ގެވެށި އަނިޔާގެ ސީރިއަސް ތުހުމަތުތަކެއް ކުރެވޭ، ކެނދިކުޅުދޫ ދާއިރާގެ މެމްބަރު އަހުމަދު އީސަގެ ތަހުގީގު ނިމެންދެން ގައުމީ މަޖިލީހުންނާއި، ޕާޓީގެ އެތެރޭގެ ކޮމެޓީތަކުގެ މުގައްރިރުކަމުން އޭނާ އެކަހެރިކުރުމަށް އެމްޑީޕީން މިއަދު ނިންމައިފި އެވެ.
އީސަގެ އަމަލު ކުށްވެރިކޮށް އެމްޑީޕީން ނެރުނު ބަޔާނެއްގައި ބުނީ އޭނާގެ މައްޗަށް ތުހުމަތުކުރެވޭ އެ އަމަލާ މެދު ކަންބޮޑުވެ، އެކަން ހަރުއަޑުން ކުށްވެރިކުރާ ކަމަށެވެ. އަދި އެ މައްސަލައިގައި އިންސާފުވެރި ފުރިހަމަ ޖިނާއީ ތަހުގީގެއް އަވަހަށް ހިންގައި ދިނުމަށް ކަމާބެހޭ އިދާރާތަކަށް އެ ޕާޓީން ގޮވާލި އެވެ.
"ގެވެށިއަނިޔާއާއި ނުވަތަ އެއްވެސް ބާވަތެއްގެ ލާއިންސާނީ އަނިޔާ އާއި އިންސާނީ ކަރާމަތަށް އުނިކަން އަންނަ ދަށުދަރަޖައިގެ އަމަލުތަކަކީ މި ޕާޓީން އެއްގޮތަކަށް ވެސް ޓޮލަރޭޓްކުރާނޭ އަމަލުތަކެއް ނޫން،" ބަޔާނުގައިވެ އެވެ.
ރައްޔިތުންގެ މަޖިލީހުގައި އީސަ ތަމްސީލު ކުރައްވާ ކޮމެޓީތަކުގެ މުގައްރިރުކަމުން އޭނާ އެކަހެރިކުރުމަށް އެމްޑީޕީގެ ޕާލަމެންޓްރީ ގްރޫޕުގައި އިލްތިމާސްކުރުމަށް ވެސް އެ ޕާޓީން ވަނީ ނިންމައިފަ އެވެ.
އިޖުތިމާއީ ކޮމެޓީގެ މުގައްރިރުކަން ކުރައްވާ އީސަ އެ މަގާމުން ވަކިކުރަން ނިންމާފައި ވަނިކޮށް އޭނާ ވަނީ އިސްތިއުފާ ދެއްވައިފަ އެވެ.
"އީސަގެ މައްޗަށް ތުހުމަތުކުރެވޭ މައްސަލައާ ގުޅިގެން، ވަގުތުން އެޅެން ހުރި ފިޔަވަޅުތަކާ މެދުގައާއި އަދި ޖިނާއީ ތަހުގީގު ހިނގާ ގޮތް ގާތުން ބެލުމުގެ މަސައްކަތް އެމްޑީޕީގެ މެޖޯރިޓީ އޮންނަ ރައްޔިތުންގެ މަޖިލީހުގެ ކަމާ ގުޅުން ހުރި ކޮމެޓީތަކުން މިހާރު ވެސް ފަށާފައިވާކަން ފާހަގަކުރަން،" ބަޔާނުގައިވެ އެވެ.
އީސައާ ދެކޮޅަށް މައްސަލަ ހުށަހެޅުއްވީ ކުރީގެ އަނބިކަބަލުން އަސްރާ ނަސީމެވެ. އެ މައްސަލައިގެ ތަހުގީގަށް ފުލުހުންނަށް ބަޔާން ދެއްވުމަށް ފަހު އަސްރާ ފޭސްބުކްގައި ލިއުއްވި ގޮތުގައި އަނިޔާގެ އެ ތަޖުރިބާއަކީ ދުވަހަކު ވެސް ކުރިމަތިވެދާނެ ކަމަށް ހީކުރެއްވި ކަމެއް ނޫން ކަަމަށެވެ.
އޭނާ އާއި ދެ އަހަރު ނުވާ ދަރިފުޅަށް އަނިޔާކުރި ކަމަށް ވަނީ އިއްޔެ ރޭ ދަންވަރެވެ.
އަސްރާ ވިދާޅުވި ގޮތުގައި ވޭތުވެދިޔަ 24 ގަޑިއިރަކީ އޭނާ އާއި ދަރިފުޅަށް އުނދަގޫ އިހްސާސްތަކެއް ކުރަން ޖެހުނު ވަގުތެކެވެ. އެކަމަކު މިހާރު ދެމައިންގެ ވެސް ހާލު ރަނގަޅު ކަމަށް ވިދާޅުވި އެވެ.
އޭނާގެ ގާތް މީހަކު "އަދަދު"އަށް ކިޔައިދިން ގޮތުގައި، އަސްރާގެ ކޮނޑުހުޅާއި އަތަށް ވަނީ އަނިޔާ ލިބިފަ އެވެ. އަދި އެންމެ ބޮޑު ހިތްދަތިކަމަކީ ދަރިކަލުންނަށް ކުރިމަތިވި "ބިރުވެރި ވަގުތުކޮޅު" ކަމަށް ވެސް އޭނާ ބުންޏެވެ.
އީސަ މިއަދު ނެރުނު ބަޔާނެއްގައިވަނީ އޭނާގެ މައްޗަށް ކުރެވޭ ތުހުމަތުތައް ދޮގު ކުރައްވައިފަ އެވެ.
"ދިވެހިރާއްޖޭގެ ގާނޫނުތަކާއި ގަވާއިދުތަކާ ހިލާފު އެއްވެސް އަމަލެއް އަޅުގަނޑު ކޮށްފައި ނުވާނެ ކަމުގެ ޔަގީންކަން އެންމެހާ ރައްޔިތުންނަށް އަދި ހާއްސަކޮށް ކެނދިކުޅުދޫ ދާއިރާގެ ލޮބުވެތި ރައްޔިތުންނަށް އަރުވަމެވެ،" ބަޔާނުގައި ވިދާޅުވި އެވެ.
އެ މައްސަލައާ ގުޅިގެން އީސަ ހައްޔަރު ކުރުމުގެ އަމުރަކަށް ޕްރޮސިކިއުޓާ ޖެނެރަލް ވަނީ ކޯޓުގައި އެދިފަ އެވެ.
