ލަންޑަން (މެއި 21) - ބާސެލޯނާގެ ކެޕްޓަން ލިއޮނަލް މެސީ އާއި ޔުވެންޓަސްގެ ތަރި ކްރިސްޓިއާނޯ ރޮނާލްޑޯ އެ ހުރި ލެވަލަށް ދިއުމަކީ އަބަދު ވެސް އަމާޒެއް ކަމަށް މި ސީޒަނަށް ފަހު ޓޮޓެންހަމް ދޫކޮށްލަން ނިންމާފައިވާ އިނގިރޭސި ފޯވާޑް ހެރީ ކޭން ބުނެފި އެވެ.
އުމުރުން 27 އަހަރުގެ ކޭން ވަނީ ޓޮޓެންހަމް ދޫކޮށްލަން ނިންމާފައިވާކަން އެ ކްލަބްގެ ވެރިންގެ ސަމާލުކަމަށް ގެނެސްފަ އެވެ. ކޭން ޓޮޓެންހަމްގެ ކޮންޓްރެކްޓްގައި ހުރީ 2024 ވަނަ އަހަރުގެ ޖޫންގެ ނިޔަލަށް ކަމުގައި ވިޔަސް އޭނާ އެދެނީ ކެރިއަރަށް ވިސްނާފައި މި ސީޒަން ނިމުމުން ޓީމު ބަދަލުކުރާށެވެ. އެއީ ޓޮޓެންހަމްގައި ހުރެ މިހާތަނަށް ތަށްޓެއްގައި އަތްލުމުގެ ނަސީބު ލިބިފައިނުވާއިރު، އެކަން ހާސިލްކުރަން ބޭނުންވާތީ އެވެ.
"އަހަރެން ބިރެއް ނުގަނޭ އަހަރެން ބޭނުންވަނީ އެންމެ މޮޅު ކުޅުންތެރިޔާ އަށް ވާށޭ ބުނަން. އަހަރެން ވަރަށް ބޭނުން މެސީ އާއި ރޮނާލްޑޯ އެ ހުރި ލެވަލަށް ދާން. އެއީ އަހަރެންގެ އެންމެ ބޮޑު އަމާޒު. ކޮންމެ ސީޒަނެއްގައި ތަށްޓައް ވާދަކުރުމާއި ކޮންމެ ސީޒަނެއްގައި 50، 60 ނޫނީ 70 ގޯލު ޖަހަން،" ގެރީ ނެވިލްގެ ޔޫޓިއުބް ޝޯ ދި އޯވަލެޕްގައި ވާހަކަ ދައްކަމުން ކޭން ބުންޏެވެ.
"އެހެން މީހަކު އަހަންނަށް ކުރާ ޕްރެޝަރަށް ވުރެ އަހަރެން އަމިއްލަ ނަފްސަށް ކުރާ ޗެލެންޖް ބޮޑުވާނެ،"
ޗެމްޕިއަންސް ލީގުގެ މެޗެއްގެ ތެރެއިން ކޭން (ކ) އާއި ރޮނާލްޑޯ ސަލާމްކުރަނީ.
މީގެ ކުރިން ދެ ފަހަރެއްގެ މަތިން ކޭން ޓޮޓެންހަމް ދޫކޮށްލުމުގެ ވިސްނުން ގެންގުޅުނު ނަމަވެސް ރަސްމީ ސިފައެއްގައި ކްލަބްގެ އިސް ފަރާތްތަކަށް އެކަން ހިއްސާކޮށްފައެއް ނުވެ އެވެ. އެހެން ކަމުން މިއީ ކޭން ޓޮޓެންހަމް ދޫކޮށްލަން ބޭނުންވާކަން މި ގޮތަށް އެންގި ފުރަތަމަ ފަހަރެވެ. ކޭން ވަނީ މުސްތަގުބަލާ ބެހޭގޮތުން ޓޮޓެންހަމްގެ ޗެއާމަން ޑެނިއަލް ލީވީއާ ވާހަކަ ދައްކަން ނިންމައިފަ އެވެ.
"އަހަރެން އެއްވެސް އިރެއްގައި ނުބުނަން މުޅި ކެރިއަރު އެއްކޮށް ނިންމާލާނީ ޓޮޓެންހަމްގައި ހުރެފައޭ. އަހަންނެއް ނުބުނަން އަހަރެން ޓޮޓެންހަމް ދޫކޮށްލާނަމެކޭ ވެސް. މީހުން ކިޔާނެ އަހަރެން މި ހުރީ ޓްރޮފީއެއް ހޯދާ ޓީމަކާ ގުޅެން ފެންބޮވައިގަނެފައޭ. އެހެނެއް ނޫން. އަހަރެން އަދި ކެރިއަރުގައި ވަރަށް ގިނަ ކަންތައްތަކެއް ހާސިލްކުރަން ބޭނުން،" ޓޮޓެންހަމްގައި ހުރެ މިހާތަނަށް ތިން ފައިނަލަކުން ބަލިވެފައިވާ ކޭން ބުންޏެވެ.
"ޗެއާމަން ވިސްނަނީ ކިހިނެއް ކަމެއް އަަހަންނަށް ނޭނގެ. އޭނަ ބޭނުންވެދާނެ އަހަރެން 100 މިލިއަން ޕައުންޑަށް ވިއްކާލަން. އެކަމަކު އެއީ ކުރިއަށް އޮތް ދެތިން އަހަރު ތެރޭ އަހަރެންގެ އަގު ކަަމަށް ނުވެދާނެ. އަހަރެންގެ ދިރިއުޅުމުގެ ވަރަށް މުހިއްމު 16 އަހަރު މި ޓީމަށް (ޓޮޓެންހަމް) ދީފިން. ވަރަށް ތެދުވެރިކަމާ އެކު މުސްތަގުބަލާ ބެހޭގޮތުން ކްލަބާ ވާހަކަ ދައްކަން ބޭނުން،"
ރިޕޯޓްތައް ބުނާގޮތުން ކޭން ވަނީ އަންނަ މަހުގެ 11 ވަނަ ދުވަހު ފަށާ ޔޫރޯ ފުޓްބޯޅަ މުބާރާުުތުގެ ކުރިން މުސްތަގުބަލާ ބެހޭގޮތުން ގޮތެއް ނިންމައިދޭން އޭނާގެ އޭޖެންޓް އަދި ޓޮޓެންހަމްގެ ކައިިރިން މީގެ ކުރިން އެދިފަ އެވެ. އަދި އެކަން ޗެއާމަން ލީވީ އަށް ވެސް ވަރަށް ރަނގަޅަށް ކިޔައިދޭން ކޭން ބޭނުންވެ އެވެ.
އިނގިރޭސި ޕްރިމިއާ ލީގުގެ ރަން ބޫޓު ދެ ފަހަރެއްގެ މަތިން ހޯދައި އަދި މި ފަހަރު ވެސް ލަނޑު ލިސްޓުގެ ކުރީގައި އޮތް ކޭން ގެންދަން އެންމެ ބޮޑަށް މަސައްކަތްކުރަނީ މެންޗެސްޓާ ސިޓީންނެވެ. ސިޓީގެ އިތުރުން މެންޗެސްޓާ ޔުނައިޓެޑް ވެސް އެ ރޭހުގައި ވާދަކުރެ އެވެ. ކޭންގެ ވިސްނުން ބޮޑަށް ހުރީ ޓޮޓެންހަމް ދޫކޮށްލުމަށް ފަހު ޕްރިމިއާ ލީގުގެ ޓީމަކާ ގުޅޭށެވެ.
