އޭއެފްސީ ކަޕުގެ ޕްރޮޓޮކޯލާ ހިލާފުވެ އެނބުރި ގައުމަށް ދާން ޖެހުނު އިންޑިއާގެ ބެންގަލޫރު އެފްސީން މާދަމާ ހަވީރު ރާއްޖޭން ފުރާ ގޮތަށް ހަމަޖެހިއްޖެ އެވެ.
މުބާރާތުގެ ޕްލޭއޮފުގައި އަންގާރަ ދުވަހު ރާއްޖޭގެ ކްލަބް އީގަލްސްއާ ދެކޮޅަށް ކުޅެން އައި ބެންގަލޫރުގެ ޓީމުގެ ކުޅުންތެރިންތަކާއި އޮފިޝަލުންތަކެއް ޕްރޮޓޮކޯލާ ހިލާފުވެ ހޮޓަލުން ނުކުތުމުން، ރާއްޖޭގެ ސްޕޯޓްސް މިނިސްޓަރު ވަނީ އެ ޓީމު ރާއްޖޭން ދިއުމަށް އަންގައިފަ އެވެ.
މި މެޗު ކުޅެން ރާއްޖެ އައުމަށް ބެންގަލޫރަށް ދިވެހި ސަރުކާރުން ހުއްދަ ދިނީ އޭއެފްސީ އާއި އެޗްޕީއޭގެ ހަރުކަށި ފިޔަވަޅުތަކަށް ތަބާވާނެ ކަމުގެ ޔަގީންކަން ހޯދުމަށް ފަހު އެވެ. އެހެންވެ އެ ކްލަބުން އެއާ ހިލާފުވުމުން މިނިސްޓަރު ވަނީ ވަރަށް ބޮޑަށް ހިތްހަމަނުޖެހުން ފާޅުކުރައްވައިފަ އެވެ.
އަދި ސަރުކާރުގެ ރުހުން ނެތުމާ އެކު މި ވަގުތު އޭއެފްސީ ކަޕްގެ މެޗުތައް މާލޭގައި ހޯސްޓް ނުކުރެވޭނެކަން އެފްއޭއެމުން އޭއެފްސީ އަށް އެންގި އެވެ. އެއާ އެކު އޭއެފްސީން ވަނީ ޕްލޭއޮފުގެ އިތުރުން ގްރޫޕް ސްޓޭޖް ފަސްކޮށްފަ އެވެ.
ބެންގަލޫރު ޓީމު ފުރުމަށް ހަމަޖެހިފައިވަނީ އިންޑިގޯގެ ފްލައިޓަކުން މާދަމާ ހަވީރު 5 ޖަހާއިރެވެ. އެ ޓީމު އެނބުރި ދިއުމުގެ ހުރިހާ ހަރަދެއް ކުރަން ޖެހޭނީ އަމިއްލަ އަށް ކަމަށް އޭއެފްސީން ވަނީ އަންގައިފަ އެވެ.
އެ ކްލަބުން ނެރުނު ބަޔާނެއްގައި ވަނީ ސިއްހަތާއި ރައްކާތެރިކަމުގެ ފިޔަވަޅުތަކަކާ ހިލާފުވެވުނީތީ މައާފަށް އެދިފަ އެވެ. އަދި ކްލަބުން މިކަމުގައި އެތެރޭގެ ފިޔަވަޅުތަކެއް އަޅާނެ ކަމަށް ބުނެފައިވެ އެވެ.
މި މައްސަަލައިގައި މައާފަށް އެދޭ ކަމަށާއި އެ ކުޅުންތެރިންނާ މެދު ހަރުކަށި ފިޔަވަޅު އަޅާނެ ކަމަށް އެ ކްލަބުގެ ސީއީއޯ ޕާތު ޖިންދާލް މިއަދު ހެނދުނު ވަނީ ވިދާޅުވެފަ އެވެ.
އެކަމަކު މިއީ މެނޭޖްމަންޓުގެ ފެއިލްވުމެއް ކަމަށް ނުދެކި، ހާލަތުގެ ޒިންމާ ނުނަގައި ކުޅުންތެރިންގެ ބޮލުގައި މިކަން އެޅުވުމުން އޭނާ އަށް އިންޑިއާގައި އަންނަނީ ފާޑުކިޔަމުންނެވެ. ޖިންދާލް އަކީ އިންޑިއަން ސުޕަ ލީގު ކްރިކެޓް މުބާރާތުގައި ވާދަކުރާ ދިއްލީ ކެޕިޓަލްސްގެ ވެސް ސީއީއޯ އެވެ.
