އިޒްރޭލާއި ހަމާސްއިން ހޯމަ ދުވަހުން ފެށިގެން މެދުކެނޑުމެއް ނެތި ބަދަލުކުރަމުންދާ ހަމަލާތަކުގެ ސަބަބުން ކުޑަކުދިން ހިމެނޭ ގޮތަށް ގިނަ ބަޔަކު މަރުވެއްޖެ އެވެ.
ހަމާސްއިން އެތައް ސަތޭކަ ރޮކެޓު ހަމަލާއެއް އިޒްރޭލަށް ދެމުން ދާއިރު، އިޒްރޭލުން އަންނަނީ އެއްވެސް ބެލުމެއް ނެތި ގާޒާއަށް ބޮން އަޅަމުންނެވެ.
ރޭގެ ހަމަލާތަކަށް ހުއްޓުމެއް ނައިސް މިއަދު ހެނދުނު ވެސް ކުރިއަށް އެބަ ދެ އެވެ. މިއީ 2014 ވަނަ އަހަރަށް ފަހު އިޒްރޭލާއި ހަމާސްއާ ދެމެދު ހިނގާ އެންމެ ބޮޑު ކުރިމަތިލުމެވެ.
ހަމަލާތަކުގައި ގާޒާއިން ފަލަސްތީނުގެ 35 މީހުން މަރުވި ކަމަށް އަރަބް ނިއުސްގައި ވެއެވެ. އޭގެ ތެރޭގައި 10 ކުޑަ ކުދިން ހިމެނެ އެވެ. އޭގެ އިތުރުން 200 އަށް ވުރެ ގިނަ މީހުން ޒަހަމްވި އެވެ.
އިޒްރޭލުން މަރުވީ ފަސް މީހުންނެވެ. އޭގެ ތެރޭގައި ތިން އަންހެނުންނާއި ކުޑަ ކުއްޖަކު ހިމެނެ އެވެ. އެ ގައުމުގައި ވެސް ގިނަ ބަޔަކަށް ޒަހަމްވެފައި ވެއެވެ.
ރޯދަ މަސް ފެށުނު ފަހުން ދެމުން އަންނަ ހަމަލާތައް އިޒްރޭލުން ރޭ ވަނީ ވަރުގަދަކޮށްފަ އެވެ. އެގޮތުން ބޮން އަޅާ ގާޒާގެ އުސް ޓަވަރެއް ބިމާ ހަމަކޮށްލި އެވެ.
ރައްދުގައި ހަމާސްއިން ދިޔެއީ ދެކުނު އިޒްރޭލުގެ އަޝްކެލޯން އަވަށަށް ރޮކެޓަކަށް ފަހު ރޮކެޓެއް ފޮނުވަމުންނެވެ.
އަޝްކެލޯން އަވަށުގެ ތެޔޮ ރައްކާ ކުރާ ފެސިލިޓީއެއްގައި ރޯވެ އަނދަނީ.-- ފޮޓޯ: އޭއެފްޕީ
ދެ ފަރާތުގައި ވެސް މަރުވާ މީހުންގެ އަދަދުތައް އިތުރުވަމުން ދާތީ ހަމަނުޖެހުން ނިމުމަކަށް ގެންނަން މިސްރުން ހުށަހެޅި ހުށަހެޅުމެއް ބަލައިނުގަންނާނެ ކަމަށް އިޒްރޭލުން ވަނީ ބުނެފަ އެވެ.
"މިސްރުން ވަނީ އިޒްރޭލާއި މިކަމުގައި ހިމެނޭ އެހެން ގައުމުތަކަށް ގުޅައިގެން ހާލަތު އިތުރަށް ގޯސްވިޔަ ނުދިނުމަށް ކުރެވޭނެ ކަންތައްތަކެއް ހުށަހަޅާފައި،" މިސްރުގެ ފޮރިން މިނިސްޓަރު ސާމިހު ޝުކްރީ ވިދާޅުވި އެވެ.
އެކަމަކު އަޅުގަނޑުމެން ބޭނުންވި ޖަވާބެއް ނުލިބުނު. -- ސާމިހް ޝުކްރީ
މިސްރުގެ ހުށަހެޅުން ގަބޫލު ނުކޮށް، އިޒްރޭލުގެ ބޮޑު ވަޒީރު ބެންޖަމިން ނަތަންޔާހޫ ވައުދުވެ ވަޑައިގެންނެވީ ގާޒާއަށް އިތުރަށް ބޮން އެޅުމަށެވެ.
"ހަމަލާތަކުގެ ބާރުގަދަކޮށް ހަމަލާތަކުގެ އަދަދު ވެސް އިތުރު ކުރާނަން،" ނަތަންޔާހޫ ވިދާޅުވި އެވެ.
އިޒްރޭލު އަސްކަރިއްޔާގެ ތަރުޖަމާނު ލެފްޓިނެންޓް ކާނަލް ޖޮނަތަން ކޮންރިކަސް ވިދާޅުވީ ގާޒާގެ ބޯޑަރު ކައިރިއަށް އިތުރު ސިފައިން ފޮނުވާނެ ކަމަށެވެ.
އެމެރިކާގެ ސްޓޭޓް ޑިޕާޓްމަންޓުން ވަނީ އިޒްރޭލާއި ހަމާސްއިން ވެސް ހަމަލާތައް ހުއްޓާލުމަށް ގޮވާލާފަ އެވެ.
އަރަބި ލީގުގެ ޗީފް އަހްމަދު އަބުލް ގެއިތް ވިދާޅުވީ ގާޒާއަށް ދެމުންދާ ހަމަލާތަކަކީ "ކުޑަ ކުދިންގެ ލޭ އޮހޮރުވައިގެން ކުޅޭ ޑްރާމާއެއް" ކަމަށެވެ.
މި މައްސަލާގައި ކުއްލި ބައްދަލުވުމެއް ބޭއްވުމަށް ފަހު އޯގަނައިޒޭޝަން އޮފް އިސްލާމިކް ކޯޕަރޭޝަނުން ވަނީ ގުދުސްގައި ތިބި ފަލަސްތީނު ރައްޔިތުންގެ ހިތްވަރަށް ތައުރީފުކޮށްފަ އެވެ.
ގާޒާގެ އިމާރާތަކަށް ބޮން އަޅާފައި.-- ފޮޓޯ: ނިއު ޔޯކް ޓައިމްސް
ގާޒާއަށް ދޭ ހަމަލާތައް އިތުރުވީ އިޒްރޭލުން ވެރިވެ ގަނެގެން އުޅޭ އިރުމަތީ ގުދުސްގައި ގިނަ ދުވަސްތަކެއް ވަންދެން ހަމަނުޖެހުން ހިނގުމަށް ފަހު އެވެ.
އެގޮތުން އަލް އަގްސާ މިސްކިތުގައި ހަމަނުޖެހުން ހިންގާ 200 އަށް ވުރެ ގިނަ ފަލަސްތީނު މީހުންނަށް އަނިޔާވި އެވެ. ގުދުސްގެ ހަމަނުޖެހުން ގުޅިފައި ވަނީ އެ ތަނުގައި ދިރިއުޅޭ ފަލަސްތީނު މީހުން ގެތަކުން ނެރެން އިޒްރޭލުން މަސައްކަތް ކުރުމާ އެވެ.
