ޗައިނާއިން މި ހަފްތާގައި މާސްއަށް ފޮނުވި ޝުރޮންގް ޖައްވީ އުޅަނދުން ނެގި އެ ޕްލެނެޓުގެ ފުރަތަމަ ފޮޓޯތައް އާއްމުކޮށްފި އެވެ.
ރޮބޮޓުގެ ފްރަންޓް ކެމެރާ ފޮޓޯއިން ފެންނަނީ ލޭންޑިން ޕްލެޓްފޯމުގައި އޭތި މަޑުކޮށްގެން އިން އިރު، ކުރިމަތީގައިވާ މާސްގެ ވެލިގަނޑެވެ. އަދި އެ ރޮބޮޓުގެ ފަހަތުގައިވާ ރިއާ ކެމެރާއިން ފެންނަނީ އެއަށް ހަކަތަ ދިނުމަށް ބޭނުން ކުރާ ސޯލާ ޕެނަލްތަކެވެ.
ޝުރޮންގް ރޮބޮޓުގެ ފްރަންޓް ވިއު.-- ފޮޓޯ: ސީއެންއެސްއޭ
ޝުރޮންގް ރޮބޮޓުގެ ރިއާ ވިއު.-- ފޮޓޯ: ސީއެންއެސްއޭ
ހަ ފުރޮޅުލީ ޝުރޮންގް ރޮބޮޓް ތިރި ކުރީ މާސްގެ އުތުރުގައިވާ ޔޫޓޯޕިއާ ޕްލެނީޝިއާ ކިޔާ ހިސާބަކަށެވެ. އޭތި މާސްގެ ބިމުގައި ޖެއްސީ ކެޕްސޫލަކާއި، ޕެރެޝޫޓެއް އަދި ރޮކެޓް ޕްލެޓްފޯމެއްގެ އެހީ ގަ އެވެ.
މާސްގެ ބިމަށް ތިރި ކުރުމަކީ ވަރަށް އުނދަގޫ ކަމަކަށް ވާތީ މިއީ ޗައިނާގެ ޖައްވީ އޮޕަރޭޝަންތަކަށް ލިބުނު ބޮޑު ކާމިޔާބެއްގެ ގޮތުގައި އަންނަނީ ފާހަގަކުރަމުންނެވެ.
މީގެ ކުރިން މާސްގެ ބިމުގައި އުޅަނދެއް ޖައްސާފައިވަނީ އެމެރިކާއިން އެކަންޏެވެ. އެހެންކަމުން ޗައިނާ މިއީ މާސްއަށް އުޅަނދެއް ފޮނުވި ދެ ވަނަ ގައުމެވެ.
އެކަން ކާމިޔާބުވުމުން ރައީސް ޝީ ޖިންޕިން ވަނީ އެ މަސައްކަތުގައި އުޅޭ ޓީމަށް މަރުހަބާ ވިދާޅުވެ، ގައުމަށް ހޯދައިދިން ރީތި ނަމަށް ތައުރީފު ކުރައްވައިފަ އެވެ.
މާސްގެ ބިމަށް ތިރި ކުރި ޝުރޮންގް ރޮބޮޓު ބޭނުންކޮށްގެން ސައިންޓިސްޓުން މަސައްކަތް ކުރާނީ މަދުވެގެން 90 ދުވަސް ވަންދެން އެ ތަނުގައި އޭތި ދުއްވާ، މާސްގެ ބިމާ ގުޅޭ މައުލޫމާތު އެއް ކުރުމަށެވެ. މާސްގައި އެއް ދުވަހުގެ ދިގުމިނަކީ 24 ގަޑިއިރާއި 39 މިނެޓެވެ.
ރޮބޮޓުން ނެގި ފުރަތަމަ ފޮޓޯތައް އާއްމުކުރީ ޗައިނާގެ ނޭޝަނަލް ސްޕޭސް އެޑްމިނިސްޓްރޭޝަން (ސީއެންއެސްއޭ) ގެ ވެބްސައިޓުގަ އެވެ.
ޝުރޮންގް ރޮބޮޓް މާސްއަށް ފޮނުވީ މިދިޔަ ފެބްރުއަރީ މަހު އެ ޕްލެނެޓުގެ އޯބިޓަށް ޗައިނާއިން ފޮނުވި ޓިއަންވެން-1 އޯބިޓާ ގަ އެވެ.
ޗައިނާއިން މާސްއަށް ފޮނުވި ރޮބޮޓާއި އެމެރިކާގެ ޖައްވީ އިދާރާ، ނާސާއިން މީގެ ކުރިން މާސްއަށް ފޮނުވި އުޅަނދުތަކާ ދާދި އެއް ގޮތެވެ. ޝުރޮންގްގެ ބަރުދަނުގައި 240 ކިލޯ ހުރެ އެވެ. އެއަށް ހަކަތަ ލިބެނީ ސޯލާ ޕެނެލް ބޭނުންކޮށްގެންނެވެ.
އޭގައި ހަރުކޮށްފައިވާ ދިގު ދަނޑިއެއް ކަހަލަ އެއްޗެއްގައި ކެމެރާއެއް އިނދެ އެވެ. ކެމެރާއިން އެހީވާނީ އުޅަނދު ދުއްވުމަށާއި ފޮޓޯ ނެގުމަށެވެ. މާސްގެ ބިމުގައިވާ ވެއްޔާއި ގާ އަދި ފެން ނުވަތަ ގަނޑުފެން ފަދަ ތަކެތި ދިރާސާ ކުރަން އިތުރު ފަސް އާލާތް އޭގައި ހިމެނެ އެވެ.
އެމެރިކާއިން މިދިޔަ ފެބްރުއަރީ މަހު މާސްގެ ބިމުގައި ޖެއްސި ޕޭސިވެރަންސް އަދި ކިޔުރިއޮސިޓީ ރޮބޮޓުތައް ވެސް އަންނަނީ އެ ޕްލެނެޓުގެ ގިނަ ފޮޓޯތަކެއް ނަގައި ދިރާސާތައް ކުރަމުންނެވެ.
ޔޫރަޕުން މީގެ ކުރިން ދެ ފަހަރަކު މާސްއަށް ރޮބޮޓު ފޮނުވަން އުޅެ، ކާމިޔާބުވެފައެއް ނުވެ އެވެ. ރަޝިއާ އާއި ޔޫރަޕްގެ ޖައްވީ އިދާރާ ގުޅިގެން މިހާރު މަސައްކަތް ކުރަނީ ރޮސަލިންޑް ފްރެންކްލިން ނަމަކަށް ކިޔާ ކުޑަ ރޮބޮޓެއް އަންނަ އަހަރު މާސްއަށް ފޮނުވުމަށެވެ.
