މާލޭ ސިޓީ ކައުންސިލަކީ ސިޔާސީ ޖަގަހައަކަށް ވިޔަ ނުދޭނެ ކަމަށާއި އެ ތަނަކީ ހިދުމަތްދޭ ތަނަކަށް ހަދާނެ ކަމަށް މިއަދު މަގާމާ ހަވާލުވި މާލޭގެ މޭޔަރު ޑރ. މުހައްމަދު މުއިއްޒު ވިދާޅުވެއްޖެ އެވެ.
ހުވާ ކުރެއްވުމަށް ފަހު ބޭއްވި ފުރަތަމަ ބައްދަލުވުމުގައި މުއިއްޒު ވިދާޅުވީ ކައުންސިލް ހިންގާނީ ދެފުށް ފެންނަ، ނަޒާހަތްތެރި ތަނެއްގެ ގޮތުގައި ކަމަށެވެ. ވަޒީފާއެއްގެ ގޮތުގައި ދެކުމުގެ ބަދަލުގައި ޒިންމާއެއްގެ ގޮތުގައި ދެކިގެން ހުރިހާ ކައުންސިލަރުން ވެސް މަސައްކަތް ކުރުމަށް މުއިއްޒު އެދިވަޑައިގަތެވެ.
"ކައުންސިލަރަކީ ރަސްމީ ގަޑި ކަނޑައެޅިފައި އޮންނަ ތަނަކަށް ވިޔަސް، ސައްވީސް ގަޑިއިރު ރައްޔިތުންގެ ހިދުމަތުގައި ތިބޭ ބަޔަކަށް އަޅުގަނޑުމެން ވާން އަޒުމު ކަނޑައަޅަން ވާނެ. ރައްޔިތުންނަށް ހިދުމަތް ދިނުމުގައި ސިޔާސީ ފިކުރަކަށް ނުބަލާ އެންމެނާ މެދުވެސް ހަމަހަމަ ކަމާ އެކު، އިންސާފުވެރިކަމާ އެކު، ތެދުވެރިކަމާ އެކު ހިދުމަތްދޭ ކައުންސިލަކަށް މި ކައުންސިލް ހެދުމަށް ހުރިހާ ކައުންސިލަރުންނަށް ގޮވާލަން،" އޮންލައިންކޮށް ބޭއްވި ރަސްމިއްޔާތުގައި މުއިއްޒު ވިދާޅުވި އެވެ.
ކައުުންސިލަރުން ހުވާ ކުރަން އޮންލައިންކޮށް ބޭއްވި ބައްދަލުވުން: މުއިއްޒު ވަނީ ގިނަ ވައުދުތަކެއް ވެފައި-- ފޮޓޯ: ސިޓީ ކައުންސިލް
އޭނާ ވިދާޅުވީ ކޮންމެ ބޮޑުކަމެއް ކުރުމުގައިވެސް ސިޓީ ކައުންސިލުން ރައްޔިތުންގެ ހިޔާލު ހޯދާނެ ކަމަށެވެ.
މުއިއްޒު ވިދާޅުވި ގޮތުގައި މި ސަރުކާރަށް ދެ އަހަރާއި ބައިވިއިރު ރައްޔިތުންގެ އުއްމީދުތައް އެއްވެސް ވަރަކަށް ހާސިލްކޮށްދެވިފައެއް ނުވެ އެވެ.
މާލޭ ސިޓީ ރައްޔިތުން އެދެނީ އަޅުގަނޑާއި އަޅުގަނޑާ އެކު ހޮއްވެވި ޓީމުން އެ ރައްޔިތުންގެ އަމާޒުތަކަށް ވާސިލް ކޮށްދޭން މަސައްކަތް ކޮށްދީ ނަތީޖާ ނެރެދިނުމަށް. އަޅުގަނޑުމެން މަސައްކަތް ކުރާނީ އެގޮތުގައި-- މުއިއްޒު
މުއިއްޒު ވަނީ ސިޓީ ކައުންސިލް ކުރިއަށް އޮތް ފަސް އަހަރަށް ހިންގުމަށް އެކުލަވާލާފައިވާ ސްޓްރެޓީޖިކް އެކްޝަން ޕްލޭން ތަންފީޒު ކުރުމަށް ސަރުކާރުގެ އެއްބާރުލުން ދިނުމަށް ވެސް ގޮވާލައްވައިފަ އެވެ. ސަރުކާރުން އެއްބާރުލުން ދޭހާ ހިނދެއްގައި ސަރުކާރުގެ އެންމެ ގާތް އެކުވެރިއެއްގެ ގޮތުގައި ސިޓީ ކައުންސިލް އޮންނާނެ ކަމަށް ވެސް މުއިއްޒު ވިދާޅުވި އެވެ.
"އަޅުގަނޑު ޔަގީންކުރަނީ އެކަން އެގޮތުގައި ކުރައްވާނެ ކަމަށް. އެންމެ ބޮޑު އެއްބާރުލުމެއް ބޭނުންވާ ބޭފުޅުންގެ ތެރޭގައި ރައީސުލްޖުމްހޫރިއްޔާ، ރައްޔިތުންގެ މަޖިލީހުގެ ރައީސް، ޕްލޭނިން މިނިސްޓާ، ފިނޭންސް މިނިސްޓާ، ޓްރާންސްޕޯޓް މިނިސްޓަރު އަދި އިކޮނޮމިކް މިނިސްޓާ ފާހަގަކޮށްލަން،" މުއިއްޒު ވިދާޅުވި އެވެ.
މުއިއްޒު މިއަދު ވެސް ވަނީ ގުޅީފަޅޫގައި ޕޯޓް އެޅުން ހުއްޓާލައި އެ އަވަށަކީ ބާހިޔާވަހިކަން ފޯރުކޮށްދޭ ތަނަކަށް ހެދުމަށް ރައީސް އިބްރާހިމް މުހައްމަދު ސޯލިހަށް ގޮވާލައްވައިފަ އެވެ. އަދި ހިޔާ ފްލެޓް ލިބުނު މީހުންނަށް ލަސްނުކޮށް ފްލެޓްތައް ހަވާލުކުރަން ވެސް އެދިވަޑައިގަތެވެ.
ހިޔާ ފްލެޓްތަކުގެ މަހު ކުލި 5،600 ރުފިޔާއަށްވުރެ ބޮޑު ނުކުރުމަށާއި ޑައުންޕޭމަންޓް އެއްފަހަރާ ނުދެއްކޭ މީހުންނަށް ބަހާލައިގެން ދެއްކޭނެ ގޮތް ހަމަޖައްސައި ދިނުމަށް ވެސް އެދިވަޑައިގަތެވެ. އޭގެ އިތުރުން ވަގުތީ ގޮތުން ނަމަވެސް ކިންގް ސަލްމާން މިސްކިތް ހުޅުވައި އެތަނުގައި ނަމާދު ކުރެވޭނެ އިންތިޒާމު ހަމަޖައްސައި ދިނުމަށް ވެސް އެދިވަޑައިގަތެވެ.
