މިލާން (މެއި 15) - ދާދި ފަހުން ސްވިޑެން ގައުމީ ޓީމަށް އެނބުރި އައި އުމުރުން 39 އަހަރުގެ ފޯވާޑް ޒްލަޓާން އިބްރަހިމޮޗިށް އަނިޔާގެ ސަބަބުން އަންނަ މަހު ފަށާ ޔޫރޯ ފުޓްބޯޅަ މުބާރާތުގައި ނުކުޅެވޭނެކަން ކަށަވަރުވެއްޖެ އެވެ.
އިބްރަހިމޮވިޗްގެ ކަކުލަށް އަނިޔާވީ މި މަހު ނުވަ ވަނަ ދުވަހު އޭނާ ކުޅެމުން އަންނަ އޭސީ މިލާނުން ޔުވެންޓަސް ބަލިކުރި މެޗުގަ އެވެ. ޔޫރޯ ފެށުމުގެ ކުރިން އިބްރަހިމޮވިޗަށް ލިބިފައިވާ އަނިޔާއިން ރަނގަޅުވުމުގެ ކުޑަ ފުރުސަތެއް ކުރިން އޮތެވެ. އެކަމަކު އިބްރަހިމޮވިޗް މިއަދު ވަނީ އޭނާ އަށް ނުކުޅެވޭކަން ސްވިޑެންގެ ކޯޗު ޔޭން އެންޑަސަން އަށް އަންގައިފަ އެވެ.
ފަސް އަހަރުގެ މެދުކެނޑުމަކަށް ފަހު އިބްރަހިމޮވިޗް އެނބުރި އައިސް ސްވިޑެން އަށް ފުރަތަަމަ ފަހަރަށް ކުޅުނީ މިދިޔަ މާޗް މަހުގަ އެވެ. ވޯލްޑް ކަޕް ކޮލިފައިންގައި ސްވިޑެން އިން ޖޯޖިއާ ބަލިކުރި މެޗުގައި އިބްރަހިމޮވިޗް ވަނީ ލަނޑެއް ޖަހަން ފުރުސަތު ތަނަވަސްކޮށްދީފަ އެވެ. އިބްރަހިމޮވިޗަކީ ސްވިޑެން ޓީމަށް ކުޅުނު އެންމެ ދުވަސްވީ ކުޅުންތެރިޔާ އެވެ.
ފްރާންސްގައި 2016 ވަނަ އަހަރު ބޭއްވި ޔޫރޯ ފުޓްބޯޅަ މުބާރާތަށް ފަހު އިބްރަހިމޮވިޗް ގައުމީ ޓީމުން ރިޓަޔާކުރީ 116 މެޗުން 62 ގޯލު އެ ޓީމަށް ޖަހައިދިނުމަށް ފަހު އެވެ. އޭނާ އަކީ ސްވިޑެން އަށް އެންމެ ގިނަ ގޯލު ޖަހައިދިން ކުޅުންތެރިޔާ އެވެ.
މި ސީޒަނުގައި މިލާނަށް ކުޅެދިން 27 މެޗުން އިބްރަހިމޮވިޗް ވަނީ 17 ގޯލު ޖަހައި ތިން ގޯލު ޖަހަން ފުރުސަތު ތަނަވަސްކޮށްދީފަ އެވެ.
އަންނަ މަހުގެ 11 އިން ޖުލައި މަހުގެ 11 އަށް ކުރިއަށްދާ ޔޫރޯގައި ސްވިޑެން ވާދަކުރާނީ ސްޕެއިނާއި ސްލޮވާކިއާ އަދި ޕޮލެންޑާ އެކު ގްރޫޕް އީގަ އެވެ.
