"ކޯރުން ފެށިގެން ކަނޑާ ހަމައަށް، ފަލަސްތީނުގެ ބިން މިނިވަންކަމާއެކު!"
މިއަދު ކޮންމެ ދިވެއްސެއްގެ ވެސް ހިތުގެ ޝުއޫރަކީ މިއީ އެވެ. ބެލްކަނިތަކާއި ގޭގެ ދޮރު މައްޗަށް ފަލަސްތީނުގެ ރަތާއި ފެއްސާއި ހުދު އަދި ކަޅު ހިމެނޭ ދިދަ ހިފައިގެން ނުކުމެ، ތިބީ ފަލަސްތީނުގެ ހައްގުގަ އެވެ.
"އެއީ އަހަރެމެންގެ އަހުންނާއި އުހުތުން، މިއީ އެއް އުއްމަތެއް، އެމީހުންނާއެކު އަބަދުވެސް އަހަރެން ހުންނާނަން،" ގޭގެ ދޮރުމަތީ ތިން ދަރިން ގޮވައިގެން ހުރި މޫސާ އަހުމަދު ބުނީ މިހެނެވެ.
އުމުރުން އެންމެ ފަސް އަހަރުގެ އަރީޝާ ދޮރުމަތީ ހުރެ އަޑު ހަރުކޮށް ކިޔަމުން ދިޔައީ ދުއާ އެކެވެ؛
"މާތްﷲ! ފަލަސްތީނުގެ މައުސޫމް ކުޑަކުދިން ރައްކާތެރިކޮށްދޭށެވެ!"
ބެލްކަނީގައި ކުޑަކުދިންތަކެއް ފަލަސްތީނު ދިދަ ހިފައިގެން - ފޮޓޯ: ހުސެއިން ވަހީދު / އަދަދު
ފަލަސްތީނަށް އަމާޒުކޮށް އިސްރާއިލުން ދެމުން ގެންދާ ހަމަލާތަކުގައި އެތައް ބަޔަކު މަރުވެ، ގެދޮރު ގެއްލުމުންދާއިރު، ދުނިޔޭގެ އެކި ކަންކޮޅުތަކުގައި ފަލަސްތީނުގެ ދިފާއުގައި މުސްލިމުން ގެންދަނީ އަޑު އުފުލަމުންނެވެ.
އެކަމުގައި ދިވެހިން ބައިވެރިވުމުގެ ގޮތުން މިއަދު ހަވީރު ވީއެންމެ ގިނަ ބަޔަކު ފަލަސްތީނުގެ ދިދައާއެކު ބެލްކަނީތަކަށް ނުކުތުމަށް ޒުވާނުންތަކެއް އެދުނު އެދުމަށް ލިބިގެން ދިޔައީ މާބޮޑު ތަރުހީބެކެވެ.
މާލޭގެ ބޮޑެތި މަގުތަކުގައި ކޮންމެ ގެއެއްގެ ބެލްކަނީގައިހެން ފަލަސްތީނު ދިދައެއް ފެންނަން އެބަ ހުއްޓެވެ. ކުދި ގޯޅިތައް ވެސް ފަލަސްތީނުގެ ދިދަތައް ވިހުރިލަވިހުރިލާ އެބަ ހުއްޓެވެ. ކުޑަކުދިން އެ ދިދަތައް ހިފައިގެން ތިބީ ވަރަށް ޖޯޝުގަ އެވެ.
ކުޑަ ކުއްޖަކު ފަލަސްތީނުގެ ދިދައާއެކު މަގުމަތީގައި - ފޮޓޯ: ހުސެއިން ވަހީދު / އަދަދު
ސޯޝަލް މީޑިއާގައި ވެސް ދިވެހިން ވަނީ ފަލަސްތީނާއެކު އޮތްކަން ބޮޑުކޮށް ހާމަކޮށްފަ އެވެ. ދިދައެއްގެ ފޮޓޯ ހިއްސާ ނުކުރާ މީހަކު މިއަދު މަދެވެ. މިކަމުގައި ސަރުކާރުގެ ވެރިންނާއި ސިޔާސީ ލީޑަރުން ވެސް ވަނީ ބައިވެރިވެވަޑައިގެންފަ އެވެ.
ހަރަކާތުގައި ބައިވެރިވެވަޑައިގެންނެވުމުގެ ގޮތުން ފަލަސްތީނުގެ ދިދައާއެކު ރައީސް އިބްރާހިމް މުހައްމަދު ސޯލިހު ވެސް ވަނީ ފަލަސްތީނާއެކު އަބަދުވެސް ދިވެހިން ތިބޭނެ ކަމުގެ ޔަގީންކަން ދެއްވާފަ އެވެ. ހަމަ އެފަދައިން ކުރީގެ ރައީސް މައުމޫން އަބްދުލްގައްޔޫމާއި ކުރީގެ ރައީސް ޑރ. މުހައްމަދު ވަހީދު ވެސް ފަލަސްތީނުގެ ހައްގުގައި ޓްވީޓް ކުރެއްވި އެވެ.
މިހާރު ހިނގަމުންދަނީ ކޮން ހަމަނުޖެހުމެއް؟
އިރުމަތީ ގުދުސް އާއި ގާޒާ އާއި ހުޅަނގު އައްސޭރީގައި ދިރިއުޅޭ ޔަހޫދީންނާއި އަރަބިންނާ ދެމެދު އަބަދުވެސް ނުތަނަވަސްކަން އޮވެ އެވެ.
ގާޒާގައި ވެރިކަން ކުރަނީ ހަމާސް ގްރޫޕުންނެވެ. އެމެރިކާ އާއި އިޒްރޭލް އަދި ބައެއް އެހެން ގައުމުތަކުން ދެކެނީ ހަމާސްއަކީ ހަނގުރާމަވެރި ގްރޫޕެއް ކަމަށެވެ. ހަމާސްއިން ވަނީ މީގެ ކުރިން އެތައް ފަހަރަކު އިޒްރޭލާ ދެކޮޅަށް ހަނގުރާމަކޮށްފަ އެވެ. ގާޒާގެ ބޯޑަރު އިޒްރޭލާއި މިސްރުން ކޮންޓްރޯލް ކުރަނީ ހަމާސްއަށް ހަތިޔާރު ލިބުން ހުއްޓުވަން ކަމަށް ބުނެ އެވެ.
ގާޒާ އާއި ހުޅަނގު އައްސޭރީގައި އުޅޭ ފަލަސްތީނު މީހުންނަށް އިޒްރޭލުން ކުރާ ދުއްތުރާގެ ސަބަބުން ދިރިއުޅުން ކުރިއަށް ގެންދަން އުނދަގޫވެފައިވާ ކަމަށް އެ މީހުން ބުނެ އެވެ. އެކަމަކު އިޒްރޭލުން ބުނަނީ އެ މީހުން ކޮންމެ ކަމެއް ވެސް ކުރަނީ ފަލަސްތީނުގެ ހަމަލާތަކުން ގައުމު ދިފާއު ކުރަން ކަމަށެވެ.
މި އަހަރުގެ ރޯދަ މަސް ފެށުމާއެކު ހަމަނުޖެހުން އިތުރުވެ ކޮންމެ ރެޔަކު ފަލަސްތީނު މީހުންނާއި އިޒްރޭލު ފުލުހުންނާ ދެމެދު ކުރިމަތިލުންތައް ހިނގަން ފެށި އެވެ. އެއީ އަގްސާ މިސްކިތުގައި ނަމާދު ކުރަން ހުރި ދަތިތަކާ ހެދި ހިތްހަމަނުޖެހިގެން ފެށި ކުރިމަތިލުންތަކެކެވެ.
އިރުމަތީ ގުދުސްގައި ފަލަސްތީނު މީހުން ދިރިއުޅޭ ގެތަކުން ނެރުމަށް މަސައްކަތް ކުރަމުން ދާތީ ވެސް އިތުރަށް ހަމަނުޖެހުން ގޯސްވި އެވެ.
