ޓިއުރިން (މެއި 10) - އިޓާލިއަން ލީގުގައި މިރޭ ޔުވެންޓަސް އަތުން 3-0 އިން މޮޅުވެ އޭސީ މިލާނުން ލީގުގެ ތިން ވަަނަ އަށް ޖެހިލައިފި އެވެ.
މެޗަށް ނުކުތްއިރު ފަސް ވަނައިގައި އޮތް މިލާނުން ހޯދި މޮޅާ އެކު ތިން ވަނަ އަށް ޖެހިލިއިރު، ޔުވެންޓަސް ވެއްޓުނީ ފަސް ވަނަ އަށެވެ. ލީގުގެ އެއް ވަނައިގައި ޗެމްޕިއަންކަން ކަށަވަރުކޮށްފައިވާ އިންޓަ މިލާން އޮތީ 35 މެޗުން 85 ޕޮއިންޓް ހޯދައިގެންނެވެ. ދެ ވަނައިގައި އޮތީ މިރޭ ޕާމާ އަތުން 5-2 އިން މޮޅުވި އެޓަލަންޓާ އެވެ. އެޓަލަންޓާ އާއި މިލާނަށް 35 މެޗުން 72 ޕޮއިންޓް ލިބިފައިވާއިރު، އެޓަލަންޓާ އަށް ކުރި ލިބެނީ ހެޑް ޓު ހެޑް ގަވާއިދުންނެވެ. ނަޕޯލީ ހަަތަރެއްގައި އޮތީ 35 މެޗުން 70 ޕޮއިންޓާ އެކު އެވެ.
ޗެމްޕިއަންސް ލީގުގެ ޖާގަތަކުން ބޭރުގައި، ލީގުގެ ފަސް ވަނައިގައި މި ވަގުތު އޮތް ޔުވެންޓަސް އަށް 35 މެޗުން ވަނީ 69 ޕޮއިންޓް ލިބިފަ އެވެ. ގަދަ ފަސް ޓީމު ތެރޭގައި އޮތް ޓީމުތަކަށް ލީގުގައި ބާކީ އޮތީ ކޮންމެ ޓީމަކަށް ވެސް ތިން މެޗެވެ.
ޔުވެންޓަސް ދަނޑުގައި ކުޅުނު މެޗު ފަށައިގެން ދެ ޓީމުގެ ފަރާތުން ރަނގަޅު ކުޅުމެއް ފެނިގެންދިޔަ މި މެޗުގައި މިލާނުން ލީޑުނެގީ ފުރަތަމަ ހާފުގެ އިތުރު ވަގުތުގައި ބްރާހިމް ޑިއާޒް ޖެހި ގޯލުންނެވެ. އޭނާ ފޮނުވާލި ބޯޅަ އަމާޒުވީ ގޯލުގެ މަތީ ކަނަށެވެ. މެޗުގެ 58 ވަނަ މިނިޓްގައި މިލާނަށް ލީޑުނަގައިދޭން ފްރޭންކް ކެސިއޭ ޖެހި ޕެނަލްޓީ ޔުވެންޓަސް ކީޕަރު ވޮޒްޝިއޭ ޝެޒްނީ ވަނީ މަތަކޮށްފަ އެވެ.
މިލާންގެ ކީޕަރު ޖިއަންލުއީޖީ ޑޮންނަރުންމާ ވަނީ ޔުވެންޓަސްގެ ކުޅުންތެރިން ފޮނުވާލި ނުރައްކާތެރި ހަމަލާތައް ހުއްޓުވައިފަ އެވެ. އެ ގޮތުން ރޮޑްރީގޯ ބެންޓަންކޫރް ނަތީޖާ ހަމަހަމަކުރަން ޖެހި ޝޮޓެއް މަތަކުރި އެވެ. މެޗުގެ 78 ވަނަ މިނިޓްގައި މިލާނުން ލިބުނު ފުރުސަތުގެ ބޭނުން ހިފައި ލީޑުފުޅާކުރި އެވެ. އިސްމާއިލް ބެނަޝީއޭ ތަަނަވަސްކޮށްދިން ފުރުސަތަކުން އަންޓޭ ރެބިޗް ފޮނުވާލި ބޯޅަ އަމާޒުވީ މަތީ ކަނަށެވެ. ރެބިޗް ކުޅެން އެރީ ޒަލަޓާން އިބްރަހިމޮވިޗްގެ ބަދަލުގަ އެވެ. އިބްރަހިމޮވިޗް ބަދަލުކުރީ ކަކުލަށް ލިބުނު އަނިޔާއެއްގެ ސަބަބުންނެވެ.
މިލާނުން ދެ ވަނަ ގޯލު ޖެހިތާ ހަތަރު މިނިޓް ފަހުން ހިލޭ ޖެހުމަކުން ހަކަން ޗަނޮނޮގްލޫ ނަގައިދިން ބޯޅަ ފިކާޔޯ ޓޮމޯރީ ވަނީ ބޮލުން ގޯލުގެ ތެރެއަށް ފޮނުވާލައި އެ ޓީމަށް ތިން ވަނަ ގޯލެއް ޖަހައިދީފަ އެވެ. މި ގޯލު ޖެހިއިރު ޗެލްސީގެ ލޯން އެއްބަސްވުމެއްގެ ދަށުން ކުޅެމުން އަންނަ ޓޮމޯރީ ހުއްޓުވަން ޔުވެންޓަސް ޑިފެންޑަރުންނަށް މާ ބޮޑު ކަމެއް ނުކުރެވުނެވެ.
ޔުވެންޓަސްގެ ކުރިއަށް ކުޅޭ ކްރިސްޓިއާނޯ ރޮނާލްޑޯ އާއި އަލްވާރޯ މޮރާޓާ އަށް މި މެޗުގައި މާ އެދެވޭ ކުޅުމެއް ނުދެއްކުނެވެ.
އެންމެ ފަހުން ލީގުގައި ޔުވެންޓަސް ދަނޑުގައި މިލާނާ ދެކޮޅަށް ކުޅުނު ނުވަ މެޗުން ޔުވެންޓަސް މޮޅުވި އެވެ. އެކަމަކު މިރޭ މިލާނުން މިވަނީ ޔުވެންޓަސްގެ މައްޗަށް ފުރިހަމަ މޮޅެއް ހޯދައިފަ އެވެ. ދިހަ އަހަރު ތެރޭ ފުރަތަމަ ފަހަރަށް ޔުވެންޓަސް އަށް ލީގު ގެއްލުމުން އެ ޓީމުގެ ކޯޗު އަންދްރެއާ ޕިރްލޯ އަށް ކޯޗުގެ މަގާމު ދެމެހެއްޓޭނެ ކަމާ މެދު ވަނީ ވަރަށް ބޮޑަށް ސުވާލު އުފެދިފަ އެވެ.
