އޭއެފްސީ ކަޕްގެ ދެކުނު އޭޝިއާގެ ގްރޫޕްގެ ޕްލޭއޮފް މެޗަށް މާލެ އައިސްފައިވާ އިންޑިއާގެ ބެންގަލޫރު އެފްސީން ހޮޓަލުން ނުކުމެ ޕްރޮޓޮކޯލާ ހިލާފުވުމުން ޔޫތު މިނިސްޓަރު އަހުމަދު މަހުލޫފް ވަރަށް ބޮޑަށް ހިތްހަަމަނުޖެހުން ފާޅުކުރައްވައިފި އެވެ.
މިނިސްޓަރު މަހުލޫފް މިރޭ ކުރެއްވި ޓްވީޓެއްގައި ވަނީ އޭއެފްސީ އާއި ރާއްޖޭގެ ހެލްތު ޕްރޮޓެކްޝަން އެޖެންސީ (އެޗްޕީއޭ)ގެ ގައިޑްލައިންތަކާއި ހިލާފަށް ބެންގަލޫރު އަމަލުކޮށްފައިވާތީ އެ ޓީމު މި ހިނދުން ފެށިގެން ރާއްޖެ ދޫކޮށްދިއުމަށް އެދޭ ކަމަށް ވިދާޅުވެފަ އެވެ.
"އަހަރެމެން މީގެ މަސްތަކެއް ކުރިން ދިން ބަހުގެ އިތުބާރު ދަމަހައްޓައި ކޮވިޑް ކޭސްތައް މިހާ ގިނައިރު އަދި އާންމުންގެ ޕްރެޝަރާ އެކު ވެސް މުބާރާތް ބޭއްވޭތޯ މި ބަލަނީ. އެކަމަކު މި ކަހަލަ ކަމަކަށް (ގައިޑްލައިނާ ހިލާފުވެ ކުރާ ކަމަކަށް) ފުރުސަތެއް ނުދެވޭނެ،" މަހުލޫފް ކުރެއްވި ޓްވީޓްގައިވެ އެވެ.
މިނިސްޓަރު ކުރެއްވި އިތުރު ޓްވީޓެއްގައި ވިދާޅުވެފައިވަނީ ބެންގަލޫރާއި އީގަލްސް ކުޅެން އޮތް މެޗު ދެން ކުރިއަށް ނުގެންދެވޭނެ ކަމަށާއި ގްރޫޕް ސްޓޭޖުގެ މެޗުތައް ފަސްކުރަން އެކަމާ ބެހޭގޮތުން އޭއެފްސީ އާއި އެފްއޭއެމާ މަޝްވަރާކުރާނެ ކަމަށެވެ.
އިއްޔެ ހަވީރު ބެންގަލޫރު ޓީމު ރާއްޖެ އައިސްފައި އެ ޓީމު ތިބޭ ހޮޓެލް ޖެން އަށް ޗެކިން ވުމުގެ ކުރިން ވަނީ ކޮވިޑަށް ޓެސްޓްކޮށްފަ އެވެ. ބެންގަލޫރުގެ ކުޅުންތެރިންނާއި އޮފިޝަލުންގެ ޓެސްޓް ވަނީ ނެގެޓިވްވެފަ އެވެ. އަންގާރަ ދުވަހުގެރޭ ގަލޮޅު ދަނޑުގައި ރާއްޖޭގެ އީގަލްސްއާ ދެކޮޅަށް ކުޅޭ މެޗަށް މިއަދު ބެންގަލޫރު ޓީމުން ވަނީ ހެންވޭރު ދަނޑުގައި ޕްރެކްޓިސް ވެސް ކޮށްފަ އެވެ.
އެކަމަކު މައްސަލަ ޖެހުނީ މިއަދު ހަވީރު ބެންގަލޫރުގެ ކުޅުންތެރިން ތިބޭ ހޮޓަލް ޖެން އިން ނުކުތުމުންނެވެ. އޭއެފްސީން ހަދާފައިވާ ޕްރޮޓޮކޯލްގައިވާ ގޮތުން ކުޅުންތެރިންނާއި އޮފިޝަލުންނަށް ހަމައެކަނި ނުކުމެވޭނީ ޓްރެއިނިންނާއި މެޗަށް އެކަންޏެވެ.
ބެންގަލޫރުން މިދިޔަ އަށް މަހެއްހާ ދުވަސް ހޭދަކުރީ ކޮވިޑް-19 އިން ރައްކާތެރިވުމަށްޓަކައި އަމިއްލަ ބަބްލްއެއްގެ ތެރޭގަ އެވެ. ރާއްޖެ އައުމާ ހަމައަށް ބެންގަލޫރު ޓީމުގެ ކުޅުންތެރިން ކޭމްޕްކޮށްގެން ތިބީ އިންޑިއާގެ ގޯއާގަ އެވެ. ގޯއާ އަކީ ދާދި ފަހުން ކާމިޔާބު ކަމާ އެކު އޭއެފްސީ ޗެމްޕިއަންސް ލީގުގެ މެޗުތައް ހޯސްޓްކުރި ސިޓީ އެވެ.
ގަލޮޅު ދަނޑުގައި ބުދަ ދުވަހު މެންދުރު ބޭއްވި ނޫސްވެރިންގެ ބައްދަލުވުމުގައި މިނިސްޓަރު މަހުލޫފާއި އެފްއޭއެމްގެ ރައީސް ބައްސާމް އަދީލް ޖަލީލް ވަނީ އޭއެފްސީ ކަޕް ބާއްވަނީ ފުރިހަމަ ރައްކާތެރި ގައިޑްލައިންތަކަކާ އެކުގައި ކަމަށް ވިދާޅުވެފަ އެވެ. އެފްއޭއެމުން ވަނީ މި ވަގުތު ރާއްޖޭގައި ކޮވިޑްގެ ކޭސްތައް ގިނަވެފައިވާތީ މުބާރާތް ފަސްކުރަން ހުށަހަޅައިފަ އެވެ. އެކަމަކު އޭއެފްސީން އެންގީ އިތުރަށް ހާލަތު ގޯސްނުވާނަމަ މުބާރާތް ޝެޑިއުލާ އެއްގޮތަށް ކުރިއަށްގެންދާށެވެ.
އޭއެފްސީ ކަޕްގައި ވާދަކުރާ ރާއްޖޭގެ މާޒިޔާ އާއި އީގަލްސް އިން ތިބީ މި ވަގުތު ކޭމްޕް ކޮށްގެންނެވެ. އީގަލްސް ހޮޓަލް ޖެންގައި ތިބިއިރު، މާޒިޔާ ކޭމްޕްކޮށްފައިވަނީ ހުޅުމާލޭ އަކާސިއާ ގެސްޓް ހައުސްގަ އެވެ. މި ދެ ޓީމުން އިއްޔެ ކޭމްޕްކުރީ ކޮވިޑަށް ޓެސްޓް ހެދުމަށް ފަހު އެވެ.
ބެންގަލޫރާއި އީގަލްސް ކުޅެން އޮތް ޕްލޭއޮފް މެޗުން މޮޅުވާ ޓީމަކަށް އޭއެފްސީ ކަޕްގެ ދެކުނު އޭޝިއާ އަށް ހާއްސަ ގްރޫޕުން ޖާގަ ލިބޭނެ އެވެ. އެ ގްރޫޕްގައި އޮތީ ރާއްޖޭގެ މާޒިޔާގެ އިތުރުން އިންޑިއާގެ އޭޓީކޭ މޯހަން ބަގާން އާއި ބަންގްލަދޭޝްގެ ބަޝުންދުރާ ކިންގްސް އެވެ. އެ ދެ ޓީމު ކުރިއަށް އޮތް ދެ ދުވަހެއްގެ ތެރޭގައި މާލެ އަންނަ ގޮތަށް އޮތީ ހަމަޖެހިފަ އެވެ.
