މިލާން (ޖޫން 4) - މި މަހުގެ ނިޔަލަށް އޭސީ މިލާނުގެ ކޮންޓްރެކްޓްގައި ހުރި ޒަލަޓާން އިބްރަހިމޮވިޗް، އެ ޓީމާ އެކު އާ އެއްބަސްވުމެއް ނަހަދައި، ޓީމު ދޫކޮށްލަން ތައްޔާރުވެއްޖެ އެވެ.
އެ ގޮތުން، އިބްރަހިމޮވިޗް މިލާނާ އެކު ނުކުންނާނެ ފަހު މެޗަކީ އިޓާލިއަން ލީގުގައި މިއަދު ހެލަސް ވެރޯނާއާ ކުޅޭ މެޗެވެ.
އުމުރުން 41 އަހަރުގެ އިބްރަހިމޮވިޗް، އަލުން މިލާނަށް ބަދަލުވީ 2019 ވަނަ އަހަރު ޑިސެމްބަރު މަހުގަ އެވެ. މިލާނުން މިިިދިޔަ ސީޒަނުގައި އިޓާލިއަން ލީގުގެ ޗެމްޕިއަންކަން ހޯދިއިރު، މުހިންމު ވަގުތުތަކުގައި އިބްރަހިމޮވިޗްގެ ތަޖުރިބާގެ ބޭނުންކޮށްގެން މެޗުތަކުގެ ނަތީޖާ ނެރެފައިވެ އެވެ.
މިލާނުގައި އެންމެ ފުރަތަމަ ހޭދަކުރި އަހަރުތަކުގައި ވެސް އިބްރަހިމޮވިޗް ވަނީ އެ ޓީމާ އެކު ލީގު ޗެމްޕިއަންކަން ހޯދައިފަ އެެވެ. އެއީ 2011 ވަނަ އަހަރު އެވެ. އުމުރުން ދުވަސްވީ ކުޅުންތެރިއެއްގެ ގޮތުގައި މިލާނާ އެކު، އިބްރަހިމޮވިޗް ވަނީ ރެކޯޑްތަކެއް ވެސް ހަދައިފަ އެވެ.
މި ސީޒަނަށް ފަހު މިލާނުން އިބްރަހިމޮވިޗްގެ ކޮންޓްރެކްޓް އާ ނުކުރި އެންމެ ބޮޑު ސަބަބަކީ އަނިޔާގެ މައްސަލަތަކާ ހެދި ގިނަ މެޗުތަކެއް ގެއްލުމެވެ. އިބްރަހިމޮވިޗަށް ފަހަކަށް އައިސް ކަކުލުގެ ގިނަ އަނިޔާގެ މައްސަލަތަކެއް ވަނީ ކުރިމަތިވެފަ އެވެ. އަދި އޮޕަރޭޝަނެއް ވެސް ވަނީ ކޮށްފަ އެވެ.
އިބްރަހިމޮވިޗަށް މި ސީޒަނުގައި ޖުމްލަ އެކު، ކުޅެވުނީ ހަތަރު މެޗެވެ. އޭގެ ތެރެއިން ފުރަތަމަ އެގާރައިގައި ހިމެނިގެން ކުޅެފައިވަނީ އެންމެ މެޗެކެވެ.
އިބްރަހިމޮވިޗް ވަނީ އޭނާގެ ކެރިއަރުގައި މަލްމޯ، އަޔަކްސް، ޔުވެންޓަސް، ބާސެލޯނާ، އިންޓަ މިލާން، މެންޗެސްޓާ ޔުނައިޓެޑް، ޕީއެސްޖީ އަދި އެލްއޭ ގެލެކްސީ އަށް ކުޅެފަ އެވެ.
