ޓްރަމްޕް އޯގަނައިޒޭޝަނާ ގުޅުން ހުރި ޖިނާއީ ތަހުގީގެއް ފަށައިގެން ކުރިއަށް ދާ ކަމަށް ނިއު ޔޯކުގެ ބަންޑާރަ ނައިބުގެ އޮފީހުން ބުނެފި އެވެ.
ނިއު ޔޯކު ބަންޑާރަ ނައިބު ލެޓީޓިއާ ޖޭމްސްގެ ތަރުޖަމާނު ވިދާޅުވީ މީގެ ކުރިން މަދަނީ ތަހުގީގެއް ހިންގި ނަމަވެސް ޖިނާއީ ތަހުގީގަކަށް މިހާރު ބަދަލުވެފައިވާ ކަމަށެވެ.
ތަހުގީގު ކުރަމުންދާ މައްސަލައަކީ ކުރީގެ ރައީސް ޑޮނަލްޓް ޓްރަމްޕް ރައީސްކަމަށް ވަޑައިގެންނެވުމުގެ ކުރިން ހިންގެވި ބައެއް މާލީ މުއާމަލާތްތަކުގެ މައްސަލަ އެވެ.
ޓްރަމްޕް އޯގަނައިޒޭޝަނަކީ 500 އަށް ވުރެ ގިނަ ވިޔަފާރި ހިމެނޭ ކުންފުންޏެކެވެ. އެ ތަންތަނުގެ އިސް ވެރިޔަކީ ޓްރަމްޕެވެ. ކުންފުނިން ގާނޫނާ ހިލާފު އެއްވެސް ކަމެއް ނުކުރާ ކަމަށް ބުނެފައިވެ އެވެ.
މާޗް 2019 ގައި މައްސަލަ އެންމެ ފުރަތަމަ ބަލަން ފެށީ ބޭންކުތަކުން ލޯނު ނަގާއިރު ޓްރަމްޕްގެ އަތުގައިވާ މުދަލުގެ އަގު މަތިކަމަށް ދައްކަން ދޮގު މައުލޫމާތު ފޯރުކޮށްދޭ ކަމަށާއި ޓެކްސް ދައްކަން ޖެހުމުން މުދަލުގެ އަގު ދަށްކަމަށް ހަދައި ދޮގު މައުލޫމާތު ފޯރުކޮށްދޭ ކަމުގެ ތުހުމަތާ އެކު އެވެ.
އޭގެ އިތުރުން ޓްރަމްޕްއާ ސިއްރު ލޯބީގެ ގުޅުންތަކެއް ހިންގި ކަމަށް ބުނާ ދެ އަންހެނަކަށް، އެ ވާހަކަތައް ހާމަނުކުރަން ޝަރުތުކޮށް 2016 ވަނަ އަހަރު ފައިސާތަކެއް ދިން ކަމަށް ތުހުމަތު ކުރެވޭތީ، ފައިސާ ދިނުމަށް ފަހުން އެކަން ފޮރުވަން މާލީ ރިކޯޑުތަކުގައި މަކަރު ހަދާފައިވޭތޯ ވެސް ދަނީ ބަލަމުންނެވެ.
