ފަލަސްތީނު ރައްޔިތުންގެ ހައްގުތަކަށް އިޒްރޭލުން އަރައިގަތުން ކުށްވެރި ކުރައްވާ ކަމަށާއި ގާޒާގައި ހިންގަމުންދާ އަނިޔާވެރި އަސްކަރީ އޮޕަރޭޝަން ވަގުތުން ހުއްޓުވަން ސައުދީ އަރަބިއްޔާގެ ފޮރިން މިނިސްޓަރު ގައުމުތަކަށް ގޮވާލައްވައިފި އެވެ.
ޕްރިންސް ފައިސަލް ބިން ފަރްހާން އަލް ސައުދު އެގޮތަށް ގޮވާލެއްވީ 57 މެމްބަރު ގައުމު ހިމެނޭ އޯގަނައިޒޭޝަން ފޯ އިސްލާމިކް ކޯޕަރޭޝަން (އޯއައިސީ)ގެ ކުއްލި ބައްދަލުވުމެއް ފެށުމުގެ ގޮތުން މިއަދު ވާހަކަ ދައްކަވަމުންނެވެ.
ރާއްޖޭގެ ފޮރިން މިނިސްޓަރު އަބްދުﷲ ޝާހިދު ވެސް ބައިވެރިވެ ވަޑައިގަންނަވާ ކުއްލި ވާޗުއަލް ބައްދަލުވުމުގެ މަގްސަދަކީ އިޒްރޭލުން ގާޒާއަށް ދެމުންދާ ހަމަލާތަކަށް މިއަދު ހަފްތާއެއް ފުރިފައި ވާތީ އެކަމާ މެދު މަޝްވަރާ ކުރުމެވެ.
މިދިޔަ ހޯމަ ދުވަހު އިޒްރޭލުން ގާޒާއަށް ބޮން އަޅަން ފެށީ ހަމާސް ޖަމާއަތުން އިޒްރޭލަށް ރޮކެޓު ހަމަލާ ފޮނުވާތީ އެކަމުގެ ރައްދު ގަ އެވެ. ހަމާސްއިން ރޮކެޓު ހަމަލާ ފޮނުވަން ފެށީ އިރުމަތީ ގުދުސްގައި ތިބި ފަލަސްތީނު މީހުން ގެތަކުން ނެރުމަށް މަސައްކަތް ކުރުމާއި އަގްސާ މިސްކިތުގައި ނަމާދު ކުރުމަށް ހުރަސް އަޅާ މައްސަލާގަ އެވެ.
ސައުދީ ފޮރިން މިނިސްޓަރު ވަނީ އިސްލާމް ދީނުގެ އެންމެ މާތްވެގެންވާ އެއް މިސްކިތުގެ ހުރުމަތް ކަނޑާލުމާއި، އިރުމަތީ ގުދުސްގެ ޝެއިހް ޖައްރާގައި އުޅޭ ފަލަސްތީނު މީހުން ގަދަކަމުން ގެތަކުން ނެރެން މަސައްކަތް ކުރުން ކުށްވެރި ކުރައްވާފަ އެވެ.
އިޒްރޭލުން އިރުމަތީ ގުދުސްއަށް އަރާ އެތަން ހިފީ 1967 ގަ އެވެ. އޭގެ ފަހުން 1980 ގައި އެއީ އިޒްރޭލުގެ ބަޔެއްގެ ގޮތުގައި ކަނޑައަޅައިގެން އެ ތަނުގައި ޔަހޫދީން އާބާދު ކުރަން ފެށި އެވެ. ނަމަވެސް އެއީ ބައިނަލްއަގްވާމީ ގާނޫނާ ހިލާފަށް ކުރާ ކަމެކެވެ.
ފަލަސްތީނު މީހުން ތުހުމަތު ކުރާ ގޮތުގައި އިޒްރޭލުގެ އަމާޒަކީ ގުދުސްއިން ފަލަސްތީނު މީހުން ބޭރުކޮށް އެ ތަނުގެ އާބާދީގައި ޔަހޫދީން ގިނަ ކުރުމެވެ.
ސައުދީ ފޮރިން މިނިސްޓަރު ގައުމުތަކަށް ގޮވާލެއްވީ "ނުރައްކާތެރި ހަމަނުޖެހުން" ނިމުމަކަށް ގެނައުމުގެ ޒިންމާ އަދާ ކުރުމަށާއި އަސްކަރީ އޮޕަރޭޝަން ހުއްޓުވާ ފަލަސްތީނާއި އިޒްރޭލުގެ ދައުލަތެއް ސުލްހަވެރިކަމާ އެކު ގާއިމް ކުރެވޭނެ މަގުކޮށައި ދިނުމަށެވެ.
އޯއައިސީގެ ބައްދަލުވުން ފެށުމުގެ ގޮތުން ހުޅަނގު އައްސޭރީގައި ވެރިކަން ކުރާ ފަލަސްތީނު ސަރުކާރުގެ ފޮރިން މިނިސްޓަރު ރިއާދް މާލިކް އިޒްރޭލުގެ ހަމަލާތައް ސިފަކުރެއްވީ "ފިނޑި އަމަލުތަކެއް"ގެ ގޮތުގަ އެވެ.
"ފަލަސްތީނުގެ ރައްޔިތުން ތެދުވެފައި ވާތީ އަންގައި ދެނީ ގުދުސްއަކީ ރަތް ރޮނގެއްކަން. އިޒްރޭލުގެ މީހުން މަރާ މެޝިނުގެ ސަބަބުން އަޅުގަނޑުގެ ރައްޔިތުން ވަރުބައްޔެއް ނުވާނެ،" އޭނާ ވިދާޅުވި އެވެ.
އަޅުގަނޑުމެން މާތް ﷲ ހަނދުމަކޮށް އަބަދުވެސް ބުނަމުން ދާންވީ އެންމެ ފަހު ދުވަހާ ޖެހެންދެން ވެސް ދުލެއް ނުދޭނަމޭ. އަޅުގަނޑުމެންނަށް ދިމާވެފައި މި އޮތީ ދިގު މުއްދަތަށް ބިމަށް ވެރިވެގަނެގެން އުޅޭ މައްސަލައެއް. މައްސަލައިގެ އަސްލަކީ އެއީ. އެއްވެސް އުގޫބާތެއް އައިސްދާނެ ކަމަށް ބިރެއް ނެތި ފަލަސްތީނު ރައްޔިތުންނާ ދެކޮޅަށް އެ ހިންގަމުން ދަނީ ބޮޑުވެގެންވާ ޖަރީމާއެއް -- ފަލަސްތީނުގެ ފޮރިން މިނިސްޓަރު
ހުޅަނގު އައްސޭރީގައި ވެރިކަން ކުރާ ފަލަސްތީނު ސަރުކާރަށް ގާޒާގައި އެއްވެސް ކޮންޓްރޯލެއް ނޯވެ އެވެ. ގާޒާގައި 2007 ވަނަ އަހަރު ސަރުކާރު ވައްޓާލުމަށް ފަހު ވެރިކަން ކުރަމުން ދަނީ ހަމާސް ގްރޫޕުންނެވެ.
އޯއައިސީ ބައްދަލުވުމުގައި ތުރުކީގެ ފޮރިން މިނިސްޓަރު މެވްލޫތު ކަވުސޮގްލޫ ވެސް ވަނީ ވަރަށް ބޮޑަށް އިޒްރޭލަށް ފާޑުވިދާޅުވެ، މުޅި ހާލަތުގެ ޒިންމާ އެ ގައުމުން އުފުލަން ޖެހޭނެ ކަމަށް ވިދާޅުވެފަ އެވެ.
"އިރުމަތީ ގުދުސް އާއި ހުޅަނގު އައްސޭރި އަދި ގާޒާގެ ހާލަތު ގޯސްވުމުގެ ޒިންމާ އުފުލަން ޖެހޭނީ ހަމައެކަނި އިޒްރޭލުން. މިދިޔަ ހަފްތާގައި އަޅުގަނޑުމެން އިޒްރޭލަން ދިން އިންޒާރުތަކަށް އެ މީހުން ދިނީ ބީރު ކަންފަތެއް،" އޭނާ ވިދާޅުވި އެވެ.
