ޗައިނާގެ ޖައްވީ އުޅަނދެއް ކާމިޔާބުކަމާ އެކު މާސްގެ ބިމަށް ތިރިކޮށްފައިވާ ކަމަށް އެ ގައުމުގެ ދައުލަތުގެ މީޑިއާއިން ރިޕޯޓުކޮށްފި އެވެ.
ހަ ފުރޮޅުލީ ޝުރޮންގް ރޮބޮޓް ތިރި ކުރީ މާސްގެ އުތުރުގައިވާ ޔޫޓޯޕިއާ ޕްލެނީޝިއާ ކިޔާ ހިސާބަކަށެވެ. އޭތި މާސްގެ ބިމުގައި ޖެއްސީ ކެޕްސޫލަކާއި، ޕެރެޝޫޓެއް އަދި ރޮކެޓް ޕްލެޓްފޯމެއްގެ އެހީ ގަ އެވެ.
މާސްގެ ބިމަށް ތިރި ކުރުމަކީ ވަރަށް އުނދަގޫ ކަމަކަށް ވާތީ މިއީ ޗައިނާގެ ޖައްވީ އޮޕަރޭޝަންތަކަށް ލިބުނު ބޮޑު ކާމިޔާބެއްގެ ގޮތުގައި އަންނަނީ ފާހަގަކުރަމުންނެވެ.
މީގެ ކުރިން މާސްގެ ބިމުގައި އުޅަނދެއް ޖައްސާފައިވަނީ އެމެރިކާއިން އެކަންޏެވެ. އެހެންކަމުން ޗައިނާ މިއީ މާސްއަށް އުޅަނދެއް ފޮނުވި ދެ ވަނަ ގައުމެވެ.
އެކަން ކާމިޔާބުވުމުން ރައީސް ޝީ ޖިންޕިން ވަނީ އެ މަސައްކަތުގައި އުޅޭ ޓީމަށް މަރުހަބާ ވިދާޅުވެ، ގައުމަށް ހޯދައިދިން ރީތި ނަމަށް ތައުރީފު ކުރައްވައިފަ އެވެ.
ޗައިނާއިން މާސްއަށް ފޮނުވި އޯބިޓާއިން ނަގާފައިވާ އެ ޕްލެނެޓުގެ ބިމުގެ މަންޒަރެއް.-- ފޮޓޯ: ސީއެންއެސްއޭ
ޗައިނާގެ ދައުލަތުގެ މީޑިއާއިން ބުނީ އުޅަނދު މާސްގެ ބިމަށް ޖެއްސީ މިއަދު ހެނދުނު ޗައިނާ ގަޑިން 07:18 ގައި ކަމަށެވެ. ބިމަށް ތިރި ކުރުމަށް ފަހު އުޅަނދުގައިވާ ސޯލާ ޕެނަލްތައް ހުޅުވާލައި، ދުނިޔެއަށް ސިގްނަލެއް ފޮނުވަން ނެގީ 17 މިނެޓެވެ.
ޝުރޮންގް ރޮބޮޓް މާސްއަށް ފޮނުވީ މިދިޔަ ފެބްރުއަރީ މަހު އެ ޕްލެނެޓުގެ އޯބިޓަށް ޗައިނާއިން ފޮނުވި ޓިއަންވެން-1 އޯބިޓާ ގަ އެވެ. މިދިޔަ ފެބްރުއަރީ މަހުން ފެށިގެން މާށް ވަށާ ބުރު ޖަހަމުންދާ އެ އޯބިޓާއިން އަންނަނީ އެ ޕްލެނެޓުގެ ގިނަ ފޮޓޯތަކެއް ނަގައި، ދުނިޔެއަށް ފޮނުވަމުންނެވެ.
ފޮޓޯތަކުގެ ބޭނުމަކީ ޝުރޮންގް ރޮބޮޓު މާސްގެ ބިމަށް ތިރި ކުރަން އެންމެ ރައްކާތެރި ހިސާބެއް ދެނެގަތުމެވެ.
ޝުރޮންގް ރޮބޮޓުގެ ކުޑަ މޮޑެލްއެއް.-- ފޮޓޯ: ގެޓީ އިމޭޖަޒް
ޝުރޮންގް ރޮބޮޓް މާސްގެ ބިމުގައި ހަރަކާތްތެރިވާންވީ ގޮތުގެ ކޮމާންޑް ދިނުމަކީ ވެސް ގޮންޖެހުންތައް ހުރި ކަމެކެވެ. އެއީ މާސް އާއި ދުނިޔެއާ ދެމެދުގައި 320 މިލިއަން ކިލޯމީޓަރު ހުރުމުން ރޭޑިއޯ މެސެޖު އެ ފޯރަން 18 މިނެޓު ނަގާތީ އެވެ.
ނަމަވެސް ޗައިނާއިން އަންނަނީ ޖައްވީ އޮޕަރޭޝަންތަކުގައި ގޮންޖެހުންތައް ގިރާކޮށް ގިނަ ކުރިއެރުންތައް ހޯދަމުންނެވެ. އެގޮތުން މާސްގެ ބިމުގައި އުޅަނދެއް ޖައްސާފައި ވާއިރު، މީގެ ކުރިން ވަނީ ހަނދުގެ ބިމަށް ވެސް ދެ އުޅަނދު ޖައްސާފަ އެވެ.
މާސްގެ ބިމަށް ތިރި ކުރި ޝުރޮންގް ރޮބޮޓު ބޭނުންކޮށްގެން ސައިންޓިސްޓުން މަސައްކަތް ކުރާނީ މަދުވެގެން 90 ދުވަސް ވަންދެން އެ ތަނުގައި އޭތި ދުއްވާ، މާސްގެ ބިމާ ގުޅޭ މައުލޫމާތު އެއް ކުރުމަށެވެ. މާސްގައި އެއް ދުވަހުގެ ދިގުމިނަކީ 24 ގަޑިއިރާއި 39 މިނެޓެވެ.
ޗައިނާއިން މާސްއަށް ފޮނުވި ރޮބޮޓާއި އެމެރިކާގެ ޖައްވީ އިދާރާ، ނާސާއިން މީގެ ކުރިން މާސްއަށް ފޮނުވި އުޅަނދުތަކާ ދާދި އެއް ގޮތެވެ. ޝުރޮންގްގެ ބަރުދަނުގައި 240 ކިލޯ ހުރެ އެވެ. އެއަށް ހަކަތަ ލިބެނީ ސޯލާ ޕެނެލް ބޭނުންކޮށްގެންނެވެ.
އޭގައި ހަރުކޮށްފައިވާ ދިގު ދަނޑިއެއް ކަހަލަ އެއްޗެއްގައި ކެމެރާއެއް އިނދެ އެވެ. ކެމެރާއިން އެހީވާނީ އުޅަނދު ދުއްވުމަށާއި ފޮޓޯ ނެގުމަށެވެ. މާސްގެ ބިމުގައިވާ ވެއްޔާއި ގާ އަދި ފެން ނުވަތަ ގަނޑުފެން ފަދަ ތަކެތި ދިރާސާ ކުރަން އިތުރު ފަސް އާލާތް އޭގައި ހިމެނެ އެވެ.
