ޕެރިސް (މެއި 10) - ފްރެންޗް ލީގުގައި މިރޭ ރެެނެސްއާ 1-1 އިން އެއްވަރުވެ، ލީގު ދިފާއުކުރަން ޕީއެސްޖީން ކުރާ މަސައްކަތުގައި ވަރަށް ބޮޑު އުނދަލަކާ ކުރިމަތިލާން ޖެހިއްޖެ އެވެ.
އެންމެ ފަހުގެ ޗެމްޕިއަން ޕީއެސްޖީ މިރޭ އެއްވަރުވުމުން ލީގުގެ އެއް ވަަނައިގައި ލިލް އަށް ވަނީ ތިން ޕޮއިންޓުގެ ލީޑެއް ލިބިފަ އެވެ. ލީގުގައި ބާކީ ދެ މެޗު އޮތްއިރު، ލިލް އެއް ވަނައިގައި އޮތީ 36 މެޗުން 79 ޕޮއިންޓާ އެކު އެވެ. ދެ ވަނައިގައި އޮތް ޕީއެސްޖީ އަށް 36 މެޗުން 76 ޕޮއިންޓް ލިބިފައިވާއިރު، ތިން ވަނައިގައި އޮތީ މިރޭ ރެއިމްސް އަތުން 1-0 އިން މޮޅުވި މޮނާކޯ އެވެ. މޮނާކޯ އަށް 36 މެޗުން ވަނީ 74 ޕޮއިންޓް ލިބިފަ އެވެ. ލިޔޯން ހަތަރެއްގައި އޮތީ 36 މެޗުން 73 ޕޮއިންޓާ އެކު އެވެ.
ރެނެސް ދަނޑުގައި މިރޭ ކުޅުނު މެޗުގެ ފުރަތަމަ ހަމަލާ އުފެއްދީ ޕީއެސްޖީންނެވެ. އެންޑަ ހެރޭރާ ޖެހި ބޯޅަ ދިޔައީ ގޯލާ ސީދާނުވެ ބޭރުންނެވެ. މެޗުގެ 29 ވަނަ މިނިޓްގައި ރެނެސް އިން ޖެހި ގޯލެއް ވަނީ އޮފްސައިޑް ކަމަށް ނިންމައިފަ އެވެ. އޭގެ ފަހުން ކޮލިން ޑަގްބާ ނަގައިދިން ބޯޅައަކުން ޕީއެސްޖީގެ މޮއިސް ކީން އެ ޓީމަށް ޖަހައިދިން ގޯލު ބަލައިނުގަތީ ޑަގްބާ އެ ހުރަސް ނެގުމުގެ ކުރިން ބޯޅަ ބޭރުވެފައިވާތީ އެވެ.
ފުރަތަމަ ހާފުގެ އިތުރު ވަގުތުގައި ޕީއެސްޖީ އަށް ލީޑުނަގައިދިނީ ޕެނަލްޓީ އަކުން ނޭމާ އެވެ. މިއީ ރެނެސްގެ ކުޅުންތެރިއަކު ޕީއެސްޖީގެ ލަވިން ކުރްޒާވާ އަށް ކުރި ފައުލަކަށް ރެފްރީ ދިން ޕެނަލްޓީއެކެވެ. މެޗުގެ 70 ވަނަ މިނިޓްގައި ރެނެސް އަށް އެއްވަރުކޮށްދިން ގޯލު ޖެހީ ސޭރިހޫ ގިރާސީ އެވެ. ބެންޖަމިން ބޯރިގާޑް ކޯނަރަކުން ނަގައިދިން ބޯޅަ ގިރާސީ ވަނީ ބޮލުން ގޯލުގެ ތެރެއަށް ފޮނުވާލައިފަ އެވެ.
ޕީއެސްޖީން މެޗު ނިންމާލީ އެއް ކުޅުންތެރިއަކު މަދުކޮށެވެ. އެއީ މެޗުގެ 87 ވަނަ މިނިޓްގައި އެ ޓީމުގެ ޑިފެންޑަރު ޕްރެސްނެލް ކިމްޕެމްބޭ އަށް ރަތް ކާޑެއް ދެއްކުމުންނެވެ. އޭނާ އަށް ސީދާ ރަތް ކާޑެއް ދައްކަން ރެފްރީ ނިންމީ ރެނެސްގެ ބެލްޖިއަމް ވިންގް ޖެރެމީ ޑޮކޫ އަށް ކުރި ނުރައްކާތެރި ފައުލަކަށެވެ.
ތޯމަސް ޓުޗެލްގެ ކޯޗުކަމުގައި ސީޒަނުގެ ކުރީކޮޅުގައި ކުޅުނު ޕީއެސްޖީ އަށް އޭރު ނަތީޖާ ނެރުމުގައި ގިނަ މައްސަލަތަކެއް ދިމާވި އެވެ. އެހެންވެ ޓުޗެލް ވަކިކޮށް ޖެނުއަރީ މަހު މައުރީސިއޯ ޕޮޗެޓީނޯއާ ޕީއެސްޖީ ހަވާލުކުރި ފަހުން އެ ޓީމުގެ ނަތީޖާތައް ރަނގަޅުވި ނަމަވެސް މުހިއްމު ބައެއް މެޗުތަކުގައި ޕޮއިންޓްތަކެއް ގެއްލުނެވެ. ލީގު ހޯދުމުގެ ރޭހުގައި ފަހަތަށް ދިޔަ ސަބަަބަކީ ވެސް އެއީ އެވެ.
ބާކީ ދެ މެޗުން މޮޅުވެގެން ލިލް އަށް ލީގު ޗެމްޕިއަންކަން ހޯދޭނެ އެވެ. އެހެންވެއްޖެނަމަ މިއީ ފާއިތުވި އަށް އަހަރު ތެރޭ ޕީއެސްޖީ ނޫން ޓީމަކުން ފްރެންޗް ލީގު ހޯދާނެ ދެ ވަނަ ފަހަރެވެ. ޕީއެސްޖީ ނޫން ޓީމަކަށް މިދިޔަ އަހަރުތަކުގައި ލީގު ހޯދުނީ 2017 ވަނަ އަހަރު މޮނާކޯ އަށެވެ.
