މިހާރު ކުރިއަށްދާ އޯލެވެލް އިމްތިހާނުގެ އިސްލާމް ޓެސްޓް އޮތް ދުވަހު، އެ މާއްދާގެ ޓެސްޓް ކަރުދާހުގެ ބަދަލުގައި އޮޅިގެން ދިވެހި ޓެސްޓް ކަރުދާސް ބެހުނު މައްސަލައެއް ފެންމަތިވެއްޖެ އެވެ.
ދިވެހި މާއްދާ ކިޔަވައިދޭ ބައެއް ޓީޗަރުން "އަދަދު"އަށް މިއަދު ކިޔައިދިން ގޮތުގައި މިދިޔަ އާދިއްތަ ދުވަހު އިސްލާމް ޓެސްޓަށް ގޮސް ދިޔަ ގާޒީ ސްކޫލްގެ ބައެއް ދަރިވަރުންގެ އަތަށް ފުރަތަމަ ދީފައިވަނީ ދިވެހި ޓެސްޓް ކަރުދާހެވެ.
އޯލެވެލް އިމްތިހާނުގެ ދިވެހި ޓެސްޓް އޮތީ އަންނަ އާދިއްތަ ދުވަހު އެވެ.
"ޕޭޕަރު ކުދިންގެ އަތަށް ދިންތާ 15 މިނެޓް ފަހުން އެނގުނީ ނުބައި ޕޭޕަރެއްކަން ބެހުނީ، ދެން ފަހުން އަތުލީ، އެކަމަކު ކުދިންނަށް ޕޭޕަރު ފެނިފަތާ ހުންނާނީ،" މާލޭ ސްކޫލުގެ ލީޑިން ޓީޗަރަކު ނަން ނުޖަހަން ޝަރުތުކޮށް ބުންޏެވެ.
ވާހަކަ ދެއްކި ބައެއް ޓީޗަރުން ވަނީ އިމްތިހާނު ބޭއްވުމުގެ ކުރިން ކުދިންގެ އަތަށް ދިވެހި ޓެސްޓް ކަރުދާސް ދީފައިވުމުން އަލުން އާ ކަރުދާހެއް ހަދައިގެން ނޫނީ އިމްތިހާނު ބާއްވައިގެން ނުވާނެ ކަމަށް ބުނެފަ އެވެ. އަދި މިހާތަނަށް އެކަމާ ގުޅިގެން އެޑިއުކޭޝަނުން ވަކި އެއްޗެއް ނާންގާތީ، އެ ޓީޗަރުން ވަނީ ކަންބޮޑުވެފަ އެވެ.
ކަރުދާސް ބެހިޔަސް، ކުދިންނަށް ނުފެނޭ: އެޑިއުކޭޝަން
ހުޅުމާލޭގައި ހުންނަ ގާޒީ ސްކޫލްގައި މިކަން ހިނގާފައިވާކަން އެޑިއުކޭޝަނުން ވެސް ޔަގީންކޮށްދިނެވެ.
ޑިޕާޓްމަންޓް އޮފް ޕަބްލިކް އެގްޒަމިނޭޝަން (ޑީޕީއީ) ހިންގުމާ ހަވާލުވެވަޑައިގެން ހުންނެވި އެޑިއުކޭޝަން މިނިސްޓްރީގެ ޑެޕިޔުޓީ މިނިސްޓަރު މުހައްމަދު އިހުސާން ވިދާޅުވި ގޮތުގައި، އޮޅިގެން ދިވެހި ކަރުދާސް ދެވުނީ ދެ ކުއްޖެއްގެ އަތަށް ކަމަށާއި އެ ކުދިން ޓެސްޓް ކަރުދާސް ބެލުމުގެ ކުރިން އަނބުރާ، އެ އަތުލި ކަމަށެވެ.
އޭގެ ތެރެއިން އެއް ކުއްޖަކު ބުނީ ނުބައި ޕޭޕަރެކޭ ތިދިނީ. އެހިސާބުން ވަގުތުން ޕޭޕަރު ނަގައިފި. ޕޭޕަރު ނުފެނޭ އެއްވެސް ކުއްޖަކަށް. އެހެންވެ ޕޭޕަރު އަލުން ބާއްވަން ޖެހޭ ވަރުގެ ކަމެއް ނުހިނގާ،-- އިހުސާން
ހުޅުމާލޭގައި ވެސް ޓެސްޓް ކަރުދާސް ބަހައްޓަނީ ޕޭޕާ ރޫމްތަކުގައި ކަމަށްވާއިރު ކޮންމެ ސްކޫލެއްގައި ވެސް ޓެސްޓް ކަރުދާސްތަކާ ހަވާލުވެ މީހަކު ހުރެ އެވެ.
އިހުސާން ވިދާޅުވީ ގާޒީ ސްކޫލުގައި ޓެސްޓް ކަރުދާސް އޮޅެން މެދުވެރިވީ އެ ސްކޫލުން ޓެސްޓް ކަރުދާސްތަކާ ހަވާލުވެ ހުރި މީހާ ކޮވިޑަށް ޕޮޒިޓިވްވުމުން، އެހެން މީހަކާ އެ ޒިންމާ ހަވާލު ކުރި ފަހުން ކަމަށެވެ.
ދިވެހި ޓެސްޓް ކަރުދާސް އިމްތިހާނުގެ ކުރިން ބަހާފައިވާއިރު އޭލެވެލް ބައެއް ޓެސްޓް ކަރުދާސްތައް ރާއްޖޭން ބޭރުން ލީކް ވުމާ ގުޅިގެން ގްރޭޑް 12ގެ ޓެސްޓް ވަނީ އޮކްޓޫބަރު މަހަށް ފަސްކޮށްފަ އެވެ.
މިދިޔަ މަހު 14ގައި އޯލަވެލް ޓެސްޓް ހަދަން ރާއްޖޭގައި ފަށާފައިވާއިރު މިއީ މިދިޔަ އަހަރު ގްރޭޑް 10 ނިމޭ ކުދިންނެވެ. އޯލެވެލް އިމްތިހާނު ނުހެދި އެ ކުދިންނަށް ލަސްވީ ކޮވިޑްގެ ސަބަބުންނެވެ.
