ބ. ދަރަވަންދޫގައި ޓެކްޓިކަލް ގިއަރުގައި ތިބި ފުލުހުންގެ ކުރިއަށް ގެންދާ ހާއްސަ އޮޕަރޭޝަނެއްގައި މީހަކު ހައްޔަރުކޮށްފި އެވެ.
މި އޮޕަރޭޝަނާ ގުޅޭ ގޮތުން މިހާތަނަށް ލިބިފައިވާ މައުލޫމާތަށް ބަލާއިރު ގިނަ އަދަދެއްގެ ފުލުހުންތަކެއް ރަށަށް އަރައިގެން ހިންގާ ކައުންޓާ ޓެރަރިޒަމް އޮޕަރޭޝަނެކެވެ.
އެ އޮޕަރޭޝަނުގައި ދިވެހި ފިރިހެނަކު ހައްޔަރުކޮށްފައިވާ ކަމަށް ފުލުހުން ބުނި ނަމަވެސް އިތުރު މައުލޫމާތެއް ނުދެ އެވެ.
ނަމަވެސް، "އަދަދު"އަށް ޔަގީންވެފައިވާ ގޮތުގައި ފުލުހުން އެ ރަށުން ހައްޔަރުކޮށްފައިވަނީ އަހުމަދު ފާތިހު ނަމަކަށް ކިޔާ މީހެކެވެ.
އޭނާ އެ ރަށަށް ގޮސްފައިވަނީ އެ ރަށުން މީހަކާ ކައިވެނިކުރަން މިދިޔަ ހަފްތާގެ ތެރޭގައި ކަމަށް އެނގިފައިވެ އެވެ.
އަދި އޭނާ ހައްޔަރުކުރީ ކަރަންޓީނުގައި ހުއްޓާކަމަށް ވެސް ވަނީ މައުލޫމާތު ލިބިފަ އެވެ.
އެ ރަށު ކައުންސިލްގެ ރައީސް އަލީ ސަމީހް ވަނީ އެ ރަށަށް ހާއްސަ އޮޕަރޭޝަނެއްގައި ފުލުހުން އަރާފައިވާކަން "އަދަދު"އަށް ކަށަވަރުކޮށްދީފަ އެވެ.
ނަމަވެސް ސީދާ ކޮން ސަބަބަކާ ގުޅިގެން ކަމެއް އެނގިވަޑައިނުގަންނަވާ ކަމަށް ވިދާޅުވި އެވެ.
ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދަށް އަމާޒުކޮށް ދިން ހަމަލާއަށްފަހު، ފުލުހުން ގެންދަނީ ހަރުކަށި ފިކުރާ ދެކޮޅަށް ބޮޑު އޮޕަރޭޝަނެއް ހިންގަމުންނެވެ. ސިފައިން ދަނީ މާލޭ ތެރޭގެ ސަލާމަތީ ކަންކަން ބަލަހައްޓަމުންނެވެ.
ހަރުކަށި ފިކުރުގެ ވިސްނުން ފެތުރުމުގައި އިސްކޮށް އުޅޭ ކަމުގެ ތުހުމަތަށް ރޭ ވެސް ފުލުހުން ވަނީ މީހަކު ހައްޔަރުކޮށްފަ އެވެ.
އއ. ހިމަންދޫގައި ހިންގި ހަމަނުޖެހުމާ ގުޅިގެން މީގެ ކުރިން ޖަލަށްލާފައިވާ އުމުރުން 43 އަހަރުގެ އަބްދުﷲ އަލީ މަނިކު މިއަދު ކުރިމިނަލް ކޯޓަށް ހާޒިރުކުރުމުން އޭނާގެ ބަންދަށް 15 ދުވަސް އިތުރުކޮށްދީފައިވާ ކަމަށް ފުލުހުން ބުނެފައިވެ އެވެ.
މީގެ އިތުރުން، އައްޑޫ ސިޓީގައި ވެސް ފުލުހުން އޮޕަރޭޝަނެއް ހިންގައި އައިއެސް ޖަމާއަތާ ގުޅުން އޮތް ހަތް މީހަކު ހައްޔަރުކޮށް ވަނީ ބަންދު ޖަހާފަ އެވެ. އޭގެ ފަހުން ކ. ގުރައިދޫއާ އިންވެގެން އޮންނަ ކުޑަ ފަޅު ރަށެއް ކަމަށްވާ ޅޮސްފުށި ވެސް ފުލުހުން ވަނީ ބަލާފާސްކޮށްފަ އެވެ.
މި އޮޕަރޭޝަންތަކާ ގުޅޭ ތަފްސީލީ މައުލޫމާތެއް ފުލުހުން ހާމައެއް ނުކުރެ އެވެ.
ނަމަވެސް، ކޮމިޝަނާ އޮފް ޕޮލިސް މުހައްމަދު ހަމީދު ވަނީ ރައީސް ނަޝީދުގެ ހަމަލާއާ ގުޅުން އޮތް އެންމެ ހައްޔަރުކޮށް، އެކަމަށް ފަންޑުކުރި މީހުންނާއި އަޑީގައި ތިބި މީހުން ވެސް ހޯދައި، އިންސާފުގެ ކުރިމައްޗަށް ގެންނާނެ ކަމުގެ ޔަގީންކަން ދެއްވާފަ އެވެ.
