ރޭ ދަންވަރު ފަންސަވީސް މިނެޓުގެ ތެރޭގައި އިޒްރޭލު އަސްކަރިއްޔާއިން ގާޒާއަށް 122 ބޮން އެޅި ކަމަށް ޓައިމްސް އޮފް އިޒްރޭލް ނޫހުން ރިޕޯޓުކޮށްފި އެވެ.
ގާޒާ ގަޑިން ރޭ 10:00 ޖެހިއިރު ބޮން އަޅަން ފެށީ ބިމު އަޑީގައިވާ ހަމާސްގެ މަގުތަކަށް އަމާޒުކޮށެވެ. ފަތިސްވި އިރު ވެސް އިރުއިރުކޮޅާ ދިޔެއީ ބޮން އަޅަމުންނެވެ.
އެ ހަމަލާތަކުގައި ހަތަރު މީހަކު މަރުވިއިރު، އޭގެ ތެރޭގައި އަލް އަގްސާ ވޮއިސް ރޭޑިއޯގެ ނޫސްވެރިޔާ ޔޫސުފް އަބޫ ހުސެން ވެސް ހިމެނެ އެވެ.
އިޒްރޭލުން ދެމުންދާ އުދުވާނީ ހަމަލާތަކަށް މިއަދު 10 ދުވަސް ފުރިފައި ވާއިރު، މިހާތަނަށް ފަލަސްތީނުގެ 63 ކުޑަކުދިންނާއެކު 212 މީހުން ވަނީ މަރުވެފަ އެވެ.
ހަމަލާ ބަދަލުކުރުންތައް ހުއްޓާލުމަށް ބައިނަލްއަގްވާމީ މުޖުތަމައުއިން ގޮވާލި ނަމަވެސް އިޒްރޭލުން އެކަމަށް ދީފައި ވަނީ ބީރު ކަންފަތެކެވެ. އެކި ގައުމުތަކުގެ ވެރިން އަންނަނީ ހަމަލާތައް ހުއްޓުވުމަށް ޑިޕްލޮމެޓިކް މަސައްކަތްތައް ކުރައްވަމުންނެވެ.
އެގޮތުން މިސްރާއި އުރުދުންގެ މަޝްވަރާއާ އެކު ފްރާންސުން ވަނީ އދ. ގެ ސަލާމަތީ މަޖިލީހަށް ގަރާރެއްގެ ދެލިކޮޕީ ހުށަހަޅާފަ އެވެ. އެ ގަރާރުގައި އެންމެ އިސްކަމެއްގެ ގޮތުގައި ފާހަގަކޮށްފައިވަނީ ވަގުތުން ވަގުތަށް ހަމަލާ ބަދަލު ކުރުން ހުއްޓާލުމެވެ.
ހަމަލާ ބަދަލު ކުރުން ހުއްޓާލަން ގޮވާލާ އދ. ގެ ސަލާމަތީ މަޖިލީހުން ބަޔާން ނެރުމަށް މީގެ ކުރިން ތިން ފަހަރު މަސައްކަތް ކުރުމުން ވެސް އެކަމަށް ހުރަސް އަޅާފައިވަނީ ވީޓޯ ކުރުމުގެ ބާރު ލިބިފައިވާ އެމެރިކާއިން އެކަންޏެވެ.
ނަމަވެސް, އެމެރިކާގެ އެތެރޭގައި ފިއްތުންތައް އިތުރުވެ، އިއްޔެ ރައީސް ޖޯ ބައިޑެން އެންމެ ފަހުން ވަނީ ހަމަލާތައް ހުއްޓާލަން އެދޭ ކަމަށް ވިދާޅުވެފަ އެވެ. އެކަމަކު އަމިއްލަ ދިފާއުގައި އިޒްރޭލަށް މަސައްކަތް ކުރެވޭނެ ކަމަށް ވެސް ވިދާޅުވި އެވެ.
