ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދު ކާރުކޮޅަށް އަރާވަޑައިގަންނަވަނިކޮށް އެއްޗެއް ގޮއްވާލައި ދިން ހަމަލާ އެންމެ ހަރުކަށި އިބާރާތުން ކުށްވެރި ކުރައްވައި، ސީރިއަސް މައްސަލައެއް ގޮތުގައި ތަހުގީގު ކުރައްވާނެ ކަމަށް ރައީސް އިބްރާހިމް މުހައްމަދު ސޯލިހް މިރޭ ވިދާޅުވެއްޖެ އެވެ.
ރައީސް ސޯލިހު ކުރެއްވި ޓުވީޓެއްގައި ވިދާޅުވީ، މާލޭ ނީލޯފަރުމަގުގައި ބާރުގަދަ އެއްޗެއް ގޮވައި ރައީސް މުހައްމަދު ނަޝީދަށް ލިބިވަޑައިގެންނެވި އަނިޔާއަށް މިހާރު އޭޑީކޭ ހޮސްޕިޓަލުގައި ފަރުވާދެމުން އަންނަ ކަމަށެވެ.
މިރޭ ރައީސް ނަޝީދުގެ ގެކޮޅު ކައިރީގައި ކާރު އޮތްވައި އެއަށް އަރާވަޑައިގަންނަވަނިކޮށް އެ ސަރަހައްދުގައި ބާރުގަދަ ގޮވުމެއް ވަނީ ގޮއްވާލާފަ އެވެ. އަދި އޭގެ ސަބަބުން އެ ސަރަހައްދުގައި ހުރި ސައިކަލްތަކަށް ވެސް ވަނީ ގެއްލުންވެފަ އެވެ.
ރައީސް ނަޝީދުގެ އިތުރުން ބިދޭސިއަކަށާއި އެމަނިކުފާނުގެ ބޮޑީގާޑުންނަށް ވެސް ވަނީ އެކި ވަރުގެ އަނިޔާވެފަ އެވެ.
ހަމަލާގެ ސައިޓަށް ވަޑައިގެން، ނޫސްވެރިންގެ ސުވާލުތަކަށް ޖަވާބުދެއްވަމުން އިމްރާން ވިދާޅުވީ، ރައީސް ނަޝީދަށް ދިން ހަމަލާ އަކީ ލުއި ކަމެއްގެ ގޮތުގައި ސަރުކާރުން ނުނަގާނެ ކަމަށެވެ. ސަރުކާރުގެ ހުރިހާ ވަސީލަތެއް ބޭނުންކޮށްގެން އެ ހަމަލާ ތަހުގީގުކޮށް، އެކަން ކުރި މީހުން އިންސާފުގެ ކުރިމައްޗަށް ގެންނާނެ ކަމަށާއި އެ މަސައްކަތް މިހާރު ފަށާފައިވާ ކަމަށް ވެސް ވިދާޅުވި އެވެ.
"މައްސަލައިގެ ތަހުގީގާ ބެހޭގޮތުން ވާހަކަ ދައްކަން އަދި ވަރަށް އަވަސް، އެހެން ނަމަވެސް އެ އަމަލު ހިންގި ފަރާތްތައް އިންސާފުގެ ކުރިމައްޗަށް ގެނައުމުގެ މަސައްކަތް މިދަނީ ކުރަމުން،" އިމްރާން ވިދާޅުވި އެވެ.
މިނިސްޓަރު ވިދާޅުވީ، އެ މައްސަލަ ތަހުގީގުކުރަން ފުލުހުންނާއި ސިފައިންގެ އިތުރުން އެހީތެރިވާ އެހެން ގައުމުތަކުގެ މުއައްސަސާތައް ވެސް ގުޅިގެން މައްސަލަ ތަހުގީގުކުރުމުގެ މަސައްކަތް ކުރިއަށްދާ ކަމަށެވެ. އަދި ތަހުގީގަށް މުހިއްމު މައުލޫމާތުތަކެއް ފުލުހުންގެ އިންޓެލިޖެންސަށް ލިބެމުންދާ ކަމަށާއި އެ މައުލޫމާތުތައް އެނަލައިޒްކޮށް ބަލަންޖެހޭ ކަންކަން ބަލަމުންދާ ކަމަށް ވެސް އިމްރާން ވިދާޅުވި އެވެ.
