ވިލިމާލެއަށް ދިމާވެފައިވާ ބޯހިޔާވަހިކަމުގެ މައްސަލަ ހައްލު ކުރެވެން އޮތީ އެ އަވަށުގައި 10 ބުރިއަށް އިމާރާތް ކުރުމުގެ ހުއްދަ ދީގެން ކަމަށްވާތީ އެކަމަށްޓަކައި ކުރަން ޖެހޭ މަސައްކަތްތައް ކުރުމަށް މާލޭ ސިޓީ ކައުންސިލުން ނިންމައިފި އެވެ.
ވިލިމާލޭގައި މިހާރު އެންމެ އުސްކޮށް އިމާރާތް ކުރެވެނީ ހަ ބުރިއަށެވެ. އެ އުސޫލު ބަދަލު ކުރުމަކީ މޭޔަރު ޑރ. މުހައްމަދު މުއިއްޒުގެ ކެމްޕެއިން ވައުދެކެވެ.
ސިޓީ ކައުންސިލްގެ މަސައްކަތްތަކާ ގުޅޭގޮތުން ރޭ ނޫސްވެރިންނަށް މުއިއްޒު ވިދާޅުވީ ވިލިމާލޭ ގޯތީގެ ހާލަތު ވަރަށް ބޮޑަށް ގޯސްވެފައިވާތީ 10 ބުރިއަށް އިމާރާތް ކުރުމުގެ ހުއްދައަށް އެ އަވަށުގެ ރައްޔިތުން އެދޭ ކަމަށެވެ. ދިހަ ބުރިއަށް އިމާރާތް ކުރުމުގެ ހުއްދަ ލިބިގެން ނޫނީ ބޭންކްތަކުން އިމާރާތް ކުރުމަށް ލޯން ދޫ ނުކުރާ ކަމަށް މުއިއްޒު ވިދާޅުވި އެވެ.
"ގޯތި ބަހައިގެން އަދި ނުބަހާވިޔަސް އާއިލާ ބޮޑުވެގެން ގޮސް އިމާރާތް ނުކުރެވި ކުދި ތަންކޮޅުކޮޅުގައި ރައްޔިތުން ދިރިއުޅެމުން ދާއިރު އެ ގޯތީގައި އިމާރާތް ހެދޭނެ ގޮތެއް ލޯން ލިބޭނެ ގޮތެއް ނެތުމާ އެކީގައި، އެ އިމާރާތްތަކަށް ބެންކް ތަކުން ފައިނޭންސް ކޮށްދެނީ މަދުވެގެން 10 ބުރިއަށް ނެގޭވަރުގެ ގޮތެއް ހަމަޖެހިގެން ކަމަށް ވާތީ،" މުއިއްޒު ވިދާޅުވި އެވެ.
އެހެންވެ އެކަން ކުރުމަށް ކަމާ ބެހޭ ފަރާތްތަކަށް ހުށަހެޅުމަށް ކުރަން ޖެހޭ މަސައްކަތްތައް ކުރުމަށް ކައުންސިލްގެ އިއްތިފާގުން ފާސް ކޮށްފައިވާ ކަމަށް މުއިއްޒު ވިދާޅުވި އެވެ.
މުއިއްޒު ވިދާޅުވީ އެކަން ކުރުމަށް ރައްޔިތުންނާއި ޕްލޭނިން ދާއިރާގެ ތަޖުރިބާކާރުންގެ ހިޔާލު ހޯދަން ނިންމާފައިވާ ކަމަށެވެ. ގާނޫނީ ގޮތުން ވެސް ލަފާ ހޯދައި ގަވައިދަށް ގެންނަން ޖެހޭ އިސްލާހު ކަމާބެހޭ ފަރާތްތަކަށް ފޮނުވާނެ ކަމަށް މުއިއްޒު ވިދާޅުވި އެވެ.
މާލޭގެ ފަސް ވަނަ އަވަށް، ވިލިމާލެއަކީ ހިތް ފަސޭހަ ތަނެކެވެ. ބޮޑެތި އިމާރާތްތަކެއް އަޅަން ހުއްދަ ދޭ ހިސާބުން އެ ރަށުގެ ހިތްގައިމުކަން ގެއްލިދާނެތީ ވެސް ބައެއް މީހުންގެ ކަންބޮޑުވުން އެބައޮތެވެ.
