ލިޒްބަން (މެއި 11) - މަޝްހޫރު ގިނަ ތަރިންތަކެއް ނެރުނު ސްޕޯޓިން ލިޒްބަން އިން މެޗަކުން ބަލިނުވެ، 19 އަހަރަށް ފަހު ޕޯޗުގީސް ލީގުގެ ޗެމްޕިއަންކަން ކަށަވަރުކޮށްފި އެވެ.
މިރޭ ބޮއަވިސްޓާ އަތުން 1-0 އިން ހޯދި މޮޅާ އެކު ޕޯޗުގީސް ލީގުގެ ޗެމްޕިއަންކަން ސްޕޯޓިން އިން މި ހޯދީ ބާކީ ދެ މެޗު އޮއްވަ އެވެ. މިއީ އެ ޓީމުން ލީގު ހޯދި 19 ވަނަ ފަަހަރެވެ. ސްޕޯޓިން އިން ލީގު ކާމިޔާބުކުރުމާ އެކު ފާއިތުވި 18 އަހަރަށް ފަހު ޕޯޗުގަލްގައި ބެންފީކާ އާއި ޕޯޓޯ ނޫން ޓީމަކަށް ލީގު ޗެމްޕިއަންކަން ހޯދީ އެވެ. މިދިޔަ އަހަރުތަކުގައި ޕޯޓޯ އިން 11 ފަހަރު ލީގު ހޯދި އެވެ. ބެންފީކާ އިން ހަތް ފަހަރު ތަށި އުފުލާލި އެވެ.
ސްޕޯޓިން އެއް ވަނައިގައި އޮތީ 32 މެޗުން 82 ޕޮއިންޓާ އެކު އެވެ. ދެ ވަނައިގައި އޮތް ޕޯޓޯ އަށް 32 މެޗުން ވަނީ 74 ޕޮއިންޓް ލިބިފަ އެވެ. އެ ޓީމުން ދެން އޮތް ދެ މެޗުން މޮޅުވިޔަސް ސްޕޯޓިންއާ ހަމަނުކުރެވޭނެ އެވެ. ތިން ވަނައިގައި އޮތް ބެންފީކާ އަށް ވަނީ 32 މެޗުން 70 ޕޮއިންޓް ލިބިފަ އެވެ.
މިރޭގެ މެޗުގައި ފެނިގެންދިޔަ ހަމައެކަނި ގޯލު ސްޕޯޓިން އަށް މެޗުގެ 36 ވަނަ މިނިޓްގައި ކާމިޔާބު ކޮށްދިނީ ޕައުލީނިއޯ އެވެ. މި ސީޒަނުގައި ސްޕޯޓިން އިން ޓީމެއްގެ ގޮތުގައި އަންނަނީ ތަފާތު މޮޅު ކުޅުމެއް ދައްކަމުންނެވެ. ސްޕޯޓިންގެ އެއް ތަރިއަކީ އެ ޓީމުގެ އެޓޭކްގައި މުހިއްމު ދައުރެއް އަދާކުރަމުން އަންނަ ޕެޑްރޯ ގޮންކާލްވޭސް އެވެ. އުމުރުން 22 އަހަރުގެ ޕެޑްރޯ ވަނީ 18 ގޯލު ޖަހައި ފަސް ގޯލު ޖަހަން ފުރުސަތު ތަނަވަސްކޮށްދީފަ އެވެ.
ލީގުގެ މެޗެއްގެ ތެރެއިން ޕެޑްރޯ ގޮންކާލްވޭސް ބޯޅަ ހިފައިގެން.-- ފޮޓޯ: އޭއެފްޕީ
މެޗު ފެށުމުގެ ކުރިން ސްޕޯޓިންގެ ގިނަ ސަޕޯޓަރުންތަކެއް ވަނީ އެ ޓީމުގެ ދަނޑު ކައިރިއަށް ޗެމްޕިއަން ޖަހާފައިވާ ބެނާތަކެއް ހިފައިގެން އެއްވެފަ އެވެ. އެ ސަޕޯޓަރުންތަކުގެ އެއްވުންތައް ރޫޅާލީ ފުލުހުންނެވެ.
ފާއިތުވި 20 ވަރަކަށް އަހަރު ސްޕޯޓިން މަޝްހޫރު ވެފައި އޮތީ ފެންވަރު ރަނގަޅު ކުޅުންތެރިން އުފައްދާ ކްލަބެއްގެ ގޮތުގަ އެވެ. އެ ޓީމުން 2001 ވަނަ އަހަރު ލީގު ކާމިޔާބުކުރި ފަހުން ޕްރޮފެޝަނަލް ފުޓްބޯޅަ އަށް ނެރެދިން ކުޅުންތެރިންނަށް ބަލާއިރު ކްރިސްޓިއާނޯ ރޮނާލްޑޯ، ބްރޫނޯ ފެނާންޑޭސް، ވިލިއަމް ކަވާލިއޯ، ރުއީ ޕެޓްރީޝިއޯ، އެރިކް ޑަޔާ، ސެޑްރިކް ސޮއާރޭސް، ނާނީ، މިގޭލް ވެލޯސޯ، ރަފީނިއާ ފަދަ ކުޅުންތެރިން ހިމެނެ އެވެ.
