އިޒްރޭލާއި ގާޒާއާ ދެމެދު ހަމަލާ ބަދަލުކުރުން ހުއްޓާލާފައި ވަނިކޮށް ގުދުސްގެ އޯލްޑް ސިޓީގައި ހުންނަ އަލް އަގްސާ މިސްކިތް ސަރަހައްދަށް ވަދެގަނެ އިޒްރޭލް ފުލުހުން ހަމަލާ ދޭން ފަށައިފި އެވެ.
މަންޒަރު ދުށް މީހުން އަލްޖަޒީރާ ނޫހަށް ބުނީ މިއަދުގެ ހުކުރު ނަމާދަށް ފަހު ގިނަ ބަޔަކު މިސްކިތުގައި މަޑު ކުރީ ފާއިތުވި 11 ދުވަހުގެ ހަމަލާ ބަދަލު ކުރުމަށް ފަހު ލިބުނު ކާމިޔާބީ ފާހަގަކުރަން ކަމަށެވެ.
މިދިޔަ ހަފްތާގެ ހޯމަ ދުވަހުން ފެށިގެން އިޒްރޭލާއި ގާޒާ ކޮންޓްރޯލް ކުރާ ހަމާސް ޖަމާއަތާ ދެމެދު ހުއްޓުމެއް ނެތި ހަމަލާ ބަދަލުކުރުމުން ފަލަސްތީނުގެ 232 މީހުން އަދި އިޒްރޭލުގެ 12 މީހުން މަރުވި އެވެ.
ބައިނަލްއަގްވާމީ ފަރާތްތަކުގެ ޕްރެޝަރާއެކު މިސްރުން ހުށަހެޅި ގޮތުގެ މަތިން ދެ ފަރާތުން ހަމަލާ ބަދަލު ކުރުން ހުއްޓާލީ ރޭ ދަންވަރު ގާޒާ ގަޑިން 02:00 ގަ އެވެ.
އެއާއެކު އިޒްރޭލާއި ހަމާސްއިން ވެސް އަންނަނީ ކާމިޔާބު ލިބިއްޖެ ކަމަށް ދައުވާ ކުރަމުންނެވެ. އަދި ފަލަސްތީނުގެ މީހުން އަންނަނީ ގާޒާ އާއި ހުޅަނގު އައްސޭރި އަދި ގުދުސްގައި އުފާފާޅުކުރަމުންނެވެ.
އަލްޖަޒީރާއިން ބުނީ މިސްކިތުގައި ތިބި މީހުން ނަމާދަށް ފަހު އުފާފާޅުކޮށް ލަވަކިޔަށް ފެށުމުން އިޒްރޭލު ފުލުހުން އެ ތަނަށް ވަދެގަނެ، ސްޓަން ގްރެނޭޑާއި ސްމޯކް ބޮން އަދި ކަރުނަ ގޭސް ބޭނުން ކުރަން ފެށީ ކަމަށެވެ.
އިޒްރޭލް ފުލުހުންގެ ތަރުޖަމާނު މިކީ ރޮޒެންފެލްޑް އޭއެފްޕީއަށް ވިދާޅުވީ ފުލުހުން ބާރުގެ ބޭނުން ކުރަން ޖެހުނީ މިސްކިތުގައި ތިބި މީހުން ގާ އުކަން ފެށުމުން ކަމަށެވެ.
އަގްސާ މިސްކިތުގެ އިތުރުން ފަލަސްތީނު މީހުން އުފާފާޅުކުރަން އެއްވަމުންދާ އެހެން ސަރަހައްދުތަކުގައި ވެސް އިޒްރޭލް ފުލުހުން އަންނަނީ ބާރުގެ ބޭނުންކޮށް، މީހުންނަށް އަނިޔާ ކުރަމުންނެވެ.
މިދިޔަ ހަފްތާގެ ހޯމަ ދުވަހު ގާޒާ އާއި އިޒްރޭލާ ދެމެދު ހަމަލާ ބަދަލު ކުރަން ފެށީ ރޯދަ މަހު އަގްސާ މިސްކިތުގައި ނަމާދު ކުރަން ހުރި ހުރަސްތަކާ ގުޅިގެން ހަމަނުޖެހުން ބޮޑުވެފައި ވަނިކޮށެވެ.
އޭގެ އިތުރުން ހުޅަނގު އައްސޭރީގެ ޝެއިހް ޖައްރާ ހިސާބުގައި އުޅޭ ފަލަސްތީނު މީހުން ގެތަކުން ނެރެން އުޅޭ މައްސަލަ ވެސް އޮތީ ބޮޑުވެފަ އެވެ.
