އިންޑިއާއަށް ދިމާވެފައިވާ ކޮވިޑު ކާރިސާއަށް އޮތް ހަމައެކަނި ދިގު ރާސްތާގެ ހައްލަކީ ވެކްސިން ޖެހުން ކަމަށް އެމެރިކާގެ އެންމެ އިސް ސިއްހީ އޮފިޝަލް ޑރ. އެންތަނީ ފައުޗީ ވިދާޅުވެއްޖެ އެވެ.
"މިކަން ނިމެން އޮތް ގޮތަކީ މީހުން ވެކްސިން ޖެހުން. އިންޑިއާއަކީ ދުނިޔޭގެ އެންމެ ބޮޑު ވެކްސިން އުފައްދާ ގައުމު. އެ މީހުންނާ ބޭނުންވާ ތަކެތި އިންޑިއާ ތެރެއިން ވެސް އަދި ބޭރުން ވެސް ލިބެން އެބަ ޖެހޭ،" އެމެރިކާގެ ރައީސް ޖޯ ބައިޑެންގެ ޗީފް މެޑިކަލް އެޑްވައިޒަރު އޭބީސީ ނިއުސްއަށް ވިދާޅުވި އެވެ.
ފައުޗީ ވިދާޅުވީ އެހެން ގައުމުތަކުން ވެކްސިން އުފައްދަން ބޭނުންވާ ރިސޯސް ނުވަތަ ވެކްސިން އިންޑިއާއަށް ފޯރުކޮށްދޭން ޖެހޭ ކަމަށެވެ. އެންމެ މުހިއްމީ ބޮޑެތި ކުންފުނިތަކުގެ ކެޕޭސިޓީ އިތުރުކޮށް މިލިއަނުން ވެކްސިން ޑޯޒް އުފެއްދޭނެ ގޮތް ހެދުން ކަމުގައި އޭނާ ފާހަގަކުރެއްވި އެވެ.
އޭގެ އިތުރުން ބަލިމަޑުކަން ފެތުރުން ފެށުމުގެ މީގެ އަހަރެއްހާ ދުވަސް ކުރިން ޗައިނާއިން އެޅި ފަދަ އެމެޖެންސީ ހޮސްޕިޓަލްތައް އިންޑިއާއަގައި އަޅަން ފައުޗީ ގޮވާލެއްވި އެވެ.
އެކަން އެބަ ކުރަން ޖެހޭ. ހޮސްޕިޓަލް އެނދެއް ނުލިބިގެން މީހުން މަގުމަތީގައި މަރުވިޔަ ދީގެން ނުވާނެ. އޮކްސިޖަން ހާލަތު ވަރަށް ކްރިޓިކަލް. މީހުންނަށް ނޭވާ ނުލެވޭއިރު އޮކްސިޖަން ނުލިބުމަކީ ހިތްދަތި މަންޒަރެއް. -- ޑރ. އެންތަނީ ފައުޗީ
އުމުރުން 80 އަހަރުގެ ފައުޗީ ވިދާޅުވީ އިންޑިއާއަށް ދިމާވެފައިވާ އަނެއް މައްސަލައަކީ ބަލި ފެތުރުން ހުއްޓުވާނެ ގޮތެއް ނޭނގުން ކަމަށެވެ. އޭނާ ގޮވާލެއްވީ މުޅި އިންޑިއާ ލޮކްޑައުނަކަށް ގޮސްގެން ހާލަތު ކޮންޓްރޯލް ކުރުމަށެވެ.
"ވެކްސިނަކީ އެއް ގޮތް. އެކަމަކު އެހެން ގޮތްތައް ވެސް އެބަ ހުރި. މިސާލަކަށް ސަރުކާރު ބަންދު ކުރުން. މީގެ ކުރިން ވެސް އަޅުގަނޑު އިންޑިއާއަށް ލަފާ ދިނީ މިގޮތަށް،" ފައުޗީ ފާހަގަކުރެއްވި އެވެ.
އިންޑިއާއަށް ކުރިމަތިވެފައިވާ ކޮވިޑުގެ ދެ ވަނަ ރާޅުގައި ދުވާލެއްގައި ހަތަރު ލައްކަ މީހުން ޕޮޒިޓިވްވެ ތިން ހާހެއްހާ މީހުން ދަނީ މަރުވަމުންނެވެ. މި ހާލަތު ބަދަލުވުމުގެ ނިޝާނެއް އަދިވެސް ނުފެނެ އެވެ.
ގިނަ ގައުމުތަކުން މެދުކެނޑުމެއް ނެތި އިންޑިއާއަށް އެހީތެރިކަން ފޯރުކޮށްދެމުން ދާއިރު، ޑުބާއީއިން ވަނީ ބޮޑެތި ސިޓީތަކަށް ގަވާއިދުން ސީދާ ފްލައިޓުތައް ބާއްވާ އެހީ ފޯރުކޮށްދޭން ފަށާފަ އެވެ.
