މޯލްޑިވްސް އިސްލާމިކް ބޭންކް (އެމްއައިބީ)ން މި ހަފުތާގައި ތިން ދުވަހު ހިދުމަތްދޭ ގޮތަށް ހަމަޖައްސައިފި އެވެ.
މާލޭގައި ހަލުވިކަމާ އެކު ކޮވިޑް19 ފެތުރެމުންދާތީ މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން ބޭންކުތަކުގެ ހިދުމަތް ހަފުތާއަކު ދެ ދުވަހު ދޭ ގޮތަށް ހަމަޖެއްސީ މިދިޔަ ހަފުތާގެ ތެރޭގަ އެވެ. އެމްއެމްއޭ އިން އެ ނިންމުން މުރާޖާ ކުރީ ބޭންކުތަކުން ހިދުމަތް ނުލީބޭތީ އާންމުންނާއި ވިޔަފާރިތަކުން ޝަކުވާ ކުރުމާއި ގުޅިގެންނެވެ.
މި ބަދަލާ ގުޅިގެން އެމްއައިބީން ވަނީ ހޯމަ، އަންގާރަ އަދި ބުރާސްފަތި ދުވަހުގެ ހެނދުނު 09:30 އިން 12:00 އަށް ހިދުމަތްދޭ ގޮތަށް ބަދަލުގެނެސްފަ އެވެ.
އެމްއައިބީން ބުނީ މި ދުވަސްތަކުގެ ތެރޭގައި ބޭންކަށް އައިސްގެން ލިބޭނީ އޮންލައިންކޮށް ނުލިބޭ ހިދުމަތްތައް އެކަނި ކަމަށެވެ. އެ ހިދުމަތްތައް ދޭ ގޮތަށް ހަމަޖައްސާފައި ވަނީ އެޕޮއިންޓްމަންޓް އުސޫލުންނެވެ. އެޕޮއިންޓްމަންޓް ހައްދަން ބޭނުންވާ ފަރާތްތަކަށް އޭންޓްކިއު އެޕްލިކޭޝަން މެދުވެރިކޮށް އެމްއައިބީގެ ޓޯކަން ނަމްބަރު ލިބޭނެ އެވެ.
ބޭންކު ހުޅުވައިގެން ހިދުމަތް ދިން ނަމަވެސް، އެމްއައިބީން ވަނީ އޮންލައިންކޮށް ލިބެން ހުރި ހިދުމަތްތަކުގެ ބޭނުން ހިފުމަށް އެ ބޭންކުގެ ކަސްޓަމަރުންގެ ކިބައިން އެދިފަ އެވެ.
މާލެ ސަރަހައްދުގައި ނުރައްކާތެރި މިންވަރަކަށް ކޮވިޑް-19 ފެތުރެމުން ދިޔުމާ ގުޅިގެން މާލީ އިދާރާތަކާއި ބޭންކުތަކުން ހިދުމަތްދޭ ގަޑިތަކަށް ގެނައި ބަދަލު ދެމިގެންދާނީ މި ހަފުތާގެ ނިޔަލަށެވެ. އަދި ހަފުތާ ނިމުމުން ބަލިމަޑުކަމުގެ ހާލަތަށް ރިއާޔަތްކޮށް އެންގުން ދައްމާލުމަށް ނުވަތަ މުރާޖާކުރުމާ މެދު ގޮތެއް ނިންމާނެ އެވެ.
