އިންޑިއާގައި ތިބި އޮސްޓްރޭލިއާ މީހުން ގައުމަށް އެތެރެވެއްޖެ ނަމަ ޖަލަށް ލާނެ ކަމަށް އިއުލާނު ކުރުމުން އަމާޒުވި ފާޑުކިޔުންތަކާ ގުޅިގެން އިންޑިއާގަައި ތާށިވެފައި ތިބި ރައްޔިތުން އަނބުރާ ގައުމަށް ގެންނަން އޮސްޓްރޭލިއާއިން ނިންމައިފި އެވެ.
އޮސްޓްރޭލިއާއިން އަލަށް އެކުލަވާލި އުސޫލެއްގެ ދަށުން މޭ 15 އާ ހަމައަށް އެއްވެސް މީހަކަށް އިންޑިއާއިން އެ ގައުމަށް ނާދެވޭނެ އެވެ. އުސޫލާ ހިލާފަށް އެތެރެވެއްޖެ ނަމަ، އަދަބެއްގެ ގޮތުގައި ބޮޑެތި ޖޫރިމަނާ އަދި ޖަލަށް ދާން ޖެހޭނެ ކަމަށް އަންގާފައި ވެއެވެ.
ނަމަވެސް އެއީ ރޭސިސްޓް އުސޫލެއް ކަމަށް ބުނެ ވަރަށް ބޮޑަށް ފާޑުކިޔުން އަމާޒުވި އެވެ. އެއާއެކު ސަރުކާރުން މިހާރު ނިންމާފައި ވަނީ މޭ 15 އަށް ފަހު އިންޑިއާގައި ތިބި އޮސްޓްރޭލިއާގެ މީހުން ގައުމަށް ގެނައުމަށް ހާއްސަ ފްލައިޓްތަކެއް ބޭއްވުމަށެވެ.
އިންޑިއާގައި 9000 އަށް ވުރެ ގިނަ އޮސްޓްރޭލިއާ މީހުން އެބަ ތިއްބެވެ. އޭގެ ތެރެއިން ކޮވިޑުގެ ނުރައްކާ އެންމެ ބޮޑު ކަމަށް ފާހަގަވާ 900 މީހުން އެބަ އުޅެ އެވެ. އޮސްޓްރޭލިއާގެ ބޮޑު ވަޒީރު ސްކޮޓް މޮރިސަން ވިދާޅުވީ އެންމެ ފުރަތަމަ އިސްކަން ދޭނީ އެމީހުން ގެންނަން ކަމަށެވެ.
ބާކީ ތިބި މީހުން ގައުމަށް އަންނަން ޖެހޭނީ ކޮމާޝަލް ފްލައިޓުތަކަށް ހުއްދަ ދިނުމުން ޓިކެޓު ގަނެގެން ކަމުގައި ބެލެވެ އެވެ. ބައެއް މީހުން ބުނެފައިވަނީ ޓިކެޓުގެ އަގުތައް ހުންނާނެ ގޮތަކާ މެދު ކަންބޮޑުވާ ކަމަށާއި ސީޓެއް ލިބޭނެ ކަމުގެ ޔަގީންކަމެއް ވެސް ނެތް ކަމަށެވެ.
އޮސްޓްރޭލިއާއިން އިންޑިއާއަށް ކުރާ ދަތުރުތައް ކެންސަލްކޮށް ވަރުގަދަ ފިޔަވަޅުތަކެއް ތަންފީޒު ކުރަން ފެށީ އޭޕްރިލް 27 ގައެވެ. އެ ހަފްތާގައި އޮސްޓްރޭލިއާ މީހުން ގައުމަށް ގެނައުމަށް ތާވަލު ކުރި ދެ އިވެކުއޭޝަން ދަތުރު ކެންސަލް ވެސް ކުރި އެވެ.
އިންޑިއާއާ މެދު ހަރުކަށި ފިޔަވަޅުތަކެއް އެޅީ ކޮވިޑުގެ ދެ ވަނަ ރާޅެއްގައި އެ ގައުމުގެ ހާލަތު ވަރަށް ބޮޑަށް ގޯސްވުމާ ގުޅިގެންނެވެ.
