ކޮވިޑްގެ ހާލަތު ރާއްޖޭގައި ގޯސްވެފައިވާތީ، ފަންނީ ގޮތުންނާއި އެހެން ވެސް ގޮތްގޮތުން އެހީތެރިކަން ފޯރުކޮށްދޭން ތައްޔާރަށް ތިބިކަން ހާމަކޮށް އިދިކޮޅު ކޯލިޝަނުން، ރައީސް އިބްރާހިމް މުހައްމަދު ސޯލިހަށް ސިޓީއެއް ފޮނުވައިފި އެވެ.
ކޮވިޑްގެ ހާލަތު އިތުރަށް ގޯސްވެ، އިއްޔެ އެކަނި ވެސް 700 އަށްވުރެ ގިނަ މީހުން ވަނީ ޕޮޒިޓިވްވެފަ އެވެ. އެއާއެކު، މާލޭ ސަރަހައްދަށް ވަނީ ފިޔަވަޅުތަކެއް އަޅައި، ކާފިއު ވެސް އިއުލާންކޮށްފަ އެވެ. މި ހާލަތުން އަރައިގަތުމަށް ސަރުކާރުން ވަނީ އެޗްއީއޯސީގެ އޮޕަރޭޝަންތައް ފުޅާކޮށްފަ އެވެ.
އިދިކޮޅު ކޯލިޝަންގެ ހިމެނޭ ޕީއެންސީގެ ނައިބު ރައީސް، މަޑުއްވަރީ ދާއިރާގެ މެމްބަރު އާދަމް ޝަރީފް ވިދާޅުވި ގޮތުގައި ގައުމު އޮތް ހާލަތުން އަރައިގަތުމަށް ސަރުކާރާއެކު ޕޮޒިޓިވް ނޯޓެއްގައި މަސައްކަތް ކުރުމަށް އިދިކޮޅު އޮތީ ތައްޔާރަށެވެ.
"އަޅުގަނޑުމެންގެ އެހީތެރިކަން ބޭނުންވާ ދާއިރާތަކާއި ކޮށްދޭންވީ ކަންކަން އަންގަވައި ދެއްވައިފިނަމަ އެކަމެއް އަޅުގަނޑުމެން ކުރާނަން،" އާދަމް ޝަރީފް ވިދާޅުވި އެވެ.
އާދަމް ޝަރީފް ވަނީ މާލޭގައި އެންމެ ފުރަތަމަ ކޮވިޑް ފެތެރެން ފެށުމާއެކު ވެސް އިދިކޮޅު އެހީތެރިކަން ލިބޭނެކަން ހާމަކޮށް ރައީސްއަށް ދަންނަވާފަ އެވެ. އެފަހަރު ވޮލެންޓިއަރުންގެ ގޮތުގައި މަސައްކަތް ކުރެވޭނެ މީހުންގެ ލިސްޓެއް ވެސް ފޮނުވި ކަމާއި ނަމަވެސް، ރައީސްގެ ފަރާތުން އެއްވެސް ޖަވާބެއް ނުލިބުނުކަން އޭނާ ފާހަގަ ކުރެއްވި އެވެ.
ކުރީގެ ޑިފެންސް މިނިސްޓަރު އާދަމް ޝަރީފް ވިދާޅުވީ މިހާރު ވެސް އިދިކޮޅުން ތިބީ، ހާއްސަ ގޮތެއްގައި އިންސާނީ ވަސީލަތްތައް ފޯރުކޮށްދިނުމަށް ތައްޔާރަށް ކަމަށެވެ.
މާލޭގައި ހާލަތު ގޯސްވެފައިވާއިރު، ސިއްހީ އެހީތެރިން މަދުވެ ވޮލެންޓިއަރުން ހޯދުމަށް ހެލްތު މިނިސްޓްރީން ވަނީ އިއުލާންކޮށްފަ އެވެ. އެއަށްފަހު، ފަސްޓްލޭޑީ ފަޒުނާ އަހުމަދު ވެސް ވަނީ ވީހާވެސް ގިނަ ބަޔަކު ވޮލެންޓަރީކޮށް ހިދުމަތްކޮށް ދިނުމަށް އިސްނެގުމަށް ބާރު އަޅުއްވާފަ އެވެ.
އާދަމް ޝަރީފް ވިދާޅުވި ގޮތުގައި އިދިކޮޅުގެ އެންމެ ބޮޑު ކަންބޮޑުވުމަކީ، ކޮވިޑްގައި އުޅޭތާ އެއް އަހަރުވެގެން ދިޔައިރު ވެސް ސަރުކާރަށް ވަސީލަތްތައް އިތުރު ކުރެވިފައި ނެތުމެވެ. އިންސާނީ ވަސީލަތްތަކާއި އެހެން ގޮތްގޮތުން ވެސް ކުރިއެރުމެއް ލިބިފައިނުވާކަން އޭނާ ކަންބޮޑުވުމާއެކު ފާހަގަ ކުރެއްވި އެވެ.
ދަރުމަވަންތަ ހޮސްޕިޓަލްގެ އައިސީޔޫ އާއި ފަރުކޮޅުފުށި ކޮވިޑް ފެސިލިޓީ ވެސް މިހާރު ފުރިފައިވާއިރު އިތުރު ފެސިލިޓީތައް އޮޕަރޭޝަނަށް ގެނައުމުގެ މަސައްކަތް މިހާރު ސަރުކާރުން ވަނީ ފަށާފަ އެވެ.
