ކޮވިޑް-19 ގެ ހާލަތު އަނެއްކާވެސް ރާއްޖޭގައި ގޯސްވެ އާއިލާތަކަށް ނުތަވަނަސްކަން ވެރިވެފައިވާ އިރު އެންމެ އިސްކަންދޭން ޖެހެނީ އެކަކު އަނެކަކަށް އަޅާލައި އޯގާތެރިކަން ކުރިއަށް ނެރެން ކަމަށް ޖެންޑާ މިނިސްޓްރީން މިއަދު ބުނެފި އެވެ.
ބައިނަލްއަގުވާމީ އާއިލާތަކުގެ ދުވަހާ ގުޅިގެން ނެރުނު ބަޔާނުގައި މިނިސްޓްރީން ބުނީ ކޮވިޑުގެ ސަބަބުން ކުރިމަތިވާ ސިއްހީ އުނދަގޫތަކުގެ އިތުރުން އިޖުތިމާއީ ގޮތުންނާއި ނަފްސާނީ ގޮތުން އަދި ގޮތުން ގިނަ ގޮންޖެހުންތަކަކާ ކުރިމަތިލާން ޖެހިފައިވާ ކަމަށެވެ. މިފަދަ އުނދަގޫ ދަނޑިވަޅެއްގައި އެންމެ ބޭނުންވާ އެއް ކަމަކީ އާއިލީ ގުޅުން ބަދަހިކޮށް އޮތުން ކަމަށް ވިދާޅުވި އެވެ.
އާއިލާގެ އެކަކު އަނެކެއްގެ ހާލު އޮޅުންފިލުވައި އެހީތެރިކަން ފޯރުކޮށްދީ ޒިންމާ ފުރިހަމައަށް އަދާކުރުމަށް ޖެންޑާ މިނިސްޓްރީން އިލްތިމާސްކުރެ އެވެ.
މިނިސްޓްރީން ބުނި ގޮތުގައި ކޮވިޑް19ގެ ސަބަބުން މާލޭގައި ދިރިއުޅެން ދަތިވެފައިވާ އާއިލާތަކަށް ރަށްރަށުގައި ދިރިއުޅެވޭނެ އިންތިޒާމް އަންނަނީ ހަމަޖައްސައިދެމުންނެވެ. އެގޮތުން އަހުލު ނަމުގައި މިދިޔަ އަހަރު ޕްރޮގްރާމެއް ފެށީ ކޮވިޑާއި ގުޅިގެން މާލޭގައި ދިރިއުޅެން ދަތި ވެފައިވާ އާއިލާތައް ރަށްރަށަށް ބަދަލުވާން އެހީ ފޯރުކޮށް ދިނުމަށެވެ. އެ ޕްރޮގްރާމްގެ ދަށުން 9 އާއިލާއަކަށް އަތޮޅުތެރޭގައި ދިރިއުޅެވޭނެ އިންތިޒާމް ހަމަޖައްސާފައިވާ ކަމަށް ޖެންޑާ މިނިސްޓްރީން ބުނެ އެވެ.
މިދިޔަ އަހަރުގެ ކުރީކޮޅު ރާއްޖޭގައި ކޮވިޑް ފެތުރެން ފެށުމާ ގުޅިގެން މާލެ ފުރަބަންދަކަށް ދިއުމުން ގިނަ ބައެއްގެ ވަޒީފާ ގެއްލި މާލޭގައި ދިރިއުޅުމަށް ދަތިވި އެވެ. ވަގުތީ ބޯހިޔާވަހިކަން ފޯރުކޮށްދޭން ޖެހުނު އާއިލާތަކަށާއި ކާބޯތަކެތީގެ އެހީތެރިކަން ފޯރުކޮށްދޭންޖެހުނު ފަރާތްތަކަށް އެ ކަންކަން ފުރިހަމަކޮށް ދިނުމަށް ގިނަ މަސައްކަތްތަކެއް ކޮށްފައިވާ ކަން ބަޔާނުގައި ފާހަގަކޮށްފައިވެ އެވެ.
މިނިސްޓްރީގެ ބަޔާނުގައި އާއިލާގެ ފަރާތުން ރައްކާތެރިކަމާއި އަޅާލުމާއި ލޯބި ނުލިބި މިނިސްޓްރީގެ ބެލުމުގެދަށުގައި ބަޔަކު ތިބުމުގެ ކަންބޮޑުވުން ފާޅުކޮށްފައިވެ އެވެ. ކުޑަކުދިންނާއި ދުވަސްވީ މީހުންނާއި ނަފްސާނީ ބޮޑެތި މައްސަލަތައް ކުރިމަތިވެފައިވާ މީހުންނަށް އެފަރާތްތަކުގެ އާއިލާގެ އަޅާލުމެއް ނެތި މަރުކަޒެއްގައި ދިރިއުޅެންޖެހުމަކީ ނަފްސާނީ ދުޅަހެޔޮކަން އިތުރަށް ގޯސްވުމަށް މަގުފަހިކޮށްދޭ ކަމެއް ކަމަށް ބަޔާނުގައި ހަނދާންކޮށްދީފައިވެ އެވެ.
އުމުރުން ދުވަސްވީ މީހުން މަރުކަޒުތަކަށް ފޮނުވުމަކީ އެންމެ ފަހުގެ ހައްލު ކަމުގައި ނުބަލައި އާއިލާ އެކު ދިރިއުޅުމުގެ ފުރުސަތު ކޮންމެ މީހަކަށްވެސް ހޯއްދައި ދިނުމަށް ފަރުދީ ފެންވަރުގަ އާއި ޖަމާއަތުގެ ފެންވަރުގައި ކުރެވެން ހުރި ހުރިހާ މަސައްކަތެއް ކޮށްދެއްވުމަށް މިނިސްޓްރީން އިލްތިމާސްކުރެ އެވެ.
ޖެންޑާ މިނިސްޓްރީން ބުނިގޮތުގައި އާއިލާގެ ތެރޭގައި ދިމާވާ މައްސަލަތައް މަދު ކުރުމަށާއި ކުރިމަތިވާ މައްސަލަތަކުގެ ސަބަބުން ލިބޭ ގެއްލުން ކުޑަކުރުމުގެ ގޮތުން އާއިލާއާ ބެހޭ ގާނޫނަށް ގެންނަންޖެހޭ ބަދަލުތައް ގެނައުމަށް ކުރަންޖެހޭ މަސައްކަތްތައް ދަނީ ކުރަމުންނެވެ. އަދި ގެވެށި އަނިޔާ ހުއްޓުވުމަށްޓަކައި "ގެވެށި ގުޅުން" ނަމުގައި ގައުމީ ފެންވަރުގެ ކެމްޕެއިނެއް ފަށައި އެ ކެމްޕެއިންގެ ދަށުން މުޅި ރާއްޖޭގައި ހާއްސަ މަސައްކަތްތަކެއް ކުރަމުން އަންނަ ކަމަށް ވެސް ބުނެފައިވެ އެވެ.
މިނިސްޓްރީން ބުނި ގޮތުގައި ގެވެށި އަނިޔާ ލިބޭ ފަރާތްތަކަށް ބޭނުންވާ ހިދުމަތްތައް އިތުރުކޮށް ހަރުދަނާ ކުރުމުގެ ގޮތުން ރާއްޖޭގެ އެކި ސަރަހައްދުތަކުގައި ހުރި ވަގުތީ ރައްކާތެރިކަން ފޯރުކޮށްދޭ މަރުކަޒުތައް ތަރައްގީކުރުމުގެ މަސައްކަތް ވެސް އަންނަނީ ކުރަމުންނެވެ.
