އިޒްރޭލާއި ގާޒާއާ ދެމެދު ފާއިތުވި 11 ދުވަހު ހުއްޓުމެއް ނެތި ހިންގި ހަމަލާ ބަދަލު ކުރުންތައް ނިމުމަކަށް ގެނެސްފި އެވެ.
އިޒްރޭލާއި ގާޒާ ކޮންޓްރޯލްކުރާ ހަމާސްއިން ވެސް ވަނީ އެކަން ކަށަވަރުކޮށްދީފަ އެވެ. ހަމަލާތައް ނިމުމަކަށް އައިއިރު، ފަލަސްތީނުގެ 232 މީހުން މަރުވެފައިވެ އެވެ. އިޒްރޭލުން މަރުވީ 12 މީހުންނެވެ.
ދެ ފަރާތުން އެއްބަސްވީ ގޮތަށް ހަމަލާތައް ހުއްޓާލީ ހުކުރު ދުވަހުގެ ދަންވަރު ގާޒާ ގަޑިން 02:00 ގަ އެވެ. ހަމަލާތައް ހުއްޓާލީ މިސްރު މެދުވެރިވެގެން ބޭއްވި މަޝްވަރާތަކަށް ފަހު އެވެ.
އިޒްރޭލުގެ ބޮޑުވަޒީރު ބެންޖަމިން ނަތަންޔާހޫގެ އޮފީހުން ނެރުނު ބަޔާނެއްގައި ބުނީ އެއްވެސް ޝަރުތެއް ނެތި ހަމަލާ ހުއްޓާލަން މިސްރުން ހުށަހެޅި ގޮތަށް އިޒްރޭލުގެ ސެކުއިރިޓީ ކެބިނެޓުން އެއްބަސްވެފައިވާ ކަމަށެވެ.
ހަމާސް ޖަމާއަތުން ނެރުނު ބަޔާނެއްގައި ވެސް ބުނީ ދަންވަރު 02:00 އިން ފެށިގެން ހަމަލާތައް ހުއްޓާނެ ކަމަށެވެ. އެ ހަބަރާއެކު ފަލަސްތީނުގެ އެތައް ހާސް ބަޔަކު ދަނީ ގާޒާ އާއި ހުޅަނގު އައްސޭރި އަދި އިރުމަތީ ގުދުސްގެ މަގުތަކަށް ނިކުމެ އުފާފާޅުކުރަމުންނެވެ.
ކާމިޔާބު ލިބުނުކަން އަންގައިދޭ ދިދަތަކާއެކު ފަލަސްތީނު މީހުން އުފާފާޅުކުރާއިރު، ހަމާސް ޖަމާއަތުން ވެސް ދެކެނީ މިއީ އިޒްރޭލާ ދެކޮޅަށް ލިބުނު ބޮޑު ކާމިޔާބެއްގެ ގޮތުގަ އެވެ.
އޭއެފްޕީއަށް ދިން އިންޓަވިއުއެއްގައި ހަމާސްގެ ސިޔާސީ އޮފީހުގެ ދެ ވަނައަށް އެންމެ އިސް އޮފިޝަލް ހަލީލް އަލް ހައްޔާ ވިދާޅުވީ މިއީ ލިބުނު ނަސްރެއް ކަމަށާއި ގެއްލުން ލިބުނު ގެތައް މަރާމާތު ކުރަން އެހީވާނެ ކަމަށެވެ.
ގާޒާ އާއި އިޒްރޭލާ ދެމެދު ހަމަލާ ބަދަލު ކުރަން ފެށީ ނިމުނު ރޯދަ މަހު އަގްސާ މިސްކިތުގައި ނަމާދު ކުރަން ހުރި ހުރަސްތަކާ ގުޅިގެން ހަމަނުޖެހުން ބޮޑުވެފައި ވަނިކޮށެވެ. އޭގެ އިތުރުން ހުޅަނގު އައްސޭރީގެ ޝެއިހް ޖައްރާ ހިސާބުގައި އުޅޭ ފަލަސްތީނު މީހުން ގެތަކުން ނެރެން އުޅޭ މައްސަލަ ވެސް އޮތީ ބޮޑުވެފަ އެވެ.
