ފާއިތުވި ނުވަ ދުވަހު މެދުކެނޑުމެއް ނެތި ގާޒާއަށް ބޮން އަޅަމުން ދިޔުމުގެ ސަބަބުން ހަމާސް ގްރޫޕަށް ފޫނުބެއްދޭ ވަރުގެ ގެއްލުންތަކެއް ވެފައިވާ ކަމަށް އިޒްރޭލުގެ ބޮޑު ވަޒީރު ބެންޖަމިން ނަތަންޔާހޫ ވިދާޅުވެއްޖެ އެވެ.
ނަތަންޔާހޫ އިޒްރޭލުން ދޫދޭން ބޭނުން ނުވާ ކަމަށާއި އިޒްރޭލު ރައްޔިތުން ރައްކާތެރި ކުރުމަށް ކުރަން ޖެހުނު ކޮންމެ ކަމެއް ކުރާނެ ކަމަށެވެ. އަދި ހާލަތު އަމާން ވަންދެން ހުއްޓުމެއް ނެތި ހަމަލާދެމުން ދާނެ ކަމަށް އަނެއްކާވެސް ތަކުރާރުކޮށް ވިދާޅުވި އެވެ.
މިދިޔަ ހަފްތާގެ ހޯމަ ދުވަހުން ފެށިގެން އިޒްރޭލުން އަންނަނީ ގާޒާއަށް ބޮން އަޅަމުންނެވެ. ގާޒާގައި ވެރިކަން ކުރާ ހަމާސްއިން ރައްދުގައި ދަނީ އިޒްރޭލަށް ރޮކެޓު ހަމަލާތައް ފޮނުވަމުންނެވެ. ނަމަވެސް, ގިނަ ރޮކެޓުތައް އިޒްރޭލަށް ފޯރުމުގެ ކުރިން "އަޔަން ޑޯމް" ސިސްޓަމުން އެ ހުއްޓުވަ އެވެ.
މިއަދާ ހަމައަށް ފަލަސްތީނުގެ 100 އަންހެނުންނާއި ކުޑަކުދިން ހިމެނޭ ގޮތަށް 215 މީހަކު ގާޒާއިން މަރުވެފައިވެ އެވެ. އިޒްރޭލުން މަރުވެފައި ވަނީ ދެ ކުޑަކުދިންނާއެކު ޖުމްލަ 12 މީހުންނެވެ.
ހަމަލާ ބަދަލުކުރުންތައް ހުއްޓާލުމަށް ބައިނަލްއަގްވާމީ މުޖުތަމައުއިން ގޮވާލި ނަމަވެސް އިޒްރޭލުން އެކަމަށް ދީފައި ވަނީ ބީރު ކަންފަތެކެވެ. އެކި ގައުމުތަކުގެ ވެރިން އަންނަނީ ހަމަލާތައް ހުއްޓުވުމަށް ޑިޕްލޮމެޓިކް މަސައްކަތްތައް ކުރައްވަމުންނެވެ.
އެގޮތުން މިސްރާއި އުރުދުންގެ މަޝްވަރާއާ އެކު ފްރާންސުން ވަނީ އދ. ގެ ސަލާމަތީ މަޖިލީހަށް ގަރާރެއްގެ ދެލިކޮޕީ ހުށަހަޅާފަ އެވެ. އެ ގަރާރުގައި އެންމެ އިސްކަމެއްގެ ގޮތުގައި ފާހަގަކޮށްފައިވަނީ ވަގުތުން ވަގުތަށް ހަމަލާ ބަދަލު ކުރުން ހުއްޓާލުމެވެ.
ހަމަލާ ބަދަލު ކުރުން ހުއްޓާލަން ގޮވާލާ އދ. ގެ ސަލާމަތީ މަޖިލީހުން ބަޔާން ނެރުމަށް މީގެ ކުރިން ތިން ފަހަރު މަސައްކަތް ކުރުމުން ވެސް އެކަމަށް ހުރަސް އަޅާފައިވަނީ ވީޓޯ ކުރުމުގެ ބާރު ލިބިފައިވާ އެމެރިކާއިން އެކަންޏެވެ.
ނަމަވެސް އެމެރިކާގެ އެތެރޭގައި ފިއްތުންތައް އިތުރުވެ، އިއްޔެ ރައީސް ޖޯ ބައިޑެން އެންމެ ފަހުން ވަނީ ހަމަލާތައް ހުއްޓާލަން އެދޭ ކަމަށް ވިދާޅުވެފަ އެވެ. އެކަމަކު އަމިއްލަ ދިފާއުގައި އިޒްރޭލަށް މަސައްކަތް ކުރެވޭނެ ކަމަށް ވެސް ވިދާޅުވި އެވެ.
