ޕެރިސް (މެއި 17) - ފްރެންޗް ލީގުގެ އެއް ވަނައިގައި އޮތް ލިލް ރޭ ސެއިން އެޓިއެންއާ ލަނޑެއް ނުޖެހި އެއްވަރުވިއިރު، އެންމެ ފަހުގެ ޗެމްޕިއަން ޕީއެސްޖީން 4-0 އިން ރެއިމްސް ބަލިކޮށް ލިލްއާ ޕޮއިންޓަކަށް ކައިރިކޮށްފި އެވެ.
ފަހު މެޗާ ކުރިމަތިލާއިރު ލިލް އެއް ވަނައިގައި އޮތީ 37 މެޗުން 80 ޕޮއިންޓާ އެކު އެވެ. ދެ ވަނައިގައި އޮތް ޕީއެސްޖީ އަށް 37 މެޗުން ލިބިފައިވަނީ 79 ޕޮއިންޓެވެ. ތިން ވަނައިގައި އޮތީ ރޭ ރެނެސް އަތުން 2-1 އިން މޮޅުވި މޮނާކޯ އެވެ. މޮނާކޯ އަށް ވަނީ 37 މެޗުން 77 ޕޮއިންޓް ލިބިފަ އެވެ.
އަންނަ އާދިއްތަ ދުވަހު ފްރެންޗް ލީގުގެ ފަހު މެޗުތައް ކުޅޭއިރު، ލިލް ރަށުންބޭރުގައި ނުކުންނާނީ އެންޖާސްއާ ދެކޮޅަށެވެ. އަދި ޕީއެސްޖީ ބައްދަލުކުރާނީ ބްރެސްޓްއާ އެވެ.
މިއީ 2001/2002 ސީޒަނަށް ފަހު ފްރެންޗް ލީގުގެ ފަހު މެޗުތަކަށްދާއިރު އެއް ވަަނަ އާއި ދެ ވަނައިގެ ދެމެދުގައި އެއް ޕޮއިންޓުގެ ފަރަގެއް އޮތް ފުރަތަމަ ފަހަރެވެ.
ޕީއެސްޖީގެ ކޯޗު މައުރީސިއޯ ޕޮޗެޓީނޯ ބުނީ އޭނާގެ ޓީމުން އިތުބާރު ދަމަހައްޓައިގެން ކުޅެފިނަމަ ފަހު މެޗުން މޮޅުވެގެން ބޭނުންވާ ކަންކަން ހާސިލްކުރެވޭނެ ކަމަށެވެ.
"ފުޓްބޯޅައިގައި ނަސީބުގެ އެހީ ވެސް ބޭނުންވާނެ. އަހަރެމެން ފަހު މެޗަށް ނުކުންނާނީ އުއްމީދާ އެކު،" ޕޮޗެޓީނޯ ބުންޏެވެ.
ޕީއެސްޖީގެ ދަނޑުގައި ރޭ ކުޅުނު މެޗުގެ ބޮޑުބައި ރެއިމްސް އިން ކުޅުނީ ކުޅުންތެރިއަކު މަދުކޮށެވެ. އެއީ 10 ވަނަ މިނިޓްގައި ރެއިމްސްގެ ޔޫނުސް އަބްދުލްހަމީދަށް ސީދާ ރަތް ކާޑެއް ދެއްކުމުންނެވެ. އޭގެ ތިން މިނިޓް ފަހުން ޕެނަލްޓީ އަކުން ނޭމާ ވަނީ ޕީއެސްޖީ އަށް ލީޑުނަގައިދީފަ އެވެ. އަދި މެޗުގެ 24 ވަނަ މިނިޓްގައި ކީލިއަން އެމްބާޕޭ ވަނީ ޕީއެސްޖީގެ ދެ ވަނަ ގޯލު ޖަހައިފަ އެވެ. މިއީ މި ސީޒަނުގެ ހުރިހާ މުބާރާތެއްގައި އޭނާ ކާމިޔާބުކުރި 40 ވަނަ ގޯލެވެ.
ދެ ވަނަ ހާފްގައި ޕީއެސްޖީގެ އަނެއް ގޯލުތައް ޖެހީ މާކުއީނިއޯސް އާއި މޮއިސް ކީން އެވެ. މާކުއީނިއޯސްގެ ގޯލަށް ފުރުސަތު ތަނަވަސްކޮށްދިނީ ނޭމާ އެވެ.
