އިޒްރޭލުން މިދިޔަ ހޯމަ ދުވަހުން ފެށިގެން ފަލަސްތީނަށް ދެމުންދާ ހަމަލާތަކުގެ ތެރެއިން އިއްޔެ ގާޒާގައި ހުންނަ ހަމާސްގެ އެންމެ އިސް ވެރިޔާގެ ގެޔަށް ބޮން އަޅާ ބިމާ ހަމަކޮށްލައިފި އެވެ.
އިއްޔެ ބޮން އަޅާފައިވަނީ ޔަހުޔާ ސިންވާރް އާއި އޭނާގެ ބޭބެ މުހައްމަދުގެ ގެޔަށް ކަމަށް އިޒްރޭލު އަސްކަރިއްޔާއިން ބުނެ އެވެ. އޭއެފްޕީން ބުނެފައިވަނީ ސިންވާރްގެ ގެ އެއްކޮށް ފުނޑުފުނޑުވެފައިވާ ކަމަށެވެ.
އޭގެކުރީ ދުވަހު ވެސް ހަމާސްގެ ބައެއް ވެރިންގެ ގެތަކަށް ހަމަލާ ދިނެވެ. އެގޮތުން ހަމާސްގެ ސިޔާސީ ހަރަކާތްތައް ހިންގުމުގައި އިސްކޮށް އުޅޭ ހަލީލް އަލް ހަޔާގެ ގެޔަށް ހަމަލާ ދިނެވެ.
އެ ހަމަލާތަކުގައި ހަމާސްގެ އެއްވެސް ވެރިޔަކު މަރުވި ކަމަށް ރިޕޯޓުތައް ނުބުނެ އެވެ. ހޯމަ ދުވަހު ހަމަލާތައް ދޭން ފެށުމާއެކު ހަމާސްގެ ވެރިން ވަނީ ފިލާފަ އެވެ.
ގަތަރުގެ ދޯހާގައި ފަލަސްތީނަށް ތާއީދު ކުރާ ބަޔަކު އެއްވެފައި އޮތް ތަނެއްގައި ވާހަކަ ދައްކަވަމުން ހަމާސްގެ ލީޑަރު އިސްމާއިލް ހަނިއްޔާ ވިދާޅުވީ އެ ގްރޫޕުގެ މަސައްކަތް ހުއްޓާ ނުލާނެ ކަމަށެވެ.
"މި ހަރަކާތް ހުއްޓައެއް ނުލާނެ. އިންޝާﷲ، ގުދުސް އާއި އަލް އަގްސާ ހިމާޔަތް ކުރަން ފަރުބަދައިގެ އެންމެ އުހުގައި އަޅުގަނޑުމެން ތިބޭނަން،" ހަނިއްޔާ ވިދާޅުވި އެވެ.
"މި ދައްކަނީ އަޅުވެތިކޮށްފައިވާ ގާޒާގެ ވާހަކަ... ހުރިހާ ފަރާތަކުން އަޅުވެތިކޮށްފައި ވާތާ 15 އަހަރު ވެއްޖެ".
ހަމާސްގެ ވެރިންގެ ގެތަކުގެ އިތުރުން ބިމު އަޑީގައިވާ ބިންގަރާސްތަކަށް ވެސް ހަމަލާ ދިން ކަމަށް އިޒްރޭލް އަސްކަރިއްޔާއިން ބުނެ އެވެ.
މީގެ ހަފްތާއެއް ކުރިން ހަމަލާ ބަދަލު ކުރަން ފެށި ފަހުން ހަމާސްގެ 20 ހަނގުރާމަވެރިން މަރުވެފައިވާ ކަމަށް އެ ގްރޫޕުން ބުނެ އެވެ. ނަމަވެސް އިޒްރޭލުން ބުނީ އަސްލު އަދަދު މާ މަތި ވާނެ ކަމަށެވެ.
އިޒްރޭލުން ދޭ ގިނަ ހަމަލާތަކުގައި މަރުވަނީ ފަލަސްތީނުގެ އާއްމުންނެވެ. އެގޮތުން 40 އަށް ވުރެ ގިނަ ކުޑަކުދިން ހިމެނޭ ގޮތަށް 180 އެއްހާ މީހުން މިހާތަނަށް މަރުވެއްޖެ އެވެ.
