އެ ގައުމުގެ ސިއްހީ ހިދުމަތްތަކުން ބުނެ އެވެ.
ހަމާސް އާއި އިޒްރޭލުން ވެސް ކާމިޔާބު ލިބުނު ކަމަށް ދައުވާ ކުރަމުން ދާއިރު، ހަމާސްގެ ރޮކެޓު ހަމަލާތަކާއި އިޒްރޭލުގެ މިސައިލާ ބޮމުގެ ހަމަލާތަކުން ލިބުނު ގެއްލުމުގެ ފޮޓޯތައް މިހާރު ވަނީ އާއްމު ވާން ފަށާފަ އެވެ.
ހަމަލާތަކުގައި ސުންނާފަތިވެފައިވާ ގެޔެއްގެ ތެރޭގައި އެ ގޭގައި ދިރިއުޅޭ އާއިލާ.-- ފޮޓޯ: އީޕީއޭ
އިޒްރޭލުގެ އަސްކަރިއްޔާއިން ބުނާ ގޮތުގައި 11 ދުވަހުގެ ތެރޭގައި ހަމާސްއިން ވަނީ 4،300 އަށް ވުރެ ގިނަ ރޮކެޓު ހަމަލާ އިޒްރޭލަށް ފޮނުވާފަ އެވެ. އަދި ހަމާސްގެ ހަތިޔާރު އެޅި މެމްބަރުންގެ 1000 ޓާގެޓަށް ހަމަލާ ދެވުނު ކަމަށް އިޒްރޭލުން ބުނެ އެވެ.
ދެކުނު އިޒްރޭލުގައި ހަމާސްގެ ރޮކެޓު ހަމަލާއަކުން ގެއްލުންވެފައިވާ ގެޔެއްގެ ތެރޭގައި އެ ގޭގެ މީހުން ހަރަކާތްތެރި ވަނީ.-- ފޮޓޯ: ރޮއިޓާޒް
ތެލް އަވީވްގެ ރާމަތް ގަން ހިސާބަށް ވެސް ވަނީ ރޮކެޓު ހަމަލާ އަރާ، ބަޔެއް އިމާރާތްތަކާއި ކާރުތަކަށް ގެއްލުންވެފައި.-- ފޮޓޯ: އީޕީއޭ
އިޒްރޭލުގެ ބޮޑުވަޒީރު ބެންޖަމިން ނަތަންޔާހޫ ވިދާޅުވީ ގާޒާއަށް ދިން ހަމަލާތަކުގައި ފަލަސްތީނުގެ އާއްމުންނަށް ގެއްލުން ނުވާނެ ގޮތަށް އަމަލު ކުރަން ވަރަށް ބޮޑަށް ބެލި ކަމަށެވެ. ދުނިޔޭގެ އެހެން އެއްވެސް ގައުމަކުން ނުބަލާ މިންވަރަށް އެކަމުގައި ސަމާލުކަން ދިން ކަމަށް ވެސް ނަތަންޔާހޫ ވިދާޅުވި އެވެ.
މިދިޔަ އޭޕްރިލް މަހު ގާޒާގެ މަގެއްގައި މީހުން އުޅޭ މަންޒަރު.-- ފޮޓޯ: އީޕީއޭ
ހަމަލާތަކަށް ފަހު ލިބިފައިވާ ގެއްލުން ހަމަ އެ މަގުގައި.-- ފޮޓޯ: ގެޓީ އިމޭޖަޒް
ހުކުރު ދުވަހު އޮތް ނޫސްވެރިންގެ ބައްދަލުވުމެއްގައި ނަތަންޔާހޫ ވިދާޅުވީ އިޒްރޭލުން ވަނީ ހަމާސްއަށް ބޮޑެތި ގެއްލުންތަކެއް ދީފައި ކަމަށެވެ.
"ހުރިހާ ކަމެއް އަދި އާއްމުންނަށް ހާމައެއް ނުކުރަން. ހާސިލްވި ކަންކަން ފަހުން ހާމަކުރަމުން ދާނަން،" އޭނާ ވިދާޅުވި ކަމަށް ބީބީސީގައި ވެ އެވެ.
ހަމާސްގެ އެންމެ އިސް ސިޔާސީ ލީޑަރު އިސްމާއިލް ހަނިއްޔާ ވިދާޅުވީ މި ނިމުނު ހަމަލާ ބަދަލު ކުރުމުން އަންގައިދެނީ މަޝްވަރާކޮށްގެން ހައްލެއް ހޯދުމަކީ ބިލާހެއް ކަމެވެ. އަދި ފަލަސްތީނަށް މިނިވަންކަން ލިބެން އޮތް އެންމެ ރަނގަޅު ސްޓްރެޓެޖިކް ވިސްނުމަކީ އަޅުވެތިކަމާ ދެކޮޅަށް ތެދުވުން ކަމުގައި ވިދާޅުވި އެވެ.
"އަޅުގަނޑުމެން، ގްރޫޕެއްގެ ގޮތުގައި، އަދި ގްރޫޕުގެ ލީޑަރުންނާއި، ގާޒާގެ ހުރިހާ ރައްޔިތުންނާއި ފަލަސްތީނުގެ ރައްޔިތުންނާއި ދުނިޔޭގެ އެހެން ރައްޔިތުން ގުޅިގެން ގާޒާ އަލުން ބިނާ ކުރާނަން،" އޭނާ ވިދާޅުވި އެވެ.
އިޒްރޭލުގެ ވައިގެ ހަމަލާއެއްގައި ގާޒާގައި ގެއްލުނު ލިބުނު ފިހާރައެއްގެ ބޭރު.-- ފޮޓޯ ގެޓީ އިމޭޖަޒް
އިޒްރޭލުގެ މިސައިލް ހަމަލާއެއްގައި ގާޒާގެ އަލް ޖަލާ ޓަވަރު ބިމާ ހަމަކޮށްލާފައި.-- ފޮޓޯ: އީޕީއޭ
ހަމާސްގެ ރޮކެޓް ހަމަލާއެއްގައި އިޒްރޭލުގެ ގެޔަކަށް ގެއްލުންވެފައި.-- ފޮޓޯ: ރޮއިޓާޒް
ހަމާސްގެ ރޮކެޓު ހަމަލާއެއްގެ ސަބަބުން ދެކުނު އިޒްރޭލުގައި ހުރި ތެޔޮ ރައްކާ ކުރާ ފެސިލިޓީއެއްގައި ރޯވެފައި.-- ފޮޓޯ: މެކްސާ ޓެކްނޮލޮޖީޒް
މިސްރު މެދުވެރިވެގެން އިޒްރޭލާއި ހަމާސްއިން ހަމަލާ ބަދަލު ކުރުން ހުއްޓާލުމުގެ އެއްބަސްވުމަކަށް އައުމުން ދުނިޔޭގެ ރައީސުންނާއި ބޮޑު ވަޒީރުން އަންނަނީ އެކަމަށް މަރުހަބާ ވިދާޅުވަމުންނެވެ.
ހަމަލާއާ ގުޅިގެން ބައެއް ގައުމުތަކުގެ ލީޑަރުން ތުހުމަތުގެ ނަޒަރަކުން ވިސްނާއިރު، ހުރިހާ ގައުމަކުން ވެސް އަންނީ ދާއިލީ ހައްލެއް ގެނެސް، މެދުއިރުމަތީގައި ސުލްހަ ގާއިމް ކުރުމަށް ބާރު އަޅަމުންނެވެ.
