ޗައިނާއިން ޖައްވަށް ފޮނުވި ރޮކެޓަކުން ބޭނުން ނުވާ ބަޔެއް މި ހަފްތާ ބަންދުގައި ދުނިޔެއަށް ވެއްޓޭނެ ކަމަށް ލަފާކޮށްފި އެވެ.
ލޯންގް މާޗް-5ބީ ރޮކެޓް މިދިޔަ މަހު ޖައްވަށް ފޮނުވީ ޖައްވުގައި ސްޕޭސް ސްޓޭޝަނެއް ހަދަން ބޭނުންވާ ފުރަތަމަ މޮޑިއުލްއާ އެކު އެވެ.
އެ ރޮކެޓުން ބޭނުން ނުވާ ބައި އެއާ ވަކިވެ، ދުނިޔެއަށް ވެއްޓެން ކައިރިވެފައި ވާއިރު އޭގެ ބަރުދަނުގައި 18 ޓަނު އެބަ ހުއްޓެވެ.
އެމެރިކާއިން ބުނީ ދުނިޔެއަށް ވެއްޓެން ކައިރިވެފައިވާ އެތި ދަތުރު ކުރަމުންދާ ގޮތް ބަލަމުންދާ ކަމަށެވެ. އަދި އެއަށް ބަޑި ޖަހާ ވައްޓާލަން ނުވިސްނާ ކަމަށް ބުންޏެވެ.
"އަޅުގަނޑުމެންނަށް މި ބެލެވެނީ އޭތި ވެއްޓޭނީ އެއްވެސް މީހަކަށް ގެއްލުން ނުވާނެ ފަދަ ތަނަކަށް ކަމަށް. އުއްމީދަކީ ކަނޑު ނުވަތަ އެކަހަލަ ކޮންމެވެސް ތަނަކަށް އެ ވެއްޓުން،" އެމެރިކާގެ ޑިފެންސް ސެކެޓްރީ ލޮއިޑް އޯސްޓިން ވިދާޅުވި އެވެ.
ތަޖުރިބާކާރުން ބުނާ ގޮތުގައި އޭތި ދުނިޔެއަށް ވެއްޓޭނެ ކަމަށް ބެލެވެނީ ޖީއެމްޓީ ގަޑިން ހޮނިހިރު ދުވަހު ދަންވަރު ނުވަތަ އާދީއްތަ ދުވަހުގެ ފަތިހު އެވެ.
ގިނަ ފަހަރަށް ރޮކެޓުތައް ޖައްވަށް ފޯރުމުގެ ކުރިން އޭގެ ބޭނުން ނުވާ ބައި އެޓްމޮސްފިއާ ތެރޭގައި ވިރިގެން ދެ އެވެ. ނަމަވެސް ބައެއް ފަހަރު ދަގަނޑު ފަދަ ބައެއް ތަކެތި ހަލާކުނުވެ ހުރެ އެވެ.
މީގެ އަހަރެއްހާ ދުވަސް ކުރިން ވެސް ރޮކެޓެއްގެ ބޭކާރު ބައި ދުނިޔެއަށް ވެއްޓުނެވެ. އޭތި ވެއްޓުނީ އެފްރިކާގެ ގައުމެއް ކަމަށްވާ އައިވޮރީ ކޯސްޓަށެވެ.
ޖައްވުން ދުނިޔެއަށް ވެއްޓޭ ކުނީގެ ސަބަބުން މީހަކަށް ގެއްލުންވުމުގެ ފުރުސަތު ކުޑަ ކަމަށް ތަޖުރިބާކާރުން ބުނެ އެވެ. އެއީ ދުނިޔޭގެ ބޮޑު ބަޔަކީ ކަނޑަށް ވެފައި، މީހުން އުޅޭ ހިސާބުތަކަށް ވުރެ ފަޅު ހިސާބުތައް ބޮޑުވުމުންނެވެ.
