އިޒްރޭލާއި ފަލަސްތީނުގެ ގާޒާއާ ދެމެދު ހަމަލާ ބަދަލު ކުރުން ހުއްޓުވުމާ މެދު އދ. ގެ ސަލާމަތީ މަޖިލީހަށް ބަޔާނެއް ނުނެރެވިގެން އުޅެނީ އެމެރިކާގެ ސަބަބުން ކަމަށާއި ފަލަސްތީނު މައްސަލާގައި ހަމަހަމަ ވާން ޗައިނާ އިން އެމެރިކާ އަށް ގޮވާލައިފި އެވެ.
މިދިޔަ އާދީއްތަ ދުވަހު އދ. ގެ ސަލާމަތީ މަޖިލީހުން ބޭއްވި ކުއްލި ބައްދަލުވުމަށް ޗައިނާ އިން ވަނީ ހަތަރު ނުކުތާގެ ހުށަހެޅުމެއް ހުށަހަޅާފަ އެވެ. އެ ހަތަރު ނުކުތާއަކީ ހަމަލާ ބަދަލު ކުރުން ހުއްޓާލުމާއި، ގާޒާ އަށް އިންސާނީ އެހީ ފޯރުކޮށްދިނުމަށާއި، ބައިނަލްއަގްވާމީ ބައިވެރިވުމާ އެކު ކުރިއަށް ދިޔުމަށާއި، ދެ ދައުލަތް ގާއިމް ކުރުމަށް މަޝްވަރާ ފެށުމެވެ.
ޗައިނާއިން ބުނީ މައްސަލަ ވަކި ގޮތަކަށް ނުނިމިގެން އުޅެނީ އެމެރިކާގެ ސަބަބުން ކަމަށެވެ. އެގޮތުން ހަމަލާ ބަދަލު ކުރުން ވަގުތުން ހުއްޓާލުމަށް ގޮވާލާ އދ. ގެ ސަލާމަތީ މަޖިލީހުން ބަޔާން ނެރުމަށް ގައުމުތަކުން އެއްބަސްވި ނަމަވެސް، އެކަމަށް ހުރަސް އަޅަމުންދާ ހަމައެކަނި ގައުމަކީ ވީޓޯ ކުރުމުގެ ބާރު ލިބިފައިވާ އެމެރިކާ ކަމަށް ޗައިނާ އިން ބުންޏެވެ.
ބޭރުގެ ނޫސްތަކުން ރިޕޯޓު ކުރާ ގޮތުގައި ފާއިތުވި ހަފްތާގެ ތެރޭގައި ތިން ފަހަރެއްގެ މަތިން އެމެރިކާ އިން ވަނީ ސަލާމަތީ މަޖިލީހުން ބަޔާން ނެރެން އުޅުމުން އެކަމަށް ހުރަސް އަޅާފަ އެވެ. އަލްޖަޒީރާ އިން ރިޕޯޓްކުރާގޮތުގައި އެމެރިކާ އިން ބަޔާން ނެރުމަށް ހުރަސް އަޅަނީ އޭގައި އިޒްރޭލަށް ފާޑުކިޔާފައި ވާތީ ކަމަށެވެ.
އދ. ގެ ސަލާމަތީ މަޖިލީހުގެ އިޒްރޭލުގެ އުދުވާނާ މެދު އަދިވެސް އެއްޗެއް ބުނެފައި ނުވި ނަމަވެސް، އެމެރިކާގެ ރައީސް ޖޯ ބައިޑެން މިއަދު ވަނީ ހަމަލާ ބަދަލު ކުރުން ވަގުތުން ހުއްޓާލަން ޖެހޭ ކަމަށް ވިދާޅުވެފަ އެވެ. މީގެ ކުރިން ބައިޑެން ވިދާޅުވަމުން ދިޔައީ އިޒްރޭލަށް އަމިއްލަ ދިފާއުގައި މަސައްކަތް ކުރުމުގެ ހައްގު ލިބޭނެ ކަމަށެވެ.
އިންސާނީ ހައްގުތަކަށް މަސައްކަތް ކުރާ މީހުންގެ ޕްރެޝަރާއި ވެރިކަން ކުރާ ޑިމޮކްރެޓިކް ޕާޓީގެ ބައެއް އިސް މެމްބަރުންގެ ޕްރެޝަރާ ގުޅިގެން ވައިޓް ހައުސްއިން ނެރުނު ބަޔާނެއްގައި ބުނީ ހަމަލާތައް ހުއްޓުވޭނެ ގޮތަކާ މެދު ބައިޑެން ވަނީ އިޒްރޭލުގެ ބޮޑުވަޒީރު ބެންޖަމިން ނަތަންޔާހޫއާ ފޯނު މެދުވެރިކޮށް މަޝްވަރާ ކުރައްވާފައި ކަމަށެވެ.
"ރައީސް [ބައިޑެން] ވަނީ އިޒްރޭލަށް އަމާޒު ކުރާ ރޮކެޓު ހަމަލާތަކުން ރައްކާތެރިވާން އަމިއްލަ ދިފާއުގައި މަސައްކަތް ކުރެވޭނެކަން ގަބޫލުފުޅު ކުރައްވާ ކަމަށް މިއަދު ވެސް ވިދާޅުވެފައި،" ބަޔާނުގައި ވެ އެވެ.
މިދިޔަ ހޯމަ ދުވަހުން ފެށިގެން އިޒްރޭލުން ގާޒާއަށް ބޮން އަޅަމުން ދާއިރު މިހާތަނަށް ފަލަސްތީނުގެ 212 މީހުން ވަނީ މަރުވެފަ އެވެ. އޭގެ ތެރޭގައި ޝަހީދުވި 61 ކުދިން ހިމެނެ އެވެ. ގާޒާގައި ވެރިކަން ކުރާ ހަމާސް އިން އިޒްރޭލަށް ފޮނުވާ ގިނަ ރޮކެޓު ހަމަލާތައް ހުއްޓުވަނީ އިޒްރޭލުގެ "އަޔަން ޑޯމް" ސިސްޓަމުންނެވެ. އިޒްރޭލުގެ ސިޓީތަކަށް ފޯރި މަދު ރޮކެޓު ހަމަލާތަކުގައި މިހާތަނަށް އެ ގައުމުން ދެ ކުޑަކުދިންނާއެކު ޖުމްލަ 10 މީހުން މަރުވެފައި ވެ އެވެ.
