ކޮވިޑާ ދެކޮޅަށް ފައިޒާއިން އުފެއްދި ވެކްސިން އުމުރުން 12 އަހަރުން މަތީގެ ކުދިންނަށް ޖެހުމުގެ ހުއްދަ އެމެރިކާގައި ދީފި އެވެ. ހުއްދަ ދީފައި ވާތީ އަންނަ ބުރާސްފަތި ދުވަހު އެ އުމުރުގެ ކުދިންނަށް ވެކްސިން ދޭން ފަށާނެ ކަމަށް ބެލެވެ އެވެ.
ކޮވިޑާ ދެކޮޅަށް ހެދި ގިނަ ވެކްސިންތައް ޖަހަނީ ހަމައެކަނި ބޮޑެތި މީހުންގެ ގަޔަށެވެ. ނަމަވެސް ފައިޒާ ވެކްސިން މީގެ ކުރިން 16 އަހަރުން މަތީގެ ކުދިންގެ ގަޔަށް ޖެހި އެވެ. އެމެރިކާއިން މި ވެކްސިން 12 އަހަރުން މަތީގެ ކުދިންނަށް ދޭން ނިންމި އިރު ކެނެޑާއިން ވެސް އަމަލު ކުރަނީ އެ ގޮތަށެވެ.
އުމުރުން 12 އަހަރުން މަތީގެ ކުދިންނަށް ވެކްސިން ޖެހުމުގެ ހުއްދަ ދިނުމުން ރައީސް ޖޯ ބައިޑެން އެކަމަށް މަރުހަބާ ވިދާޅުވި އެވެ. މިއީ "ވައިރަހާ ދެކޮޅަށް ކުރާ ހަނގުރާމައިގައި ލިބުނު ކުރިއެރުމެއް"ގެ ގޮތުގައި ސިފަކުރެއްވި އެވެ.
ކޮވިޑް ޖެހޭ ގިނަ ކުޑަކުދިންގެ އެއްވެސް އަލާމާތެއް ނުފެނެ އެވެ. އަލާމާތް ފެންނަ ކުދިން ވެސް މާ ބޮޑަކަށް ބައްޔެއް ނުވެ އެވެ. ނަމަވެސް ކުދިންގެ ގައިން އެހެން މީހުން ގަޔަށް ފަސޭހަކަމާއެކު ވައިރަސް ވާސިލްވެ އެވެ. އަދި ބައެއް ހާލަތްތަކުގައި ބޮޑަށް ބަލިވުމުގެ ފުރުސަތު އޮވެ އެވެ.
ސިއްހީ އިދާރާތަކުން ބުނެފައިވާ ގޮތުގައި މި ބަލިމަޑުކަން ނިމުމަކަށް ގެނެސް އާއްމު ދިރިއުޅުމަށް ރުޖޫއަވުމަށް ކުޑަކުދިންނަށް ވެކްސިން ދިނުން މުހިއްމެވެ.
އުމުރުން 12 އަހަރުގެ ކުދިންނަށް ފައިޒާ ވެކްސިން ޖެހުމުގެ ހުއްދަ އެމެރިކާގެ ފުޑް އެންޑް ޑްރަގް އެޑްމިނިސްޓްރޭޝަން (އެފްޑީއޭ) އިން ދިނީ 2000 އަށް ވުރެ ގިނަ ކުދިން ބައިވެރިވި ދިރާސާއަކަށް ފަހު އެވެ.
ދިރާސާއިން ދެއްކި ގޮތުގައި ވެކްސިން ފުރިގަމަ ކުރި އެއްވެސް ކުއްޖަކަށް ކޮވިޑް ޖެހިފައެއް ނުވެ އެވެ. އޭގެ އިތުރުން ކުދިންނަށް ވެކްސިން ޖެހުމުން ބޮޑެތި މީހުންގެ ގައިގައި އުފެދޭ އެންޓިބޮޑީޒް އަށް ވުރެ ވަރުގަދަ އެންޓިބޮޑީޒް އެ ކުދިންގެ ގައިގައި އުފެދިފައި ވެއެވެ.
ވެކްސިނުން ކުދިންނަށް ދިމާވީ ބޮޑެތި މީހުންނަށް ވެސް ދިމާވާ ސައިޑް އިފެކްޓެވެ. އެއީ ވެކްސިން ޖެހި ސަރަހައްދަށް ތަދުވުމާއި، ހުން އައިމާއި، ފިނިވުމާއި ގައިގައި ރިއްސުން ފަދަ ކަންކަމެވެ.
ފައިޒާއިން ވަނީ ޔޫރަޕުގައި ވެސް 12 އަހަރުން މަތީގެ ކުދިންނަށް ވެކްސިން ޖެހުމުގެ ހުއްދައަށް އެދިފަ އެވެ. އެ ކުންފުނީގެ އިތުރުން މޮޑާނާއިން ވެސް އަންނަނީ ކުޑަކުދިންނަށް ވެކްސިން ދިނުމުގެ ހުއްދަ ހޯދަން މަސައްކަތް ކުރަމުންނެވެ.
އުމުރުން 12 އަހަރާއި 17 އަހަރާ ދެމެދުގ ކުދިން ބައިވެރިވެގެން މޮޑާނާއިން ކުރި ދިރާސާއިން ކުދިންނަށް ރައްކާތެރިކަން ލިބޭ ކަމަށާއި މާ ބޮޑު ސައިޑް އިފެކްޓެއް ދިމާނުވާ ކަމަށް ދައްކާފައި ވެއެވެ.
އޭގެ އިތުރުން އެމެރިކާގެ ނޮވަވެކްސް ކުންފުނިން ވެސް އަންނަނީ އުމުރުން 12 އަހަރާއި 17 އަހަރާ ދެމެދުގެ ކުދިން ބައިވެރިކޮށްގެން ދިރާސާއެއް ކުރަމުންނެވެ.
ބޮޑެތި ކުންފުނިތަކުގެ ކުރިއަށް އޮތް ފިޔަވަޅަކީ އެއަށް ވުރެ ވެސް ކުޑަ ކުދިންނަށް ވެކްސިން ރަނގަޅުތޯ ބެލުމެވެ. އެގޮތުން ފައިޒާ އާއި މޮޑާނާއިން އަންނަނީ އުމުރުން ހަ މަހާއި 11 އަހަރާ ދެމެދުގެ ކުދިންގެ ދިރާސާތައް ކުރަމުންނެވެ.
އެސްޓްރަޒެނެކާގެ ދިރާސާގައި ބައިވެރިވަނީ އުމުރުން ހަ އަހަރާއި 17 އަހަރާ ދެމެދުގ ކުދިންނެވެ. އޭގެ އިތުރުން ޗައިނާގެ ސިނޮވެކުން ދާދި ފަހުން ބުނީ އުމުރުން ތިން އަހަރުން މަތީގެ ކުދިންނަށް އެ ވެކްސިން ރައްކާތެރިކަން އަންގައިދޭ ދިރާސާތައް ކަމާ ބެހޭ އިދާރާއަށް ހުށަހަޅާފައިވާ ކަމަށެވެ.
