ހުއްދަ ނުދޭ ވެކްސިނެއް ބަލައިގަތް ކަމަށް ބުނެ ފާޑުކިޔުންތައް އަމާޒުވުމާ ގުޅިގެން، ޗައިނާއިން ހަދިޔާ ކުރި ސިނޮފާމް ވެކްސިނުގެ 1000 ޑޯޒް އަނބުރާ ގެންދަން ފިލިޕީންސްގެ ރައީސް ރޮޑްރިގޯ ޑުޓާޓޭ އެދިވަޑައިގެންފި އެވެ.
ފިލިޕީންސްގައި ހުންނަ ޗައިނާ އެމްބަސީގެ ކިބައިން އެގޮތަށް އެދިވަޑައިގެން ޑުޓާޓޭ ވިދާޅުވީ ކުރިއަށް އޮތް ތަނުގައި ޗައިނާ ހަމައެކަނި ސިނޮވެކް ވެކްސިން ފޮނުވަން އެދޭ ކަމަށެވެ. ޗައިނާގައި އުފެއްދި ސިނޮވެކްއަކީ ފިލިޕީންސްގައި ހުއްދަ ދީފައިވާ ވެކްސިނެކެވެ.
ނަމަވެސް ސިނޮފާމް ވެކްސިނަށް އެ ގައުމުގައި އަދި ހުއްދައެއް ނުދެ އެވެ. ސިނޮފާމާއި ސިނޮވެކަށް ހުއްދަ ދިނުމާ ގުޅޭ ގޮތުން ދުނިޔޭގެ ސިއްހަތު ޖަމިއްޔާ (ޑަބްލިއުއެޗްއޯ) އިން މި ހަފްތާގައި ގޮތެއް ނިންމާނެ އެވެ.
މި ދެ ވެކްސިން ވެސް ވައިރަހާ ދެކޮޅަށް ރަނގަޅަށް މަސައްކަތް ކުރި ނަމަވެސް ސައިޑް އިފެކްޓާ ގުޅޭ އިތުރު މައުލޫމާތު ބޭނުންވާ ކަމަށް އިއްޔެ ޑަބްލިއުއެޗްއޯއިން ބުންޏެވެ.
ޗައިނާއިން ދިން ވެކްސިން މައްސަލާގައި ޑުޓާޓޭއަށް ފާޑުކިޔުން އަމާޒުވެފައި ވާއިރު، އެމަނިކުފާނު ޖެއްސެވީ ސިނޮފާމް ވެކްސިނެވެ. އެއީ ޑޮކްޓަރުންގެ ލަފައާ އެއްކޮށް ކަމަށް ޑުޓާޓޭ ވިދާޅުވި އެވެ.
"އަޅުގަނޑުގެ ފިޔަވަޅުތައް ފަހަތުން ނާންނާތި. ދިރާސާއެއް ނެތުމުން މީތި [ސިނޮފާމް] ނުރައްކާތެރި، ހަށިގަނޑަށް ރަނގަޅު ނުވެދާނެ. މި ވެކްސިން ޖެހި ހަމައެކަނި މީހަކީ އަޅުގަނޑު ކަމަށް ހަދަމާ،" ޑުޓާޓޭ ވިދާޅުވި ކަމަށް ފިލިޕީންސްގެ ނޫސްތަކުން ރިޕޯޓުކޮށްފައި ވެއެވެ.
މި ވަގުތު ފިލިޕީންސްގައި ހުއްދަ ދީފައި ވަނީ ހަމައެކަނި އެސްޓްރަޒެނެކާ އާއި ސިނޮވެކް އަށެވެ. މި ދެ ވެކްސިން ވެސް ދެމުން ދަނީ ފްރަންޓްލައިން މަސައްކަތްތެރިންނާއި ބަލީގެ ނުރައްކާ ބޮޑު މީހުންނަށެވެ.
ރެޕްލާ ނޫހުން ބުނި ގޮތުގައި ހުއްދަ ނުދޭ ވެކްސިނެއް ޖައްސަވަން ޑުޓާޓޭ ބޭނުންވެ ވަޑައިގެންނެވި ސަބަބު ސާފެއް ނޫނެވެ.
ދެކުނު އިރުމަތީ އޭޝިއާގައި ކޮވިޑުގެ ހާލަތު އެންމެ ގޯސް އެއް ގައުމަކީ ފިލިޕީންސް އެވެ. އެ ގައުމުގައި މިލިއަނެއްހާ މީހުން ޕޮޒިޓިވްވެ، 18000 މީހުން މަރުވެފައި ވެއެވެ.
