އެމްއެމްޕީއާރުސީގެ ހިޔާނާތުން ޕްރޮސިކިއުޓަ ޖެނެރަލް ހުސެއިން ޝަމީމަށް މަންފާވި ކަން ލިސްޓުން ފެންނަން އެބައޮތް ކަމަށް ފަތުރަމުންދާ ވާހަކަ އޭނާ މިރޭ ދޮގުކުރައްވައިފި އެވެ.
ޝަމީމް ކުރެއްވި ޓުވީޓެއްގައި ވިދާޅުވީ އޭނާ އަށް އެމްއެމްޕީއާރުސީގެ ފައިސާ ލިބިވަޑައިގެންފައި ނުވާ ކަމަށެވެ.
ޕްރޮސިކިއުޓަ ޖެނެރަލަށް އަމާޒުކޮށްފައިވާ ތުހުމަތަށް އެ އޮފީހުން ވެސް މިރޭ ވަނީ ރައްދުދީފަ އެވެ.
ޕަބްލިކް ޕްރޮސިކިއުޓަރު އަދި މީޑިއާ އޮފިޝަލް އަހްމަދު ޝަފީއު މީޑިއާތަކަށް ފޮނުއްވި މެސެޖުގައި ވިދާޅުވީ އެމްއެމްޕީއާރުސީއާ ގުޅުން ހުރި ފައިސާ ޕްރޮސިކިއުޓަ ޖެނެރަލަށް ލިބިވަޑައިގެންނެވި ކަމަށް މީޑިއާއަކުން ރިޕޯޓްކުރި ވާހަކަތަކަކީ ހަގީގަތާ ހިލާފު ކަނޑައެޅިގެން ދޮގެއް ކަމަށެވެ.
"އެމްއެމްޕީއާރުސީގެ ހިޔާނާތާ ގުޅުން ހުރި އެއްވެސް ފައިސާއެއް އެއްވެސް އިރެއްގައި ޕްރޮސިކިއުޓަ ޖެނެރަލް އަލްއުސްތާޒު ހުސެއިން ޝަމީމަށް ލިބިވަޑައިނުގަންނަވާ ކަމުގެ ޔަގީންކަން އަރުވަމެވެ،" އެ މެސެޖުގައިވެ އެވެ.
ކުރީގެ ސަރުކާރުގައި ހިންގި ބޮޑު ހިޔާނާތުގެ ލިސްޓު ކަމަށް ބުނެ ސޯޝަލް މީޑިއާގައި ލިސްޓެއް ދައުރުކުރަނީ ތަހުގީގީ އިދާރާތަކުން ރައްޔިތުންގެ މަޖިލީހަށް މައުލޫމާތުތަކެއް ފޮނުވާފައި ވަނިކޮށެވެ. ތަހުގީގީ އިދާރާތަކުގައި މަޖިލީހުން އެދުނީ ހިޔާނާތުން މަންފާވި މީހުންނާއި ތަހުގީގު ލަސްވާ ސަބަބެއް ސާފުކޮށްދިނުމަށެވެ.
އެސެޓް ރިކަވަރީ ކޮމިޝަނުން މަޖިލީހަށް ހިޔާނާތާ ގުޅޭ ލިސްޓު ފޮނުވައި އެ އާއްމުނުކުރަން އެދުމުން ކޮމިޓީން ފުރަތަމަ ނިންމީ އެ ވަގުތަަށް ލިސްޓު އާއްމުނުކުރާށެވެ. އެކަމަކު ނަންތައް ހާމަކުރަން ގޮވާލަމުން ދަނިކޮށް މިރޭ ވަނީ ބައެއް މީހުންގެ ނަންތަކާ އެކު ބޮޑެތި ތުހުމަތުތަކެއް ސޯޝަލްމީޑިއާގައި ކޮށްފަ އެވެ.
އެކަމަކު ދައުރުވަމުންދާ ވާހަކަތަކާ ގުޅޭ ގޮތުން މަޖިލީހުން ވަކި އެއްޗެއް އަދި ނުބުނެ އެވެ.
އެސެޓް ރިކަވަރީ ކޮމިޝަނާއި އޭސީސީ އާއި ފުލުހުން ހިންގާ ޖޮއިންޓް އިންވެސްޓިގޭޝަންގައި އާއްމުކުރި ގޮތުގައި ލިސްޓުގައި ހިމެނެނީ 267 ނަމެކެވެ. އެކަމަކު މި ފަހުން މަޖިލީހަށް ފޮނުވި ލިސްޓަށް 14 ނަން އިތުރުވެ 281 ނަމެއް އެބައޮތް ކަމަށް މަޖިލީހުން ވަނީ ބުނެފަ އެވެ.
މަޖިލީހުން މި މައްސަލަ ބަލަން ފެށީ ތަހުގީގީ އިދާރާތަކުގައި ދިގުލައިގެން ގޮސް ނަތީޖާއެއް ނުނެރެވޭ ކަމުގެ ތުހުމަތާ އެކުގަ އެވެ.
