ޓިއުރިން (މެއި 11) - ޔޫރަޕިއަން ސުޕަ ލީގުން ވަކިވާން ޔުވެންޓަސް އަށް ދީފައިވާ މުއްދަތުގެ ތެރޭގައި އެ ޓީމުން އެ ގޮތަށް އަމަލުނުކޮށްފިނަމަ އަންނަ ސީޒަނުގައި އިޓާލިއަން ލީގުން އެ ޓީމަށް ފުރުސަތެއް ނޯންނާނެ ކަމަށް ބުނެ އިޓަލީގެ ފުޓްބޯޅަ ފެޑެރޭޝަނުން އިންޒާރެއް ދީފި އެވެ.
މިދިޔަ މަހު 18 ވަނަ ދުވަހު ޔޫރަޕްގެ ނަން މަޝްހޫރު 12 ކްލަބް އަޑީގައި އޮވެގެން އިއުލާނުކުރި ސުޕަ ލީގުން މި ވަގުތު ވަކިނުވެ އޮތީ ތިން ކްލަބެކެވެ. އެއީ ޔުވެންޓަސްގެ އިތުރުން ސްޕެއިނުގެ ބާސެލޯނާ އާއި ރެއާލް މެޑްރިޑް އެވެ. ސުޕަ ލީގުން ވަކިވި ޓީމުތަކަކީ އިންގްލެންޑްގެ މެންޗެސްޓާ ޔުނައިޓެޑް، މެންޗެސްޓާ ސިޓީ، ލިވަޕޫލް، އާސެނަލް، ޗެލްސީ، ޓޮޓެންހަމް އަދި ސްޕެއިނުގެ އެތުލެޓިކޯ މެޑްރިޑާއި އިޓަަލީގެ އޭސީ މިލާން އަދި އިންޓަ މިލާން އެވެ.
އިޓަލީގެ މީޑިއާ ރިޕޯޓްތައް ބުނާގޮތުން އަންނަ ސީޒަނަށް އިޓާލިއަން ލީގުގައި ޓީމުތައް ރަޖިސްޓްރީ ކުރާ މުއްދަތު އަންނަ މަހުގެ 20 އަށް ހަމަވާނެ އެވެ. އިޓާލީގެ ފެޑެރޭޝަނުން ޔުވެންޓަސް އަށް ސުޕަ ލީގުން ވަކިވާން ދީފައިވާ މުއްދަތު އެ ތާރީހުގައި ހަމަވާނެ އެވެ.
"ޔުވެންޓަސް އިން ގަވާއިދަށް އިހުތިރާމް ނުކުރާނަމަ އެ މީހުންނަށް ވެސް ފުރުސަތެއް ނޯންނާނެ. އަހަރެން ތަކުރާރުކޮށް ބުނާނެ އެއްޗަކީ އަންނަ ސީޒަނަށް ލީގުގެ ޓީމުތައް ރަޖިސްޓްރީ ކުރާއިރު ސުޕަ ލީގުން ވަކިނުވާ ޓިމުތަކަށް އިޓާލިއަން ލީގުން ވެސް ފުރުސަތެއް ނެތް،" އިޓަލީ ފުޓްބޯޅަ ފެޑެރޭޝަންގެ ރައީސް ގަބްރިއެލް ގްރަވީނާ ވިދާޅުވި އެވެ.
އޭނާ ވިދާޅުވީ ސުޕަ ލީގުން ޔުވެންޓަސް ވަކިވާން ކުރާ މަސައްކަތުގައި އެ ޓީމުން ޔުއެފާއާ ގެންދަން ބޭނުންވާ މަޝްވަރާތަކުގައި މެދުވެރިއެއްގެ ދައުރު އަދާކުރަން އިޓަލީގެ ފުޓްބޯޅަ ފެޑެރޭޝަން ތައްޔާރަށް އޮތް ކަމަށެވެ.
"ޔުއެފާ އާއި އިޓަލީ ފުޓްބޯޅަ ފެޑެރޭޝަނުން ބަލައިނުގަންނަ މުބާރާތެއްގައި ޔުވެންޓަސް އަށް ވާދަނުކުރެވޭނެ. މި މުބާރާތް އިންޓަނޭޝަނަލް ފުޓްބޯޅަ އަށް ރަނގަޅެއް ނޫން. އިޓަލީ ފުޓްބޯޅަ އަށް ވެސް. އަދި ޔުވެންޓަސް އަށް ވެސް ރަނގަޅެއް ނުވާނެ،" ގްރަވީނާ ވިދާޅުވި އެވެ.
ސުޕަ ލީގު ކުރިއަށް ގެންދަން ބޭނުންވި ކަމުގައި ވިޔަސް ފައުންޑާ މެމްބަރުންގެ ތެރެއިން ގިނަ ކްލަބްތަކެއް ލީގުން ވަކިވެފައިވުމުން ދެން މި ލީގު އިތުރަށް ކުރިއަށް ނުދާނެ ކަމަށް ޔުވެންޓަސްގެ ރައީސް އަންދްރެއާ އަގްނެލީ މީގެ ކުރިން ވަނީ ވިދާޅުވެފަ އެވެ. އެކަމަކު ފަހުން އަނެއްކާ ވެސް އޭނާ ވަނީ ސުޕަ ލީގު ދިފާއުކޮށް ވާހަކަ ދައްކަަވައިފަ އެވެ.
ސުޕަ ލީގުން ވަކިވެ ކުރެވުނު ކުށަށް މައާފަށް އެދެން ޔުއެފާ އިން އެންގި އެންގުމާ އެއްގޮތަށް އަމަލުނުކުރަން ރެއާލާއި ބާސެލޯނާ އަދި ޔުވެންޓަސް އިން ވަނީ ނިންމައިފަ އެވެ. ޔުއެފާ އިން ވަނީ ސުޕަ ލީގުން ވަކިވި ޓީމުތަކަށް ސަސްޕެންޝެނެއް ނުދީ ޖޫރިމަނާކޮށްފަ އެވެ. ސުޕަ ލީގުގައި މި ވަގުތު އޮތް ރެއާލާއި ބާސެލޯނާ އަދި ޔުވެންޓަސް އަށް ޔުއެފާގެ ސަސްޕެންޝަނެއް އައުމުގެ ފުރުސަތު އެބައޮތެވެ.
