އެމެރިކާގައި އުމުރުން 12 އަހަރާއި 15 އަހަރާ ދެމެދުގެ ކުދިންނަށް ވީ އެންމެ އަވަހަށް ވެކްސިން ދޭން ފެށުމަށާއި ޖުލައި 4 ގެ ކުރިން 18 އަހަރުން މަތީގެ އާބާދީގެ 70 ޕަސެންޓަށް ވެކްސިން ދީ ނިންމާލުމަށް ރައީސް ޖޯ ބައިޑެން އަންގަވައިފި އެވެ.
ޖުލައި 4 ވަނަ ދުވަހަކީ އެމެރިކާގެ މިނިވަން ދުވަހެވެ. ބައިޑެން ނިންމެވީ އެ ދުވަހުގެ ކުރިން 160 މިލިއަން ބޮޑެތި މީހުންގެ ވެކްސިން ފުރިހަމަ ކުރުމަށެވެ. އެއީ އެމެރިކާއަށް ފަސޭހަކަމާއެކު ހާސިލް ކުރެވޭނެ ޓާގެޓެކެވެ.
މިހާރު ވެސް އެ ގައުމުގެ 105 މިލިއަން މީހުން ވެކްސިން ޖަހައި ނިމިއްޖެ އެވެ. އަދި ކޮންމެ ދުވަހަކު ގާތްގަނޑަކަށް މިލިއަނެއްހާ މީހުންނަށް ވެކްސިން ދެ އެވެ. ނަމަވެސް އެއީ މީގެ ތިން ހަފްތާ ކުރިއާ އަޅާ ބަލާއިރު ދެ ބައި ކުޅަ އެއް ބައި މަދު އަދަދެކެވެ.
ބައިޑެންގެ ސަރުކާރުން ބުނީ އެންމެ ބޮޑު ސަމާލުކަމެއް ދެނީ ވެކްސިނަށް އިތުބާރު ނުކުރާ މީހުންގެ ވިސްނުން ބަދަލު ކުރަން ކަމަށެވެ.
އެމެރިކާގެ މިނިވަން ދުވަހުގެ ކުރިން ގިނަ ބަޔަކަށް ވެކްސިން ދީ ނިންމާލުމުގެ ގޮތުން އެކަމަށް ހާއްސަ ވެބްސައިޓެއް ވެސް ވަނީ ލޯންޗުކޮށްފަ އެވެ. މީގެ ކުރިން ގިނަ ބަޔަކު ވަނީ ވެކްސިން ޖަހަން އެޕޮއިންޓްމަންޓް ހޯދަން އުނދަގޫ ކަމަށް ބުނެ ޝަކުވާ ކޮށްފަ އެވެ. އެހެންކަމުން މިއީ އެކަމަށް ގެނައި ހައްލެކެވެ.
އެމެރިކާގެ ފުޑް އެންޑް ޑްރަގް އެޑްމިނިސްޓްރޭޝަނުން ދަނީ ފައިޒާގެ ކޮވިޑް ވެކްސިން އުމުރުން 12 އަހަރުގެ ކުދިންނަށް ދިނުމުގެ ހުއްދަ ދޭން ފެނޭތޯ މަޝްވަރާ ކުރަމުންނެވެ. މިހާރު ވެސް 16 އަހަރުން މަތީގެ ކުދިންނަށް މި ވެކްސިން ދެ އެވެ.
ބައިޑެން ވިދާޅުވީ އެފްޑީއޭގެ ނިންމުމަށް ނުފޫޒު ނުފޯރުވާނެ ކަމަށާއި ހުއްދަ ދީފި ނަމަ ވަގުތުން ވެކްސިން ދިނުމުގެ ކަންކަން ފަށާނެ ކަމަށެވެ.
ހުއްދަ ދީފި ނަމަ އުމުރުން 12 އަހަރާއި 15 އަހަރާ ދެމެދުގެ 17 މިލިއަން ކުދިންނަށް ވަގުތުން ވެކްސިން ދިނުމުގެ މަސައްކަތް ފަށާނެ އެވެ.
އެމެރިކާގެ އެންމެ އިސް މެޑިކަލް އެޑްވައިޒަރު ޑރ. އެންތަނީ ފައުޗީ ކުރިން ވިދާޅުވީ ދިރިއުޅުން "ނޯމަލް" އަށް ދިޔުމަށް ކުދިންނަށް ވެސް ވެކްސިން ދޭން ޖެހޭނެ ކަމަށެވެ.
އެމެރިކާގެ އުމުރުން ދުވަސްވީ މީހުންގެ 75 ޕަސެންޓަށް ވެކްސިން ދިނުމާއެކު ކުޑަކުދިންގެ މެދުގައި ބަލި ފެތުރުން އިތުރު ކަމަށް އެމެރިކަން އެކެޑެމީ އޮފް ޕީޑިއެޓްރިކްސްގެ ދިރާސާއަކުން ދައްކަ އެވެ.
