ކުރިއަށް އޮތް ދެ ތިން ދުވަހުގެ ތެރޭގައި އިޒްރޭލާއި ގާޒާގެ ހަމަލާ ބަދަލުކުރުންތައް ހުއްޓާލުމުގެ އެއްބަސްވުމަކަށް އާދެވުމުގެ އުއްމީދު އެބަ އޮތް ކަމަށް ގާޒާ ކޮންޓްރޯލް ކުރާ ހަމާސް ގްރޫޕްގެ އިސް އޮފިޝަލަކު ވިދާޅުވެއްޖެ އެވެ.
ހަމާސްގެ އިސް އޮފިޝަލަކު މިއަދު އެހެން ވިދާޅުވި ނަމަވެސް، އިއްޔެ ވެސް އިޒްރޭލުގެ ބޮޑުވަޒީރު ބެންޖަމިން ނަތަންޔާހޫ ތަކުރާރުކޮށް ވިދާޅުވީ ގާޒާއިން އަންނަ ހަމަލާތައް ހުއްޓުވެންދެން އިޒްރޭލުން މެދުކެނޑުމެއް ނެތި ހަމަލާ ދޭނެ ކަމަށެވެ.
ހަމާސްގެ އޮފިޝަލް މޫސާ އަބޫ މަރްޒޫގް ލުބްނާންގެ އަލް މަޔާދީން ޓީވީ ޗެނަލަށް ވިދާޅުވީ ހަމަލާތައް ހުއްޓުވުމުގެ ގޮތުން މިހާރު ކުރަމުންދާ މަސައްކަތްތައް ކާމިޔާބުވުމުގެ ފުރުސަތު ބޮޑު ކަމަށެވެ.
"އަޅުގަނޑަށް ބެލެވެނީ ކުރިއަށް އޮތް ދެ ތިން ދުވަހުގެ ތެރޭގައި ހަމަލާތައް ހުއްޓާނެ ކަމަށް. އަދި ހަމަލާ ހުއްޓާނީ ދެ ފަރާތަށް އެއްބަސްވެވޭ ކަންތައްތަކެއްގެ މަތިން،" އޭނާ ވިދާޅުވި އެވެ.
މިއަދު ހެނދުނު ވެސް ގާޒާގެ އުތުރުގެ ސަރަހައްދުތަކަށް އިޒްރޭލުން 100 އަށް ވުރެ ގިނަ ވައިގެ ހަމަލާ ދިނެވެ. ހަމާސްގެ މެމްބަަރުން ރައްދުގައި އިޒްރޭލަށް ރޮކެޓު ހަމަލާ ފޮނުވަމުން ދިޔަ އެވެ.
ގާޒާ އާއި އިޒްރޭލާ ދެމެދު ހަމަލާ ބަދަލު ކުރަން ފެށީ ނިމުނު ރޯދަ މަހު އަގްސާ މިސްކިތުގައި ނަމާދު ކުރަން ހުރި ހުރަސްތަކާ ގުޅިގެން ހަމަނުޖެހުން ބޮޑުވެފައި ވަނިކޮށެވެ. އޭގެ އިތުރުން ހުޅަނގު އައްސޭރީގެ ޝެއިހް ޖައްރާ ހިސާބުގައި އުޅޭ ފަލަސްތީނު މީހުން ގެތަކުން ނެރެން އުޅޭ މައްސަލަ ވެސް އޮތީ ބޮޑުވެފަ އެވެ.
ހަމަލާތައް ފެށި ފަހުން މިއަދަށް 11 ދުވަސް ފުރިފައި ވާއިރު، މިހާތަނަށް ފަލަސްތީނުގެ 227 މީހުން ވަނީ މަރުވެފަ އެވެ. އޭގެ ތެރޭގައި 61 ކުދިން ހިމެނެ އެވެ. އިޒްރޭލުން މަރުވީ ދެ ކުދިންނާ އެކު 12 މީހުންނެވެ.
