މާލޭ ސިޓީ ކައުންސިލްގެ ވަކި ޑިޕާޓްމެންޓެއް ހުޅުމާލޭގައި ގާއިމްކޮށް، އެޗްޑީސީގެ ހިދުމަތްތައް އެ ޑިޕާޓްމެންޓްގެ ދަށަށް ގެނައުމުގެ މަސައްކަތް ފަށައިފި އެވެ.
އެކަން އެގޮތަށް ކުރުމަށް ނިންމާފައިވަނީ އަލަށް އިންތިހާބުވި މާލޭ ސިޓީ ކައުންސިލްގެ ދެވަނަ ބައްދަލުވުމުގަ އެވެ.
މާލޭގެ މޭޔަރު ޑރ. މުހައްމަދު މުއިއްޒު ވިދާޅުވި ގޮތުގައި، މުނިސިޕަލް ހިދުމަތްތައް ދިނުމަށް ހުޅުމާލޭގައި ޑިޕާޓްމެންޓެއް ގާއިމް ކުރާނެ ކަމަށާއި، އެ ޑިޕާޓްމެންޓަށް އެޗްޑީސީން ދެމުންގެންދާ ހިދުމަތްތައް ބަދަލު ކުރުމަށް ވެސް ސަރުކާރާއެކު މަސައްކަތް ކުރައްވާނެ ކަމަށެވެ.
އޭނާ ވިދާޅުވި ގޮތުގައި، އެޗްޑީސީން ހިދުމަތް ދީފައި، އޭގެ ގާނޫނީ ޒިންމާ މާލޭ ސިޓީ ކައުންސިލުން އުފުލަން ޖެހޭ ގޮތަށް އޮތުމަކީ ހަމަޖެހޭ އުސޫލެއް ނޫން ކަމަށެވެ. އަދި، މާލޭ ސިޓީ ކައުންސިލަށް ރައްޔިތުންނަށް ޖަވާބުދާރީވެވޭނީ ވެސް އެ ކައުންސިލްގެ ކޮންޓްރޯލްގެ ދަށުން ހިދުމަތްތައް ދެވިގެން ކަމަށެވެ.
"އަޅުގަނޑުމެންގެ އުއްމީދަކީ އަދި ޔަގީން ވެސް ކުރަނީ ސަރުކާރުގެ ކަމާބެހޭ ހުރިހާ އިދާރާތަކުން އަދި އެޗްޑީސީން އެކަމަށް އެއްބާރުލުން ދޭނެ ކަމަށް،" މުއިއްޒު ވިދާޅުވި އެވެ.
"އަޅުގަނޑުމެން ބޭނުން ވަނީ ރައްޔިތުން ހަވާލުކުރި ޒިންމާ އޭގެ އެންމެ ފުރިހަމަ ގޮތުގައި އަވަސް މިނުގައި ރައްޔިތުންނަށް ފުއްދައިދޭން،"
ހުޅުމާލޭގެ އިތުރުން ވިލިމާލޭގައި ވެސް މުނިސިޕަލް ހުރިހާ ހިދުމަތްދޭ ޑިޕާޓްމެންޓެއް ގާއިމުރަން ވަނީ ނިންމާފަ އެވެ.
މި ދެ ޑިޕާޓްމެންޓާއެކު، ޖުމްލަ ހަ ޑިޕާޓްމެންޓަކަށް ބަހާލައިގެން ސިޓީ ކައުންސިލްގެ މަސައްކަތްތައް ކުރިއަށް ގެންދަވަން މޭޔަރު ވަނީ ނިންމާފަ އެވެ. އޭގެއިތުރުން ކައުންސިލްގެ އިދާރީ އޮނިގަނޑަށް ވެސް މުއިއްޒު ވެސް ވަނީ ބޮޑެތި ބަދަލުތަކެއް ގެންނަވާފަ އެވެ. އެގޮތުން، ކައުންސިލްގެ މަސައްކަތްތައް އެކި ކައުންސިލަރުންގެ މެދުގައި ބަހާލައި، ކޮމިޓީތަކެއް ވަނީ އެކުލަވާލާފަ އެވެ.
މިގޮތަށް އެކުލަވާލި ހަ ކޮމިޓީގެ ތެރެއިން ދެ ކޮމިޓީގެ މުގައްރިރުކަން ދީފައިވަނީ މުއިއްޒުއާ އިދިކޮޅު އެމްޑީޕީއަށް ނިސްބަތްވާ ދެ ކައުންސިލަރުންނަށެވެ.
"އެގޮތަށް އަޅުގަނޑު ކަނޑައެޅީ 18 ކައުންސިލަރުންގެ ތެރެއިން ހަ ކައުންސިލަރުންނަކީ އެމްޑީޕީގެ ކައުންސިލަރުންނަށްވާތީ، އެ ރޭޝިއޯ ދަމަހައްޓައި ހަމަހަމަކަން ގާއިމްކުރުމަށްޓަކައި،" މުއިއްޒު ވިދާޅުވި އެވެ.
